ជប៉ុនស្នើជាផ្លូវការឲ្យយកជម្លោះជាមួយកូរ៉េខាងត្បូងទៅតុលាការក្រុងឡាអេ
នៅថ្ងៃសុក្រនេះ រដ្ឋាភិបាលជប៉ុនបានស្នើសុំជាផ្លូវការដល់រដ្ឋាភិបាលកូរ៉េខាងត្បូងឲ្យយកជម្លោះដណ្តើមកោះដុកដូ/តាកេស៊្ហីម៉ា ទៅដោះស្រាយនៅតុលាការយុត្តិធម៌អន្តរជាតិ ក្រុងឡាអេ។ ក្នុងពេលជាមួយគ្នានេះ ជប៉ុនបានប្រកាសថានឹងសើរើមើលឡើងវិញ កិច្ចព្រមព្រៀងដោះដូររូបិយវត្ថុជាមួយកូរ៉េខាងត្បូង ហើយរដ្ឋមន្រ្តីក្រសួងហិរញ្ញវត្ថុជប៉ុនក៏បានប្រកាសលុបចោលដំណើរទស្សនកិច្ចទៅកូរ៉េខាងត្បូងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ភាពតានតឹងផ្នែកការទូតរវាងជប៉ុន និងកូរ៉េខាងត្បូង ជុំវិញជម្លោះដណ្តើមប្រជុំកោះដុកដូ/តាកេស្ហ៊ីម៉ា បានកើនឡើងមួយកម្រិតទៀតនៅថ្ងៃសុក្រនេះ ដោយរដ្ឋាភិបាលជប៉ុនបានប្រកាសថានឹងសើរើឡើងវិញ នូវកិច្ចព្រមព្រៀងដោះដូររូបិយវត្ថុជាមួយកូរ៉េខាងត្បូង ហើយដំណើរទស្សនកិច្ចរបស់រដ្ឋមន្រ្តីក្រសួងហិរញ្ញវត្ថុជប៉ុនទៅកាន់កូរ៉េខាងត្បូងក៏ត្រូវបានលុបចោល ដើម្បីជាការតវ៉ានឹងដំណើរទស្សនកិច្ចរបស់លោកលី ម្យ៉ុងបាក់ ទៅកាន់កោះជាប់ជម្លោះ កាលពីចុងសប្តាហ៍មុនផង និងតវ៉ាទៅនឹងពាក្យសម្តីរបស់លោកប្រធានាធិបតីកូរ៉េខាងត្បូងចំពោះអធិរាជជប៉ុនផង។
លោកលី ម្យ៉ុងបាក់ បានថ្លែងថា អធិរាជជប៉ុនអាគីហ៊ីតូចាំបាច់ត្រូវតែថ្លែងសុំទោសដោយសុទ្ធចិត្តពីទង្វើរបស់ជប៉ុនពីអតីតកាល ប្រសិនបើថ្ងៃណាមួយទ្រង់ចង់យាងទៅកូរ៉េខាងត្បូង។
លោក Jun Azumi រដ្ឋមន្រ្តីក្រសួងហិរញ្ញវត្ថុជប៉ុន បានលើកឡើងថា ជប៉ុនមិនអាចបណ្តោយឲ្យលោកលី ម្យ៉ុងបាក់ ប្រើពាក្យសម្តីដោយគ្មានការគោរពនេះមកលើអធិរាជជប៉ុន ដោយគ្មានការតបតអ្វីនោះទេ។
រដ្ឋាភិបាលជប៉ុនក៏បានប្រកាសឲ្យដឹងផងដែរថា ជប៉ុនបានស្នើសុំជាផ្លូវការដល់កូរ៉េខាងត្បូងឲ្យយកជម្លោះដណ្តើមកោះតាកេស៊្ហីម៉ានេះ ទៅដោះស្រាយនៅតុលាការយុត្តិធម៌អន្តរជាតិ។ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តីជប៉ុនបានថ្លែងប្រាប់អ្នកសារព័ត៌មានថា ប្រសិនបើកូរ៉េខាងត្បូងយល់ថាការទាមទារកម្មសិទ្ធិលើប្រជុំកោះតាកេស៊្ហីម៉ាពិតជាមានមូលដ្ឋានច្បាស់លាស់មែន កូរ៉េខាងត្បូងគួរតែទទួលយកដំណោះស្រាយតាមផ្លូវតុលាការអន្តរជាតិនេះ។
សំណើនេះត្រូវរដ្ឋាភិបាលកូរ៉េខាងត្បូងបានឆ្លើយបដិសេធភ្លាមៗ ដោយលើកឡើងថា ប្រជុំកោះដុកដូ គឺជាកម្មសិទ្ធិរបស់កូរ៉េខាងត្បូងយ៉ាងជាក់ច្បាស់ ដោយគ្មានត្រូវជាប់ជម្លោះ ដែលត្រូវដោះស្រាយនៅតុលាការអន្តរជាតិនោះទេ។
គួររំឭកថា កាលពីឆ្នាំ១៩៥៤ និងឆ្នាំ១៩៦២ ក៏ជប៉ុនធ្លាប់បានស្នើឲ្យយកជម្លោះនេះទៅតុលាការក្រុងឡាអេដែរ ប៉ុន្តែ ត្រូវកូរ៉េខាងត្បូងបដិសេធ។ នៅឆ្នាំ១៩៦៥ ប្រទេសទាំងពីរបានភ្ជាប់ទំនាក់ទំនងការទូតជាមួយគ្នាជាធម្មតាឡើងវិញ ហើយចាប់ពីពេលនោះមក ជប៉ុនមិនដែលលើកឡើងពីការប្តឹងទៅតុលាការក្រុងឡាអេនេះទៀតទេ។
ការបដិសេធរបស់រដ្ឋាភិបាលក្រុងសេអ៊ូលមានន័យថា ជប៉ុននឹងមិនអាចនាំយកជម្លោះលើប្រជុំកោះនេះទៅតុលាការយុត្តិធម៌អន្តរជាតិបានទេ ពីព្រោះថា រាល់បណ្តឹងទៅតុលាការនេះចាំបាច់ត្រូវតែមានការព្រមព្រៀងពីភាគីជម្លោះ ទើបតុលាការអាចទទួលយកមកជំនុំជម្រះបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ