ចំនួនកម្មករកាត់ដេរក្មេងៗកើនឡើង ប៉ុន្តែកម្មករកាត់ដេរមានជំនាញចាកចេញ
តំណាងសហជីពនៅក្នុងប្រទេសកម្ពុជាបាននិយាយថា ចំនួនរោងចក្រ និងកម្មករកាត់ដេរនៅក្នុងប្រទេសកម្ពុជាមានការកើនឡើងយ៉ាងច្រើន បើប្រៀបធៀបទៅនឹងឆ្នាំមុនៗ ពោលគឺចំនួនកម្មករកាត់ដេរកើនឡើងពីជាង៣សែននាក់មកដល់ជិត៦សែននាក់នាពេលបច្ចុប្បន្ននេះ។ ចំនួនកម្មករកាត់ដេរក្មេងៗកើនឡើងមែន ប៉ុន្តែចំនួនកម្មករកាត់ដេរដែលមានជំនាញ មានបទពិសោធន៍បានចាកចេញពីវិស័យកាត់ដេរ ដោយសារប្រាក់ខែតិច។
ចុះផ្សាយនៅថ្ងៃ៖
ស្តាប់ - ០២:២៥
ស្ថានភាពវិស័យកាត់ដេរទូទៅនៅក្នុងប្រទេសកម្ពុជាសម្រាប់ឆ្នាំ២០១២ ២០១៣ និង៥ឆ្នាំបន្តទៅទៀតមានសុខភាពល្អជាធម្មតា។ ប៉ុន្តែកម្មករទេដែលប្រឈមនឹងការរស់នៅដ៏លំបាកលំបិនដោយសារតែប្រាក់បៀវត្សរ៍តិចតួចស្តួចស្តើង។ នេះគឺជាការអះអាងបញ្ជាក់របស់លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកាត់ដេរកម្ពុជា។ លោក អាត់ ធន់ គ្រោងនឹងជួបប្រជុំជាមួយតំណាងរាជរដ្ឋាភិបាលនៅថ្ងៃទី២១ ខែមករាឆ្នាំ២០១៣ខាងមុខនេះដើម្បីពិភាក្យាគ្នាអំពីការដំឡើងប្រាក់ខែអប្បបរមាជូនកម្មករវិស័យកាត់ដេរ។ បើយោងតាមលោក អាត់ ធន់ ចាប់តាំងពីចុងឆ្នាំ២០១២រហូតមកដល់ពេលនេះ រោងចក្រកាត់ដេរសម្លៀកបំពាក់ និងស្បែកជើងបានមកបណ្តាក់ទុនកាន់តែច្រើនឡើងនៅក្នុងប្រទេសក្រីក្រកម្ពុជា។ ជាក់ស្តែង សម្រាប់ពេលបច្ចុប្បន្ននេះ វិស័យកាត់ដេរមានរោងចក្រចំនួនជាង៧០០ និងមានកម្មករប្រមាណជា៦សែននាក់ ពោលគឺមានការកើនឡើងជាង១ភាគបីនៃចំនួនកម្មករកាលពីឆ្នាំកន្លងមក។
ចំនួនកម្មករកើនឡើងមិនបានធ្វើអោយលោក អាត់ ធន់ សប្បាយចិត្តទេ។ មិនសប្បាយចិត្តពីព្រោះតែប្រាក់ខែនៅមានកម្រិតទាប ហើយដោយសារតែប្រាក់កម្រៃទាបនេះ កម្មករមានបទពិសោធន៍ និងមានជំនាញពិតប្រាកដបានចាកចេញជាបណ្តើរៗពីវិស័យកាត់ដេរទៅកាន់វិស័យផ្សេងទៀត ដូចជាវិស័យកម្សាន្ត ឬឆ្លងដែនខុសច្បាប់ទៅកាន់ប្រទេសផ្សេង។ លោកអាត់ ធន់ ប្រធានសម្ព័ន្ធសហជីពប្រជាធិបតេយ្យកាត់ដេរកម្ពុជាបានពន្យល់ថា ចំនួនកម្មករកាត់ដេរមានការកើនឡើងមែនប៉ុន្តែពួកគេភាគច្រើនជាកម្មករវ័យក្មេង ធ្វើការនៅក្នុងរោងក្រកាត់ដេរមិនផ្លូវការ។ គួរកត់សម្គាល់ថា ក្នុងរយៈពេលចុងក្រោយនេះ រោងចក្រកាត់ដេរជាច្រើន ក្នុងគោលបំណងគេចចេញពីកាតព្វកិច្ចផ្សេងៗបានជួលសិប្បកម្មកាត់ដេរតូចៗមិនផ្លូវការអោយដេរបន្ត។
ការធ្វើយ៉ាងនេះអាចអនុញ្ញាតអោយថៅកែអាចចំណេញបានខ្លះមែន។ ប៉ុន្តែលោក អាត់ ធន់ បានពន្យល់ថា ការធ្វើយ៉ាងដូច្នេះវាអាចរុញច្រានអោយវិស័យកាត់ដេរខ្មែរពិបាកប្រកួតប្រជែងជាមួយប្រទេសដទៃទៀត។ កម្មករថ្មី វ័យក្មេង មិនអាចដេរដូចកម្មករវ័យចំណាស់ និងមានបទពិសោធន៍យូរឆ្នាំនោះទេ។ លោក អាត់ ធន់ បានមានប្រសាសន៍ថា មានតែការដំឡើងប្រាក់ខែអប្បបរមាពី៦១ដុល្លារដល់១៥០ដុល្លារអាមេរិកប៉ុណ្ណោះដែលអាចដោះស្រាយវិបត្តិកម្មករ-និយោជិតនៅក្នុងវិស័យកាត់ដេរបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ