ការនាំចេញរបស់ជប៉ុនកើនឡើង តែឩនភាពជញ្ជីងពាណិជ្ជកម្មក៏កើនឡើងជិតទ្វេដង
ចុះផ្សាយនៅថ្ងៃ៖
ស្តាប់ - ០៥:៥១
តួលេខផ្លូវការរបស់ជប៉ុន ចេញផ្សាយនៅថ្ងៃចន្ទនេះបង្ហាញថា កាលពីខែកក្កដាកន្លងទៅនេះ ការនាំចេញរបស់ជប៉ុនមានការកើនឡើងខ្ពស់បំផុតមិនធ្លាប់មាន ក្នុងរយៈពេល ៣ឆ្នាំចុងក្រោយនេះ។ ក៏ប៉ុន្តែ ក្នុងពេលជាមួយគ្នា ឩនភាពជញ្ជីងពាណិជ្ជកម្មក្រៅប្រទេសរបស់ជប៉ុន នៅតែកើនឡើងខ្លាំង គឺកើនឡើងស្ទើរតែទ្វេដង បើធៀបនឹងឆ្នាំមុន។
សំណួរ-តើមកពីមូលហេតុអ្វី ដែលធ្វើឲ្យឩនភាពជញ្ជីងពាណិជ្ជកម្មរបស់ជប៉ុនមានការកើនឡើងខ្ពស់នៅពេលនេះ?
បញ្ហាក្នុងសេដ្ឋកិច្ចជប៉ុនពេលនេះ គឺនៅត្រង់ថា ការនាំចេញមានការកើនឡើងខ្លាំង ក៏ប៉ុន្តែ ក្នុងពេលជាមួយគ្នា ការនាំចូលក៏កើនឡើងខ្លាំងដែរ ហើយថែមទាំងកើនឡើងលឿនជាងការនាំចេញទៅទៀត។ យោងតាមតួលេខ ដែលចេញផ្សាយដោយរដ្ឋាភិបាលជប៉ុន នៅថ្ងៃចន្ទនេះ ការនាំចេញរបស់ជប៉ុន កាលពីខែកក្កដាកន្លងទៅនេះ មានការកើនឡើង ១២,២% ធៀបនឹងឆ្នាំមុន ហើយការនាំចូលវិញ កើនឡើងរហូតដល់ទៅ ១៩,៦%។
ហេតុដូច្នេះហើយបានជាជញ្ជីងពាណិជ្ជកម្មក្រៅប្រទេសរបស់ជប៉ុនមានឱនភាពខ្លាំង រហូតដល់ទៅ ១០,៥ពាន់លានដុល្លារអាមេរិក។
សំណួរ-តើហេតុអ្វីបានជាការនាំចូលរបស់ជប៉ុនមានការកើនឡើងខ្ពស់បែបនេះ?
ការកើនឡើងនៃការនាំចូលរបស់ជប៉ុន ក៏ដូចជាការកើនឡើងនៃការនាំចេញដែរ មានមូលហេតុតែមួយ គឺការធ្លាក់ចុះនៃតម្លៃលុយយេនជប៉ុន។ យើងឃើញស្រាប់ហើយថា តាំងពីដើមឆ្នាំ២០១៣នេះមក តម្លៃលុយយេនបានធ្លាក់ចុះ រហូតដល់ទៅ ២៥% បើធៀបនឹងលុយដុល្លារអាមេរិក។
នៅពេលដែលតម្លៃលុយយេនធ្លាក់ចុះ វាធ្វើឲ្យទំនិញជប៉ុនមានការងាយស្រួលក្នុងការប្រកួតប្រជែង នៅលើទីផ្សារអន្តរជាតិ។ ការនាំចេញរបស់ជប៉ុនក៏មានការកើនឡើង។ ក៏ប៉ុន្តែ ក្នុងពេលជាមួយគ្នា កាលណាតម្លៃលុយយេនធ្លាក់ចុះ វាក៏ធ្វើឲ្យតម្លៃទំនិញ ដែលជប៉ុននាំចូលពីក្រៅប្រទេសមានការកើនឡើងដែរ ជាពិសេស គឺការនាំចូលផ្នែកថាមពល ដូចជា ប្រេងឆៅ និងធ្យូងថ្ម ជាដើម ព្រមទាំងការនាំចូលវត្ថុធាតុដើមផ្សេងទៀត។
ចាប់តាំងពីមានគ្រោះថ្នាក់ នៅមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ាមក ជប៉ុនបានផ្អាកដំណើរការរោងចក្រអគ្គិសនី ដើរដោយថាមពលនុយក្លេអ៊ែរទាំងអស់។ ដើម្បីបានថាមពលអគ្គិសនីផ្គត់ផ្គង់តម្រូវការក្នុងស្រុក ជប៉ុនត្រូវបង្កើនការផលិតអគ្គិសនីតាមលក្ខណៈជាប្រពៃណី គឺតាមរយៈរោងចក្រអគ្គិសនីដើរដោយប្រេង ឬធ្យូងថ្ម។
យើងដឹងស្រាប់ហើយថា ធនធានអស់ទាំងនេះ មិនមាននៅក្នុងស្រុកជប៉ុនទេ។ ជប៉ុនចាំបាច់ត្រូវបង្កើនការនាំចូលវត្ថុធាតុដើម សម្រាប់ផលិតថាមពលអស់ទាំងនេះមកពីក្រៅប្រទេស។ ដូច្នេះ បរិមាណនៃការនាំចូលក៏មានការកើនឡើង ហើយក្នុងពេលជាមួយគ្នា តម្លៃនៃការនាំចូលក៏មានការកើនឡើងខ្លាំងដែរ ពីព្រោះថា នៅក្នុងទីផ្សារអន្តរជាតិ វត្ថុធាតុដើមអស់ទាំងនេះ គឺត្រូវគិតជាដុល្លារអាមេរិក ហើយដោយសារតែលុយយេនមានតម្លៃថោកធៀបនឹងលុយដុល្លារអាមេរិក មានន័យថា សម្រាប់ជប៉ុន ការចំណាយ ដើម្បីនាំចូលវត្ថុធាតុដើម សម្រាប់ផលិតថាមពលនេះ ត្រូវកើនឡើងខ្លាំង។
សំណួរ-តើការកើនឡើងនៃឩនភាពជញ្ជីងពាណិជ្ជកម្មក្រៅប្រទេសនេះ អាចនឹងធ្វើឲ្យមានការប៉ះពាល់អ្វីខ្លះដល់នយោបាយសេដ្ឋកិច្ចរបស់លោកស្ហ៊ីនហ្សូ អាបេ? តើវាអាចជំរុញឲ្យរដ្ឋាភិបាលជប៉ុនធ្វើការផ្លាស់ប្តូរនយោបាយសេដ្ឋកិច្ចនេះដែរឬទេ?
បើតាមមើលទៅ ការកើនឡើងនៃឩនភាពជញ្ជីងពាណិជ្ជកម្មក្រៅប្រទេសនេះ ប្រហែលជាមិនធ្វើឲ្យលោកស្ហ៊ីនហ្សូ អាបេ ផ្លាស់ប្តូរនយោបាយសេដ្ឋកិច្ចរបស់លោកនោះទេ ពីព្រោះថា គោលដៅចម្បងបំផុតរបស់លោកស្ហ៊ីនហ្សូ អាបេ នៅក្នុងរយៈពេលខ្លី គឺធ្វើយ៉ាងណា ជំរុញឲ្យមានកំណើនសេដ្ឋកិច្ច ហើយមធ្យោបាយគន្លឹះ ដើម្បីសម្រេចគោលដៅនេះ គឺការបញ្ចុះថ្លៃលុយយេន ដើម្បីជំរុញវិស័យនាំចេញ ដែលជាចលករដ៏សំខាន់មួយ នៃកំណើនសេដ្ឋកិច្ចជប៉ុន។ នៅពេលដែលការនាំចេញកើនឡើង សកម្មភាពផលិត នៅក្នុងប្រទេសជប៉ុនក៏កើនឡើង ហើយសេដ្ឋកិច្ចក៏មានកំណើន។
ម្យ៉ាងទៀត ដោយសារតែលុយយេនមានតម្លៃថោកធៀបនឹងលុយដុល្លារ ក្រុមហ៊ុនជប៉ុន មិនត្រឹមតែអាចបង្កើនបរិមាណនាំចេញទេ។ ផលចំណេញពីការនាំចេញក៏មានការកើនឡើងដែរ។ រដ្ឋាភិបាលរបស់លោកស្ហ៊ីនហ្សូ អាបេ រំពឹងថា នៅពេលទទួលបានផលចំណេញច្រើន ក្រុមហ៊ុននឹងយកលុយចំណេញនេះមកធ្វើការវិនិយោគបន្ថែម ដើម្បីបង្កើនមុខជំនួញ ជ្រើសរើសបុគ្គលិកបន្ថែម ហើយប្រាក់ខែរបស់និយោជិតក៏អាចកើនឡើង។ ទាំងអស់នេះ វាធ្វើឲ្យប្រជាជនជប៉ុនទូទៅចាប់ផ្តើមមានទំនុកចិត្ត និងមានសុទិដ្ឋិនិយមលើស្ថានភាពសេដ្ឋកិច្ចជាតិ ហើយនាំគ្នាបង្កើនការចំណាយ។ ការចំណាយលើទីផ្សារក្នុងស្រុកកើនឡើង គឺជាកម្លាំងចលករដ៏សំខាន់មួយទៀត ដើម្បីជំរុញកំណើនសេដ្ឋកិច្ច សម្រាប់រយៈពេលវែង។
ដូច្នេះ បើនិយាយជាសង្ខេប គោលគំនិតរួម នៃនយោបាយសេដ្ឋកិច្ចរបស់លោកស្ហ៊ីនហ្សូ អាបេ គឺ ចេញពីការបញ្ចុះថ្លៃលុយយេន ជប៉ុនអាចជំរុញការនាំចេញ ដែលជាកម្លាំងចលករមួយនៃកំណើនសេដ្ឋកិច្ច។ បន្ទាប់មកទៀត នៅពេលដែលឃើញសេដ្ឋកិច្ចងើបឡើងវិញ ប្រជាជន និងក្រុមហ៊ុនជប៉ុនក៏ចាប់ផ្តើមមានទំនុកចិត្តលើសេដ្ឋកិច្ច ហើយនាំគ្នាបង្កើនការចំណាយ (ទាំងការចំណាយទូទៅប្រចាំថ្ងៃ និងការចំណាយទៅលើការវិនិយោគ) ដែលជាកម្លាំងចលករមួយទៀត នៃកំណើនសេដ្ឋកិច្ច សម្រាប់រយៈពេលវែង។
ចាប់តាំងពីលោកស្ហ៊ីនហ្សូ អាបេ ដាក់ចេញនយោបាយសេដ្ឋកិច្ចថ្មីមក គេឃើញថា ការនាំចេញក៏មានការកើនឡើង សេដ្ឋកិច្ចក៏ចាប់ផ្តើមមានកំណើនឡើងវិញ ហើយតម្រូវការទីផ្សារក្នុងស្រុកជប៉ុន ក៏មានការកើនឡើង (ជិត ៣% កាលពីក្នុងត្រីមាសទី១ ឆ្នាំ២០១៣) មានន័យថា អ្វីៗបានកើតឡើងស្របទៅតាមការរំពឹងចង់បានរបស់លោកស្ហ៊ីនហ្សូ អាបេ។ ដូច្នេះ បើទោះបីជាឩនភាពជញ្ជីងពាណិជ្ជកម្មក្រៅប្រទេសមានការកើនឡើងខ្លាំងក៏ដោយ គេមិនរំពឹងថា លោកនឹងផ្លាស់ប្តូរនយោបាយសេដ្ឋកិច្ចនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ