ជប៉ុនទៅពង្រឹងសម្ព័ន្ធភាពជាមួយអាមេរិក ក្នុងពេលមានជម្លោះជាមួយចិន
ចុះផ្សាយនៅថ្ងៃ៖
ស្តាប់ - ០៤:០២
លោកស្ហ៊ីនហ្សូ អាបេ នាយករដ្ឋមន្រ្តីជប៉ុន ត្រូវជួបជជែកជាមួយលោកអូបាម៉ា នៅសេតវិមាននៅថ្ងៃសុក្រនេះ ក្នុងដំណើរទស្សនកិច្ចផ្លូវការរយៈពេល ២ថ្ងៃ ទៅកាន់សហរដ្ឋអាមេរិក។ គោលដៅសំខាន់របស់លោកស្ហ៊ីនហ្សូ អាបេ ក្នុងដំណើរទស្សនកិច្ចនេះ គឺដើម្បីបង្ហាញឲ្យចិនឃើញពីសម្ព័ន្ធភាពដ៏រឹងមាំរវាងជប៉ុន និងអាមេរិក នៅក្នុងពេលដែលជប៉ុន និងចិន កំពុងតែមានជម្លោះកាន់តែខ្លាំង ជុំវិញប្រជុំកោះសេនកាគូ ឬទៀវយូ។
លោកស្ហ៊ីនហ្សូ អាបេ បានទៅដល់រដ្ឋធានីវ៉ាស្ហ៊ីងតោន កាលពីថ្ងៃព្រហស្បតិ៍ម្សិលមិញ ហើយត្រូវជួបជាមួយលោកអូបាម៉ា នៅសេតវិមាន នៅថ្ងៃសុក្រនេះ។
សម្រាប់លោកអូបាម៉ា លោកស្ហ៊ីនហ្សូ អាបេ គឺជានាយករដ្ឋមន្រ្តីជប៉ុនទី៥ហើយ ដែលលោកបានជួប។ ក៏ប៉ុន្តែ ខុសពីនាយករដ្ឋមន្រ្តីជប៉ុនមុនៗ ដែលលោកអូបាម៉ាបានជួប លោកស្ហ៊ីនហ្សូ អាបេ បានបង្ហាញនូវជំហរច្បាស់ៗ តាំងពីពេលបោះឆ្នោតថា នៅក្នុងនយោបាយការបរទេស លោកនឹងផ្តល់អាទិភាពខ្ពស់បំផុតចំពោះសម្ព័ន្ធភាព រវាងជប៉ុន និងអាមេរិក។ ទំនាក់ទំនងដែលមានការរង្គោះរង្គើខ្លាំង នៅក្នុងពេលដែលគណបក្សឆ្វេងនិយម គឺគណបក្សប្រជាធិបតេយ្យជប៉ុន នៅកាន់អំណាច ដោយសារតែនៅពេលនោះ រដ្ឋាភិបាលជប៉ុនបានជំរុញឲ្យអាមេរិកដកទ័ពចេញពីអូគីណាវ៉ា។
នៅក្នុងបទសម្ភាសន៍ជាមួយកាសែត The Washington Post នៅមុនពេលធ្វើដំណើរទៅដល់សហរដ្ឋអាមេរិក លោកស្ហ៊ីនហ្សូ អាបេ បានលើកឡើងថា ការពង្រឹងសម្ព័ន្ធភាពជាមួយអាមេរិក រួមជាមួយនឹងវត្តមានកងទ័ពអាមេរិកប្រមាណជា ជិត ៥ម៉ឺននាក់ នៅលើទឹកដីជប៉ុន អាចជាសារដ៏សំខាន់មួយទៅកាន់ចិន នៅក្នុងពេលដែលជប៉ុន និងចិន កំពុងមានវិវាទកាន់តែខ្លាំងឡើង ជុំវិញប្រជុំកោះ ដែលជប៉ុនហៅថា សេនកាគូ ហើយដែលចិនហៅថា ទៀវយូ។
នៅក្នុងបទសម្ភាសន៍នេះ លោកស្ហ៊ីនហ្សូ អាបេ ក៏បានចោទប្រកាន់ចិនផងដែរថា កំពុងតែយកជម្លោះដែនទឹកជាមួយនឹងប្រទេសជិតខាង ដើម្បីកេងយកចំណេញផ្នែកនយោបាយក្នុងស្រុក ពោលគឺ ចិនបង្កើនភាពតានតឹងជាមួយប្រទេសជិតខាង រួមមានជប៉ុនជាដើម ដើម្បីទាក់ទាញការគាំទ្រពីក្រុមអ្នកជាតិនិយមចិន។ ការចោទប្រកាន់ ដែលធ្វើឲ្យចិនផ្ទុះកំហឹង ហើយទាមទារឲ្យមានការបកស្រាយបំភ្លឺ ពីលោកស្ហ៊ីនហ្សូ អាបេ។
គួរបញ្ជាក់ផងដែរថា ជំនួបរវាងលោកស្ហ៊ីនហ្សូ អាបេ និងលោកអូបាម៉ា នៅថ្ងៃសុក្រនេះ ធ្វើឡើងប្រមាណជាមួយខែ ក្រោយពីលោកស្រី ហ៊ីឡារី គ្លីនតុន ដែលពេលនោះជារដ្ឋមន្រ្តីការបរទេសអាមេរិកបានព្រមានចិនដោយពាក្យសម្តីធ្ងន់ៗ ជុំវិញរឿងប្រជុំកោះសេនកាគូ។ ការព្រមានធ្ងន់ៗ ដែលត្រូវចិនវាយបកត្រឡប់មកវិញធ្ងន់ៗដែរ នៅពេលនោះ។
កាលពីថ្ងៃព្រហស្បតិ៍ម្សិលមិញនេះ ទីប្រឹក្សារបស់លោកអូបាម៉ា ដែលទទួលបន្ទុកកិច្ចការអាស៊ី បានប្រាប់អ្នកសារព័ត៌មានថា លោកអូបាម៉ាចង់ឲ្យចិន និងជប៉ុន ស្វែងរកដំណោះស្រាយតាមផ្លូវការទូត ដើម្បីបន្ធូរបន្ថយភាពតានតឹង ជុំវិញជម្លោះដណ្តើមប្រជុំកោះនេះ។ ក៏ប៉ុន្តែ ក្នុងពេលជាមួយគ្នា អាមេរិកក៏បានព្រមានចិនផងដែរ កុំឲ្យប្រើកម្លាំងបាយ ការគំរាមកំហែង ឬការចាត់វិធានការជាឯកតោភាគីណាមួយផ្សេងទៀត ដែលអាចធ្វើឲ្យមានអស្ថិរភាព នៅក្នុងតំបន់។
អ្នកវិភាគមួយចំនួនបានលើកឡើងថា នៅក្នុងជំនួបជាមួយនឹងលោកស្ហ៊ីនហ្សូ អាបេ នៅពេលនេះ នៅក្នុងសេចក្តីថ្លែងការណ៍ជាសាធារណៈ លោកអូបាម៉ាទំនងជានឹងបង្ហាញនូវជំហរច្បាស់ៗគាំទ្រជប៉ុន ហើយក៏ប្រហែលជាអាចនឹងថ្លែងព្រមានចិនដែរ។ ក៏ប៉ុន្តែ នៅក្នុងជំនួបជាឯកជន លោកអូបាម៉ា ប្រហែលជានឹងជំរុញឲ្យលោកអាបេ មានការប្រយ័ត្នប្រយែងខ្លាំង ក្នុងជម្លោះជាមួយចិន ដោយធ្វើយ៉ាងណាចៀសវាងកុំធ្វើឲ្យភាពតានតឹងបច្ចុប្បន្ននេះ កើនឡើងថែមទៀត។
លោកអូបាម៉ាបានដាក់ចេញនូវនយោបាយការបរទេសថ្មីមួយ ដោយផ្តោតអាទិភាពចម្បងទៅលើតំបន់អាស៊ីប៉ាស្ហ៊ីហ្វិក ដើម្បីប្រជែងដណ្តើមឥទ្ធិពលជាមួយចិន ក៏ប៉ុន្តែ ក្នុងពេលជាមួយគ្នា អាមេរិកក៏មិនចង់មានជម្លោះជាមួយនឹងចិនដែរ ដោយសារតែអាមេរិកត្រូវការចិន នៅក្នុងវិស័យសេដ្ឋកិច្ច និងពាណិជ្ជកម្ម ព្រមទាំងក្នុងសំណុំរឿងអន្តរជាតិធំៗជាច្រើនទៀត ជាពិសេស សំណុំរឿងនុយក្លេអ៊ែរកូរ៉េខាងជើង និងអ៊ីរ៉ង់ ដែលកំពុងតែចោទឡើងខ្លាំង នៅពេលនេះ។
ក្រៅពីចង់ឲ្យជប៉ុនបន្ធូរបន្ថយភាពតានតឹងជាមួយចិន អាមេរិកក៏កំពុងតែព្យាយាមផងដែរ ជំរុញឲ្យជប៉ុនរកដំណោះស្រាយបន្ធូរបន្ថយភាពតានតឹងជាមួយនឹងកូរ៉េខាងត្បូង ដែលជាប្រទេសសម្ព័ន្ធមិត្តដ៏សំខាន់មួយដែររបស់អាមេរិក។ ជប៉ុន និងកូរ៉េខាងត្បូង កំពុងតែមើលមុខគ្នាមិនចំ ដោយសារតែជម្លោះដណ្តើមប្រជុំកោះគ្នានោះផង និងដោយសារតែស្នាមរបួសចាស់ ដែលបន្សល់ទុកពីអតីតកាលនោះផង ដែលកូរ៉េត្រូវរងគ្រោះ ដោយសារនយោបាយវាតទីនិយមរបស់ជប៉ុន។
ទីប្រឹក្សាទទួលបន្ទុកកិច្ចការអាស៊ីរបស់លោកអូបាម៉ាបានបញ្ជាក់ថា លោកអូបាម៉ាចង់ឲ្យជប៉ុន និងកូរ៉េខាងត្បូង រកវិធីធ្វើយ៉ាងណាផ្សះផ្សារស្នាមរបួសចាស់នេះ។
សមាជិកសភាពីររូបមកពីគណបក្សប្រជាធិបតេយ្យជាមួយនឹងលោកអូបាម៉ាក៏បានអំពាវនាវផងដែរឲ្យរដ្ឋាភិបាលជប៉ុនធ្វើការគិតគូរឡើងវិញ អំពីការថ្លែងសុំទោស ចំពោះទង្វើពីអតីតកាលរបស់ខ្លួនទៅលើប្រទេសជិតខាង ពីព្រោះថា ការសុំទោសនេះ គឺអាចមានឥទ្ធិពលជាវិជ្ជមានដ៏សំខាន់ ទៅលើសម្ព័ន្ធភាពអាមេរិក ជប៉ុន និងកូរ៉េខាងត្បូង។
និយាយជារួមទៅ អាមេរិកចង់ឲ្យជប៉ុន និងកូរ៉េខាងត្បូងសះជានឹងគ្នា ដើម្បីឲ្យប្រទេសសម្ព័ន្ធមិត្តទាំងពីរនេះជួយជាកម្លាំងដល់អាមេរិក ក្នុងការប្រជែងដណ្តើមឥទ្ធិពលជាមួយចិន នៅក្នុងតំបន់អាស៊ីប៉ាស្ហ៊ីហ្វិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ