ប្រមុខការទូតអាមេរិក ជំរុញអាស៊ីអាគ្នេយ៍ឲ្យប្រឹងប្រែងថែមទៀត ប្រឆាំងនឹងអង្គការរដ្ឋអ៊ីស្លាម
ប្រមុខការទូតអាមេរិក លោកចន ឃែរី បានអញ្ជើញទៅដល់ប្រទេសឥណ្ឌូនេស៊ី នៅថ្ងៃចន្ទនេះ ដើម្បីចូលរួមពិធីស្បថឡើងកាន់តំណែង របស់ប្រធានាធិបតីថ្មីឥណ្ឌូនេស៊ី គឺលោកចូកូ វីដូដូ Joko Widodo។ វត្តមានប្រមុខការទូតអាមេរិក នៅក្នុងអាស៊ីអាគ្នេយ៍ពេលនេះ មានបំណងសំខាន់មួយទៀតដែរ គឺដើម្បីជំរុញប្រជាជាតិទាំង១០នេះ ឲ្យខិតខំប្រឹងប្រែងបន្ថែមទៀត ប្រឆាំងនឹងអង្គការរដ្ឋអ៊ីស្លាមជីហាត នៅស៊ីរី និងអ៊ីរ៉ាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
លោកចន ឃែរី ស្ថិតនៅក្នុងចំណោមឥស្សរជនជាន់ខ្ពស់ជាច្រើនរូប ដែលបានអញ្ជើញទៅដល់ទីក្រុងចាកាតា ដើម្បីចូលរួមពិធីស្បថឡើងកាន់តំណែងរបស់លោក ចូកូ វីដូដូ។ លោកវីដូដូ ជាអតីតអ្នកនាំចេញគ្រឿងសង្ហារឹម គ្មានប្រវត្តិនៅក្នុងវិស័យយោធានិងនយោបាយ ដែលបានជាប់ឆ្នោតយ៉ាងប្រផិតប្រផើយ ក្លាយទៅជាប្រមុខដឹកនាំប្រទេសប្រកាន់លទ្ធិប្រជាធិបតេយ្យធំជាងគេទី៣របស់ពិភពលោក នៅក្នុងការបោះឆ្នោតប្រធានាធិបតីកាលពីខែកក្កដាកន្លងទៅ។
នៅក្នុងដំណើរទស្សនកិច្ចរយៈពេល១ថ្ងៃ ប្រមុខការទូតអាមេរិក នឹងចូលរួមកិច្ចប្រជុំទ្វេភាគីជាស៊េរី ជាមួយលោកវីដូដូ និងថ្នាក់ដឹកនាំកំពូលនៃប្រទេសជាសមាជិកប្រជាជាតិអាស៊ានផ្សេងទៀត ដូចជា នាយករដ្ឋមន្ដ្រីម៉ាឡេស៊ី លោកណាជីព រ៉ាហ្សាក់ នាយករដ្ឋមន្ដ្រីសឹង្ហបុរី លោកលី សៀន ឡង ព្រះមហាក្សត្រនៃប្រទេសប្រ៊ុយណេ និងប្រមុខការទូតហ្វីលីពីន លោកអាល់ប៊ឺត រ៉ូស្សារីយ៉ូ ជាដើម។
យោងតាមមន្រ្តីជាន់ខ្ពស់នៃក្រសួងការបរទេសអាមេរិក នៅក្នុងជំនួបជាមួយមេដឹកនាំនៅអាស៊ីអាគ្នេយ៍នេះ លោកចន ឃែរី នឹងផ្តោតជាអាទិភាពលើការជំរុញបណ្តាប្រទេសទាំងនេះឲ្យខិតខំប្រឹងប្រែងបន្ថែមទៀត ប្រឆាំងនឹងការគម្រាមកំហែងរបស់អង្គការរដ្ឋអ៊ីស្លាមជីហាត។ អង្គការរដ្ឋអ៊ីស្លាមជីហាត ដែលសហគមន៍អន្ដរជាតិព្រួយបារម្ភថា អាចក្លាយទៅជាកន្លែងប្រមូលផ្ដុំគ្នារបស់ពួកជ្រុលនិយមនានានៅក្នុងតំបន់។ សហគមន៍អន្ដរជាតិព្រួយបារម្ភជាពិសេសអំពីប្រទេសឥណ្ឌូនេស៊ី ដែលជាប្រទេសមានប្រជាជនកាន់សាសនាមូស្លីមច្រើនជាងគេបង្អស់នៅលើពិភពលោក និងដែលមានពលរដ្ឋមិនតិចរយនាក់ទេ ដែលបានចូលរួមជាមួយរដ្ឋអ៊ីស្លាមកាលីហ្វា នៅប្រទេសអ៊ីរ៉ាក់ និងស៊ីរី។
ក្រៅពីបញ្ហារដ្ឋអ៊ីស្លាម សំណុំរឿងជម្លោះដែនទឹកនៅសមុទ្រចិនខាងត្បូង បញ្ហាប្រែប្រួលអាកាសធាតុ និងការរាតត្បាតនៃមេរោគអេបូឡា ក៏ស្ថិតនៅក្នុងរបៀបវារៈនៃកិច្ចប្រជុំផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ