ជប៉ុនចេញផ្សាយសៀវភៅ ស ដែលរិះគន់ឥរិយាបថចិន
ចុះផ្សាយនៅថ្ងៃ៖
ស្តាប់ - ០៣:៥៤
សៀវភៅ ស ដែលជាឯកសារកំណត់អំពីនយោបាយការពារជាតិ ត្រូវបានរដ្ឋាភិបាលជប៉ុនអនុម័ត និងចេញផ្សាយ កាលពីថ្ងៃអង្គារ ម្សិលមិញ ដោយក្នុងនោះ ជប៉ុនបានរិះគន់ធ្ងន់ចំពោះសកម្មភាពយោធារបស់ចិន ជាពិសេស នៅក្នុងតំបន់ដែនសមុទ្រជាប់ជម្លោះ។ សកម្មភាពដែលជប៉ុនបារម្ភថាអាចនឹងបង្កឲ្យមានការប៉ះទង្គិចគ្នានៅថ្ងៃណាមួយ។
សៀវភៅ ស ប្រចាំឆ្នាំ ដែលរដ្ឋាភិបាលជប៉ុនចេញផ្សាយ កាលពីថ្ងៃអង្គារនេះ គឺជាឯកសារកំណត់ពីនយោបាយការពារជាតិជប៉ុនទីមួយ ចាប់តាំងពីលោកស្ហ៊ីនហ្សូ អាបេ និងគណបក្សអភិរក្សនិយមរបស់លោកបានឡើងកាន់អំណាច នៅជប៉ុន។
ឯកសារកម្រាស់ ៤៥០ទំព័រនេះ បានលើកឡើងចំឈ្មោះ អំពីសកម្មភាពរបស់ចិន ដែលជប៉ុនហៅថាជា “ការរំលោភចូលទៅក្នុងដែនទឹក និងដែនអាកាសរបស់ជប៉ុន” និងថា “ជាសកម្មភាពប្រកបដោយគ្រោះថ្នាក់ ដែលអាចបង្កជាហេតុការណ៍ដែលមិនបានព្រាងទុក”។
ជប៉ុនបានធ្វើការសង្កត់ធ្ងន់ទៅលើហេតុការណ៍ ដែលបានកើតឡើង កាលពីចុងខែមករាកន្លងទៅ ដែលនាវាចម្បាំងរបស់ចិនបានប្រើរ៉ាដាកំណត់គោលដៅបាញ់ ចាប់នាវាចម្បាំងរបស់ជប៉ុន នៅក្នុងដែនទឹកក្បែរប្រជុំកោះជាប់ជម្លោះ។ ជាសកម្មភាព ដែលគេធ្វើឡើង ដើម្បីត្រៀមបាញ់ប្រហារទៅលើគូសត្រូវ។
ហេតុការណ៍ដែលអះអាងដោយរដ្ឋាភិបាលជប៉ុននេះ ធ្លាប់ត្រូវបានអាជ្ញាធរក្រុងប៉េកាំងបដិសេធរួចមកហើយថា ជាការអះអាងមិនពិត។ ចំពោះការចេញផ្សាយសៀវភៅ ស កាលពីថ្ងៃអង្គារនេះ អ្នកនាំពាក្យក្រសួងការបរទេសចិនក៏បានច្រានចោលផងដែរ នូវការថ្លែងរិះគន់របស់ជប៉ុនមកលើចិន។
គួររំឭកឡើងវិញថា ជម្លោះរវាងចិន និងជប៉ុន ក្នុងការដណ្តើមប្រជុំកោះសេនកាគូ ឬទៀវយូ បានកើនឡើងខ្លាំង ចាប់តាំងពីខែកញ្ញា ឆ្នាំ២០១២មក ក្រោយពីរដ្ឋាភិបាលក្រុងតូក្យូបានប្រមូលទិញដីទាំងអស់ នៅក្នុងប្រជុំកោះនេះ ពីឯកជន យកមកធ្វើជាសម្បត្តិរបស់រដ្ឋ។ ចាប់ពីពេលនោះមក ចិន និងជប៉ុន តែងតែប្រឈមមុខគ្នាជារឿយៗ នៅក្នុងដែនទឹកក្បែរប្រជុំកោះជាប់ជម្លោះនេះ។
នៅក្នុងសភាពតានតឹងនេះ ជប៉ុនបានបង្កើនសកម្មភាពល្បាតដែនសមុទ្រ នៅក្នុងតំបន់ជាប់ជម្លោះ ហើយនៅក្រោយពេលដែលលោកស្ហ៊ីនហ្សូ អាបេ ឡើងកាន់តំណែង រដ្ឋាភិបាលក្រុងតូក្យូបានសម្រេចបង្កើនថវិកាការពារជាតិរបស់ខ្លួន ដែលជារឿងមិនធ្លាប់មាន ក្នុងរយៈពេល ១១ឆ្នាំកន្លងទៅនេះ។
ជប៉ុនគ្រោងបង្កើតអង្គភាពពិសេសមួយ ដែលមានទាហាន ៦០០នាក់ និងនាវា ១២គ្រឿង ដើម្បីការពារប្រជុំកោះសេនកាគូ ហើយបើយោងតាមកាសែតក្នុងស្រុកជប៉ុន រដ្ឋាភិបាលក្រុងតូក្យូមានគម្រោងបង្ហោះផ្កាយរណបចំនួន ៩គ្រឿង ក្នុងរយៈពេល ៥ឆ្នាំខាងមុខ ដើម្បីទុកឃ្លាំមើលដែនសមុទ្រ។
ប្រឈមមុខនឹងអំណាចយោធាចិន ដែលចេះតែកើនឡើងឥតឈប់ឈរពីមួយថ្ងៃទៅមួយថ្ងៃ គេសង្កេតឃើញថា ជប៉ុនក៏បានខិតខំព្យាយាមផងដែរ ក្នុងការពង្រឹងសម្ព័ន្ធភាពជាមួយសហរដ្ឋអាមេរិក ដែលបច្ចុប្បន្នមានកងទ័ពចំនួនជិត ៥ម៉ឺននាក់ កំពុងឈរជើងនៅក្នុងទឹកដីជប៉ុន ជាពិសេស នៅក្នុងខេត្តអូគីណាវ៉ា។ សមយុទ្ធរួមគ្នា រវាងកងទ័ពជប៉ុន និងកងទ័ពអាមេរិកត្រូវបានរៀបចំធ្វើជារឿយៗ ក្នុងនោះ រួមមានការហាត់សម អំពីសេណារីយ៉ូ វាយដណ្តើមយកមកវិញ នូវប្រជុំកោះដែលនៅឆ្ងាយៗពីឆ្នេរ ហើយដែលត្រូវបានគូសត្រូវចូលកាន់កាប់។
បន្ថែមពីការពង្រឹងសម្ព័ន្ធភាពជាមួយសហរដ្ឋអាមេរិក ជប៉ុនក៏កំពុងតែស្វះស្វែងផងដែរ ក្នុងការបង្កើនកិច្ចសហប្រតិបត្តិការជាមួយនឹងបណ្តាប្រទេស នៅក្នុងតំបន់អាស៊ាន ជាពិសេស ប្រទេសដែលមានជាប់ជម្លោះជាមួយចិន នៅក្នុងសមុទ្រចិនខាងត្បូង។
ក៏ប៉ុន្តែ ចិនវិញក៏មិនបានឈរឱបដៃនៅស្ងៀមនោះដែរ។ ចិនដែលកំពុងមានឥទ្ធិពលខ្លាំងស្រាប់ នៅក្នុងតំបន់អាស៊ាន កំពុងតែព្យាយាមបន្ថែមឥទ្ធិពលរបស់ខ្លួនបន្ថែមទៀត ជាពិសេស ព្យាយាមជារឿយៗបំបែកប្រទេសសមាជិកអាស៊ាន កុំឲ្យរួមដៃគ្នា មកតទល់ជាមួយចិន ក្នុងជម្លោះនៅសមុទ្រចិនខាងត្បូង។ លើសពីនេះទៅទៀត នៅពេលដែលជប៉ុនបើកធ្វើសមយុទ្ធទ័ពជើងទឹកជាញឹកញាប់ជាមួយអាមេរិក ចិនក៏បានធ្វើសមយុទ្ធទ័ពជើងទឹករួមគ្នាជាមួយរុស្ស៊ី នៅក្នុងតំបន់សមុទ្រក្បែរៗប្រទេសជប៉ុនដែរ។
សមយុទ្ធទ័ពជើងទឹករួមគ្នាក្នុងទ្រង់ទ្រាយធំ ដោយមាននាវាមុជទឹក និងនាវាចម្បាំងជាច្រើនគ្រឿង ត្រូវបានចិន និងរុស្ស៊ី បើកធ្វើរួមគ្នា តាំងពីថ្ងៃសុក្រ សប្តាហ៍មុន នៅក្នុងដែនសមុទ្រ ចន្លោះប្រទេសជប៉ុន និងឧបទ្វីបកូរ៉េ។ សមយុទ្ធដែលត្រូវបើកធ្វើរយៈពេលមួយសប្តាហ៍ ពោលគឺ រហូតដល់ថ្ងៃសុក្រ ១២កក្កដា។
គេសង្កេតឃើញជារួមថា នៅក្នុងពេលដែលជម្លោះដណ្តើមកោះជាមួយជប៉ុនមានការកើនឡើងខ្លាំង ហើយបូករួមនឹងការផ្លាស់ប្តូរនយោបាយការបរទេសរបស់សហរដ្ឋអាមេរិក ដែលចង់បង្កើនវត្តមានកងទ័ព នៅក្នុងតំបន់អាស៊ីប៉ាស៊ីហ្វ៊ិក ចិនកំពុងតែព្យាយាមបែរមកបង្កើនទំនាក់ទំនងខាងផ្នែកយោធាជាមួយនឹងរុស្ស៊ី ដែលជាអតីតគូប្រជែង ក្នុងសម័យសង្រ្គាមត្រជាក់។ “សត្រូវរបស់សត្រូវខ្ញុំ គឺជាមិត្តរបស់ខ្ញុំ” គឺជាពាក្យស្លោកដែលមានឫសគល់ក្នុងភាសាចិន ហើយដែលធ្លាប់ឆ្លុះបញ្ចាំងរួចមកហើយ ក្នុងការអនុវត្តជាក់ស្តែង នៃនយោបាយការបរទេសរបស់ចិនកាលពីអតីតកាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ