ក្លឹបអ្នកកាសែតកម្ពុជាថ្កោលទោសការសម្លាប់អ្នកកាសែតអាមេរិក
ក្លឹបអ្នកកាសែតកម្ពុជានៅថ្ងៃព្រហស្បតិ៍នេះបានចេញសេចក្តីថ្លែងការណ៍មួយដោយថ្កោលទោសយ៉ាងខ្លាំងដល់ក្រុមជីហាតនៃរដ្ឋអ៊ីស្លាមដែលបានសម្លាប់អ្នកកាសែតអាមេរិកាំងយ៉ាងសាហាវព្រៃផ្សៃ។ ការថ្កោលទោសនេះបានធ្វើឡើងបន្ទាប់ពីអ្នកកាសែតអាមេរិកកាំងពីរនាក់ត្រូវបានក្រុមនេះសម្លាប់ដោយវិធីកាត់កទាំងរស់ជាបន្តបន្ទាប់ក្នុងរយៈពេលតែពីរសប្តាហ៍ប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០១:៥៦
ការប្រហារជីវិតអ្នកកាសែតអាមេរិកកាំងពីរនាក់យ៉ាងសាហាវព្រៃផ្សៃដោយវិធីកាត់កទាំងរស់ពីសំណាក់ក្រុម ជីហាតនិយមរបស់រដ្ឋអ៊ីស្លាម ISIS កំពុងបង្កឲ្យមានប្រតិកម្មថ្កោលទោសពី គ្រប់ជ្រុងជ្រោយនៃពិភពលោក ក្នុងនោះក្លឹបអ្នកកាសែតកម្ពុជាក៏មិននៅស្ងៀមដែរ។ នៅក្នុង សេចក្តីថ្លែងការណ៍មួយដែលចេញផ្សាយនៅថ្ងៃព្រហស្បតិ៍ទី០៤កញ្ញានេះ ក្លឹបអ្នកកាសែត កម្ពុជាបានថ្កោលទោសនិងបានហៅសកម្មភាពនោះថាជាអំពើយង់ឃ្នងប្រឆាំងមនុស្សជាតិ និងជាការរំលោភសិទ្ធិមនុស្ស និងរំលោភសេរីភាពសារព័ត៌មានដែលមិនអាចអត់ឱនបាន។
សូមបញ្ជាក់ថាអ្នកកាសែតអាមេរិក ឈ្មោះ Steven Sotloff អាយុ ៣១ ឆ្នាំ ត្រូវបានពួកឧទ្ទាមជីហាតចាប់ខ្លួនក្នុងប្រទេសស៊ីរីនិងបានប្រហារជីវិតដោយកាត់កយ៉ាងព្រៃផ្សៃ។ រូបភាពវីដេអូនៃការប្រហារជីវិតអ្នកកាសែតរូបនេះត្រូវបានបង្ហោះតាមប្រព័ន្ធអ៊ិនធឺនែត កាលពីថ្ងៃអង្គារទី២ កញ្ញា។ នេះជាលើកទី២ហើយដែលក្រុមជីហាតបានសម្លាប់អ្នកកាសែតអាមេរិកាំងដោយវិធីសាហាវយង់ឃ្នងបែបនេះបន្ទាប់ពីអ្នកកាសែតអាមេរិកាំងទី១ឈ្មោះ James Foley អាយុ ៤១ឆ្នាំ ត្រូវបានក្រុមនេះចាប់ខ្លួននិងសម្លាប់ដោយវិធីដូចគ្នានេះកាលពីពីរសប្តាហ៍មុន។
ការប្រហារជីវិតអ្នកកាសែតអាមេរិកាំងនេះគឺការសងសឹកចំពោះការវាយប្រហារតាមផ្លូវអាកាសរបស់សហរដ្ឋអាមេរិកទៅលើក្រុមរបស់ជីហាតចាប់តាំងពីពាក់កណ្តាលខែសីហាកន្លងមកនៅភាគខាងជើងប្រទេសអ៊ីរ៉ាក់។ តាមរយៈខ្សែវីដេអូ ពួកឃាតករដៃឆៅក៏បានព្រមានសម្លាប់ចំណាប់ខ្មាំងជនជាតិអង់គ្លេសម្នាក់ទៀត និងបានព្រមានដល់បណ្តាប្រទេសទាំងឡាយណាដែលសហការជាមួយសហរដ្ឋអាមេរិកដើម្បីប្រឆាំងនឹងសកម្មភាពរបស់ក្រុមខ្លួនផងដែរ។
លោកនាយករដ្ឋមន្ត្រី ហ៊ុន សែន ក៏ធ្លាប់បានថ្កោលទោសជាសាធារណៈអំពើសាហាវព្រៃផ្សៃទៅលើអ្នកកាសែតនេះរួចហើយ។ ក្លឹបអ្នកកាសែតកម្ពុជាដែលជាសមាគមអ្នកកាសែតធំជាងគេមួយនៅកម្ពុជាបានអំពាវនាវដល់សហគមន៍អន្តរជាតិ និងដល់មនុស្សជាតិលើពិភពលោកឲ្យចាត់វិធានការគ្រប់បែបយ៉ាងដើម្បីប្រឆាំងនឹងក្រុមជ្រុលនិយមនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ