ក្រសួងយុត្តិធម៌កោះហៅព្រះរាជអាជ្ញាប្រជុំជាបន្ទាន់ពីករណីឆក់ប្លន់ បន្ទាប់ពីលោកហ៊ុន សែនដាក់បញ្ជា
ជាថ្មីម្តងទៀត បន្ទាប់ពីបុរសខ្លាំងកម្ពុជាដាក់បញ្ជាមក ក្រសួងក្រោមឱវាទ បានប្រញ៉ាប់ស្ទុះស្ទារប្រមូលមន្ត្រីរបស់ខ្លួន កោះប្រជុំជាបន្ទាន់ដើម្បីពិនិត្យការងារឡើងវិញ។ កាលពីថ្ងៃទី១៤ ធ្នូម្សិលមិញនេះ លោកអង្គ វង្ស វឌ្ឍានា រដ្ឋមន្ត្រីក្រសួងយុត្តិធម៌ បានចេញលិខិតមួយជម្រាបជូនដល់ព្រះរាជអាជ្ញា នៃអយ្យការអមសាលាដំបូងរាជធានី ខេត្តទាំងអស់ឲ្យចូលរួមកិច្ចប្រជុំបន្ទាន់មួយ ទាក់ទងនឹងចំនួនសំណុំរឿងពាក់ព័ន្ធ នឹងអំពើលួច ឆក់ និងប្លន់ ដែលបានកំពុងតែបង្កអសន្តិសុខយ៉ាងខ្លាំងនៅក្នុងសង្គម នៅទីស្តីការក្រសួងយុត្តិធម៌ នៅថ្ងៃទី១៨ ធ្នូ ខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
បន្ទាប់ពីលោកនាយករដ្ឋមន្ត្រីហ៊ុន សែនអំពាវនាវឲ្យរដ្ឋមន្ត្រីក្រសួងយុត្តិធម៌ពិនិត្យមើលឡើងវិញចំពោះការស្នើលើកលែងទោសដល់ទណ្ឌិតដែលពាក់ព័ន្ធនឹងអំពើឆក់ ប្លន់ និងគ្រឿងញៀនមក លោកអង្គ វង្ស វឌ្ឍានា រដ្ឋមន្ត្រីក្រសួងយុត្តិ ធម៌បានចេញសេចក្តីជូនដំណឹងជាបន្ទាន់ទៅដល់ព្រះរាជអាជ្ញា នៃអយ្យការអមសាលាដំបូងរាជធានីខេត្តទាំងអស់ឲ្យមកប្រជុំជាបន្ទាន់នៅថ្ងៃទី១៨ ធ្នូខាងមុខនេះ នៅឯទីស្តីការក្រសួង ក្នុងទីក្រុងភ្នំពេញ។
លោកអង្គ វង្ស វឌ្ឍានា បានបញ្ជាក់នៅក្នុងសេចក្តីជូនដំណឹងរបស់លោកដែលបានចេញផ្សាយកាលពីថ្ងៃទី១៤ ធ្នូថា ក្រសួងសូមឲ្យព្រះរាជអាជ្ញាទាំងអស់ ធ្វើការប្រមូលទិន្នន័យ និងរាយការណ៍ជូនអង្គប្រជុំអំពីចំនួនសុំណុំរឿងពាក់ព័ន្ធ នឹងអំពើលួច ឆក់ និងប្លន់ ដែលកំពុងស្ថិតក្នុងចំណាត់ការអយ្យការ និងតុលាការ ដែលបានចាត់ការរួច និងដែលទណ្ឌិតត្រូវបានដោះលែងចេញពីពន្ធនាគារ។
សូមរំលឹកជូនថា លោកនាយករដ្ឋមន្ត្រីបានពិនិត្យមើលឃើញថា ជនល្មើសដែលពាក់ព័ន្ធនឹងករណីប្លន់ប្រដាប់អាវុធ និងការជួញដូរគ្រឿងញៀន គឺមានមុខដដែលៗ ដែលត្រូវបានលើកលែងទោសកាលពីពេលកន្លងមក។ ហើយលោកក៏បានបញ្ជាក់ផងដែរថា ការលើកលែងទោសនេះ មិនមែនសំដៅទៅលើទណ្ឌិតពាក់ព័ន្ធនឹងករណីទាំងអស់នោះទេ។
គួរបញ្ជាក់ថាមួយរយៈពេលចុងក្រោយនេះ មានករណីឆក់ ប្លន់ប្រដាប់អាវុធបានកើតមានឡើងស្ទើរតែរៀងរាល់ថ្ងៃ នៅទូទាំងប្រទេសកម្ពុជា បូករួមនិងទីក្រុងភ្នំពេញផងដែរ។ ហើយក៏មានថ្ងៃខ្លះមានរហូតដល់ពីរទៅបីករណីកើតឡើងទៅទូទាំងប្រទេសក្នុងថ្ងៃតែមួយដែរ។ តែបើតាមលោកឧត្តមសេនីយ៍ឯកគាត ចន្ទថារិទ្ធ អ្នកនាំពាក្យអគ្គស្នងការនគរបាលជាតិបានបញ្ជាក់ប្រាប់វិទ្យុបារាំងឲ្យដឹងថា ករណីឆក់ប្លន់ក្នុងឆ្នាំ២០១៥នេះមានចំនួន ២ពាន់៩រយករណី ថយចុះ ជាងឆ្នាំ២០១៤ ចំនួន១០៥ ករណី។ យ៉ាងណាក៏ដោយ ក៏លោកហ៊ុនសែន បានដាក់បញ្ជាឲ្យអាជ្ញាធរគ្រប់លំដាប់ថ្នាក់ទាំងអស់បង្កើតការប្រុងប្រយ័ត្ន និងចេញប្រតិបត្តិការព្រមៗគ្នា ដើម្បីបង្ការនិងបង្ក្រាបចំពោះអំពើឆក់ ប្លន់ប្រដាប់អាវុធ និងអំពើជួញដូរគ្រឿងញៀន ដែលកើតមានឡើងនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ