សហជីពសេរីកម្មករគំរាមធ្វើកូដកម្មទ្រង់ទ្រាយធំក្នុងខែសីហានេះ
តំណាងសហជីពសេរីកម្មករមកពី ៣៥ រោងចក្របានជួបប្រជុំគ្នានៅព្រឹកមិញនេះនៅទីក្រុងភ្នំពេញដើម្បីទាមទារឲ្យថៅកែដំឡើងប្រាក់ធ្វើដំណើរនិងថ្លៃស្នាក់នៅរបស់កម្មករឲ្យបាន ១៥ដុល្លារ និងប្រាក់រង្វាន់ការងារទៀងទាត់ឲ្យបានសមស្របជាងសព្វថ្ងៃ។ សហជីពសេរីកម្មករបានគំរាមថា នឹងធ្វើកូដកម្មទ្រង់ទ្រាយធំទូទាំងប្រទេសក្នុងខែសីហានេះ ប្រសិនបើថៅកែមិនដោះស្រាយជូនពួកគេទេនោះ។ ចំណែកថៅកែរោងចក្រវិញបានព្រមានអំពីការបិទរោងចក្រដោយសារតែបាតុកម្ម និងកូដកម្មខុសច្បាប់របស់កម្មករ។
ចុះផ្សាយនៅថ្ងៃ៖
ស្តាប់ - ០២:១៦
សហជីពសេរីកម្មករនៃព្រះរាជាណាចក្រកម្ពុជារបស់លោក ជា មុនី កំពុងតែបន្តដាក់សម្ពាធទៅលើថៅកែរោងចក្រដើម្បីឲ្យផ្តល់ផលប្រយោជន៍ផ្សេងៗដល់កម្មករក្នុងវិស័យកាត់ដេរសម្លៀកបំពាក់និងស្បែកជើងឲ្យបានសមស្រប។ នៅក្នុងកិច្ចប្រជុំជាមួយតំណាងសហជីពជាង១០០ នាក់មកពី ៣៥ រោងចក្រដែលបានបើកធ្វើនៅព្រឹកថ្ងៃអាទិត្យនេះនៅឯទីស្នាក់ការសហជីព ក្នុងទីក្រុងភ្នំពេញ លោក ជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជាបានសម្តែងការមិនពេញចិត្តចំពោះសេចក្តីសម្រេចរបស់ក្រុមប្រឹក្សាការងារ។
ក្រុមប្រឹក្សាការងារបានសម្រេចកាលពីថ្ងៃទី១១ខែកក្កដាដោយផ្តល់ប្រាក់ថ្លៃធ្វើដំណើរ និងថ្លៃស្នាក់នៅសរុប ៧ ដុល្លារដល់កម្មករម្នាក់ៗ ខណៈដែលសហជីពបានទាមទាររហូតដល់ ១៥ដុល្លារ។ ចំណែកប្រាក់រង្វាន់ការងារទៀងទាត់វិញ ក្រុមប្រឹក្សានេះបានសម្រេចផ្តល់ឲ្យកម្មករម្នាក់១០ ដុល្លារក្នុងមួយខែ ប៉ុន្តែ សហជីពទាមទារលើសពីនេះ។
លោក ជា មុនី បានដាក់លិខិតមួយច្បាប់ទៅសមាគមថៅកែរោងចក្រកាត់ដេរកម្ពុជាហៅកាត់ថា GMAC កាលពីថ្ងៃទី ១៨ កក្កដា ដើម្បីសុំបើកការចរចាជាថ្មីអំពីបញ្ហានេះ ប៉ុន្តែ នៅមិនទាន់មានចម្លើយតបវិញនៅឡើយទេ។ សហជីពសេរីកម្មករបានព្រមានថានឹងធ្វើកូដកម្មទ្រង់ទ្រាយធំទូទាំងប្រទេសមួយនៅក្នុងអំឡុងខែសីហាខាងមុខនេះដោយមានកម្មករជាង ៤០ ម៉ឺននាក់ចូលរួមក្នុងករណីដែលការទាមទាររបស់ពួកគេមិនត្រូវបានដោះស្រាយទេនោះ។ នេះបើយោងតាមការប្រកាសឲ្យដឹងរបស់លោក ជា មុនី បន្ទាប់ពីកិច្ចប្រជុំជាមួយតំណាងសហជីពកាលពីព្រឹកមិញ។
តំណាងសមាគមថៅកែរោងចក្រកាត់ដេរមិនអាចទាក់ទងសុំការពន្យល់បានទេនៅថ្ងៃនេះ។ ប៉ុន្តែ លោក វ៉ាន់ ស៊ូអៀង ប្រធានសមាគមថៅកែរោងចក្រកាត់ដេរកម្ពុជាធ្លាប់បានត្អូញត្អែរយ៉ាងខ្លាំងអំពីការលំបាកក្នុងវិស័យកាត់ដេរសម្លៀកបំពាក់ និងស្បែកជើងនៅកម្ពុជា ដែលជាវិស័យអាទិភាពមួយដ៏សំខាន់សម្រាប់ទ្រទ្រង់សេដ្ឋកិច្ចជាតិ។ លោកបានព្រមានថា រោងចក្រជាច្រើនអាចនឹងបិទទ្វារដោយសារតែការរំខានដោយបាតុកម្ម និងកូដកម្មខុសច្បាប់ច្រើនពេក។
យ៉ាងណាក៏ដោយ ក្រុមសហជីពកម្មករបានស្តីបន្ទោសថៅកែរោងចក្រថាមិនបានយកចិត្តទុកដាក់អំពីជីវភាពរបស់កម្មករឲ្យបានគ្រប់គ្រាន់ឡើយ ហើយនេះគឺជាបុព្វហេតុដែលនាំឲ្យមានបាតុកម្ម និងកូដកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ