អ្នកកាសែតម្នាក់ត្រូវបានឃាតករបាញ់សម្លាប់ក្នុងខេត្តក្រចេះ
អ្នកកាសែតម្នាក់នៅខេត្តក្រចេះ ត្រូវបានឃាតករមិនស្គាល់មុខបាញ់សម្លាប់កាលពីម៉ោងជាង១រំលងអធ្រាត្រឈានចូលថ្ងៃទី ១២ ខែតុលានេះ។ ករណីនេះឃាតកម្មនេះ ត្រូវគេសង្ស័យថាបង្កឡើងដោយឈ្មួញរកស៊ីដឹកឈើខុសច្បាប់។ អង្គការសិទ្ធិមនុស្សអាដហុកអំពាវឲ្យអាជ្ញាធរស៊ើបអង្កេតដើម្បីជនដៃដល់មកផ្តន្ទាទោស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៩
អ្នកកាសែតដែលត្រូវបានគេបាញ់សម្លាប់នោះឈ្មោះ លោក តាំង ទ្រី អាយុ៤៩ឆ្នាំ សមាជិកសមាគមអ្នកសារព័ត៌មានខ្មែរប្រជាធិបតេយ្យ និងបម្រើការឲ្យកាសែតក្នុងស្រុកមួយ។ ឃាតកម្មបានកើតឡើងក្នុងភូមិជួរគ្រាំង ឃុំឃ្សឹម ស្រុកស្នួល ខេត្តក្រចេះ។ នេះបើយោងតាមប្រភពព័ត៌មានពីអង្គការអាដហុក ។
តាមរយៈសេចក្តីថ្លែងការណ៍នៅក្នុងទំព័រហ្វេសប៊ុករបស់ខ្លួន អង្គការអាដហុកបានស្រង់ប្រភពព័ត៌មានជាបឋមថា ជនរងគ្រោះនិងអ្នកកាសែតមួយក្រុមទៀតបានទទួលព័ត៌មានពីល្ងាចថា មានករណីដឹកឈើខុសច្បាប់នៅកន្លែងកើតហេតុ ហើយពួកគេក៏នាំគ្នាតាមប្រមាញ់ករណីនេះ។ ប៉ុន្តែ ក្រោយមកពួកគេបានទទួលទូរស័ព្ទថាឈើទាំងនោះជារបស់មន្ត្រីប្រដាប់អាវុធមួយក្រុមហើយសុំឲ្យពួកគេដកថយ។
មិត្តភ័ក្តិរបស់ជនរងគ្រោះក៏បានដកថយវិញ ប៉ុន្តែ ជនរងគ្រោះនៅក្រោយគេដោយសារតែរថយន្តអស់សាំង។ លុះព្រឹកឡើងគេក៏ទទួលដំណឹងថា ជនរងគ្រោះត្រូវបានគេបាញ់សម្លាប់បាត់ទៅហើយ។ អង្គការសិទ្ធិមនុស្សដដែលនេះសង្ស័យថា ករណីនេះអាចបណ្តាលមកពីជនរងគ្រោះបានដឹងពីមុខមាត់របស់អ្នករកស៊ីឈើខុសច្បាប់ហើយត្រូវបានគេសម្លាប់បំបិទមាត់។ អាដហុកបានអំពាវនាវឲ្យអាជ្ញាធរបើកការស៊ើបអង្កេតនិងចាប់ជនដៃដល់មកផ្តន្ទាទោសតាមច្បាប់។
វិទ្យុបារាំងអន្តរជាតិនៅមិនទាន់អាចស្វែងរកប្រភពព័ត៌មានច្បាស់ការផ្សេងទៀតទាក់ទងនឹងបញ្ហានេះមកបំភ្លឺបាននៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ