Karachigate៖ រឿងអាស្រូវពុករលួយដែលជាប់ពាក់ព័ន្ធនឹងមេដឹកនាំកំពូលៗរបស់បារាំង
រឿងអាស្រូវពុករលួយ ដែលគេឲ្យឈ្មោះថា Karachigate បានផ្ទុះឡើងកាន់តែខ្លាំង នៅថ្ងៃព្រហស្បតិ៍ ១៨ វិច្ឆិកា ២០១០នេះ ក្រោយពីឈ្មោះបណ្តាមេដឹកនាំកំពូលៗរបស់បារាំង ក្នុងនោះ មានទាំងលោកនីកូឡា សាកូហ្ស៊ី (Nicolas Sarkozy) ប្រធានាធិបតីបារាំងផង មានជាប់ពាក់ព័ន្ធកាន់តែខ្លាំងឡើង ក្នុងសំណុំរឿងពុករលួយនេះ។ តំណាងរាស្រ្តគណបក្សប្រឆាំងបានទាមទារឲ្យលោកនីកូឡា សាកូហ្ស៊ី ឆ្លើយបំភ្លឺជុំវិញរឿងអាស្រូវនេះ។ ខាងក្រោមនេះ គឺជាសំណួរ-ចម្លើយ ដើម្បីស្វែងយល់អំពីរឿងអាស្រូវនេះ។
ចុះផ្សាយនៅថ្ងៃ៖ កែប្រែថ្ងៃទី៖
ការពន្យល់របស់សេង ឌីណា
តើរឿងអាស្រូវ Karachigate កើតឡើងយ៉ាងដូចម្តេច?
ការ៉ាឈី (Karachi) គឺជាឈ្មោះទីក្រុងរបស់ប៉ាគីស្តង់។ កាលពីថ្ងៃទី៨ ឧសភា ឆ្នាំ២០០២ នៅក្នុងទីក្រុងការ៉ាឈី មានការវាយប្រហារអត្តឃាតលើរថយន្តក្រុងមួយគ្រឿង ដែលវិស្វករតែងតែជិះទៅធ្វើការ នៅក្នុងការដ្ឋានសាងសង់នាវាមុជទឹក។ ការសាងសង់នាវាមុជទឹកនេះ គឺធ្វើឡើង តាមកិច្ចសន្យា ដែលចុះរវាងបារាំង និងប៉ាគីស្តង់ កាលពីឆ្នាំ១៩៩៤។ ភេរវកម្មនេះបានបណ្តាលឲ្យវិស្វករបារាំង ១២នាក់ស្លាប់។
ពីដំបូង អាជ្ញាធរបារាំងបានសន្និដ្ឋានថា អំពើភេរវកម្មនៅការ៉ាឈី គឺជាស្នាដៃរបស់ពួកអាល់កៃដា។ ក៏ប៉ុន្តែ គេមិនឃើញមានក្រុមណាមួយចេញមុខមកទទួលខុសត្រូវលើការវាយប្រហារនេះទេ។ ក្រុមភេរវជនអាល់កៃដា របស់អូសាម៉ា ប៊ិនឡាដិន បានត្រឹមតែអបអរសាទរចំពោះការវាយប្រហារនេះប៉ុណ្ណោះ ប៉ុន្តែ មិនបានប្រកាសទទួលខុសត្រូវនោះទេ។
ដោយហេតុតែក្នុងអំពើភេរវកម្មនេះ មានស្លាប់ជនជាតិបារាំង អាជ្ញាធរបារាំងក៏បានបើកការស៊ើបអង្កេតលើសំណុំរឿងនេះ។
ហេតុអ្វីបានជាការស៊ើបអង្កេតលើអំពើភេរវកម្ម បែរជាចេញទៅជារឿងពុករលួយទៅវិញ?
នៅក្នុងការស៊ើបអង្កេតរឿងនេះ ក្រុមមន្រ្តីស៊ើបអង្កេតបារាំងបានរកឃើញតម្រុយខ្លះ ដែលធ្វើឲ្យគេសង្ស័យថា ការវាយប្រហារលើវិស្វករបារាំង នៅការ៉ាឈី មិនមែនជាស្នាដៃរបស់ពួកភេរវជនទេ ប៉ុន្តែ វាជាប់ពាក់ព័ន្ធនឹងជម្លោះ ជុំវិញលុយកម្រៃជើងសា (កុម្មីស្យុង) នៃកិច្ចសន្យាលក់នាវាមុជទឹក ដែលចុះនៅឆ្នាំ១៩៩៤ រវាងរដ្ឋាភិបាលបារាំង និងរដ្ឋាភិបាលប៉ាគីស្តង់។ ដើម្បីឲ្យយល់ច្បាស់ពីរឿងនេះ យើងគួរត្រឡប់ទៅនិយាយពីរឿងលក់នាវាមុជទឹកនេះបន្តិច។
នៅឆ្នាំ១៩៩៤ បារាំងបានចុះកិច្ចសន្យាសាងសង់នាវាមុជទឹក ៣គ្រឿង ទៅឲ្យប៉ាគីស្តង់ ក្នុងតម្លៃ ៨៥០លានអឺរ៉ូ។ មុននឹងចុះកិច្ចសន្យានេះ ក្រៅពីបារាំង មានប្រទេសផ្សេងទៀត ដែលប្រជែងគ្នាចង់លក់នាវាមុជទឹកទៅឲ្យប៉ាគីស្តង់ដែរ។ បារាំងក៏បានឲ្យឈ្មួញកណ្តាលជួយបញ្ចុះបញ្ចូលរដ្ឋាភិបាល ប៉ាគីស្តង់ឲ្យព្រមទិញនាវាមុជទឹកពីបារាំង ដោយសន្យាថានឹងផ្តល់កុម្មីស្យុងឲ្យ ប្រសិនបើកិច្ចសន្យាលក់នាវានេះអាចធ្វើទៅបាន។
មកទល់ត្រឹមនេះ មិនមានអ្វីខុសច្បាប់នោះទេ ព្រោះថា ការឲ្យកុម្មីស្យុងទៅឈ្មួញកណ្តាល គឺជារឿងដែលគេធ្វើជាទម្លាប់ នៅក្នុងការទិញលក់គ្រឿងសព្វាវុធ។ ក៏ប៉ុន្តែ អ្វី ដែលជាបញ្ហា គឺនៅត្រង់ថា ក្នុងការលក់នាវាមុជទឹកទៅឲ្យប៉ាគីស្តង់នេះ ឈ្មួញកណ្តាលមានច្រើន ហើយគេសង្ស័យថា មានឈ្មួញកណ្តាលខ្លះ ជាមន្រ្តីយោធាប៉ាគីស្តង់។ កុម្មីស្យុងដែលឲ្យទៅឈ្មួញកណ្តាលខ្លះ ប្រហែលជាបានធ្វើឡើងដោយខុសច្បាប់។ គេសង្ស័យថា លុយកុម្មីស្យុងខុសច្បាប់នេះ ត្រូវបានឈ្មួញកណ្តាល និងមន្រ្តីរដ្ឋាភិបាលបារាំងខ្លះ ដែលទទួលបន្ទុកខាងលក់នាវាមុជទឹកនេះ យកទៅចែកគ្នា។
តើការវាយប្រហារភេរវកម្ម នៅការ៉ាឈី មានជាប់ពាក់ព័ន្ធអ្វី ទៅនឹងលុយកុម្មីស្យុងលក់នាវាមុជទឹក?
មួយឆ្នាំក្រោយពីចុះកិច្ចសន្យា ពោលគឺ នៅឆ្នាំ១៩៩៥ ពេលដែលលោកហ្សាក់ ស្ហ៊ីរ៉ាក់ (Jacques Chirac) ជាប់ឆ្នោតជាប្រធានាធិបតី រដ្ឋាភិបាលថ្មីក៏បានដឹងរឿងកុម្មីស្យុងខុសច្បាប់នេះ។ ដោយឃើញថា លុយកុម្មីស្យុងនៅមិនទាន់បានប្រគល់ទៅឲ្យឈ្មួញកណ្តាលអស់ រដ្ឋាភិបាលលោកស្ហ៊ីរ៉ាក់ក៏បានបញ្ជាឲ្យឈប់ផ្ទេរលុយ ដែលនៅសេសសល់ ទៅឲ្យឈ្មួញកណ្តាល។
ហេតុដូច្នេះហើយបានជាគេសង្ស័យថា មន្រ្តីយោធាប៉ាគីស្តង់ ដែលជាឈ្មួញកណ្តាល ហើយដែលមិនបានទទួលលុយកុមីស្យុងតាមការសន្យានេះហើយ ដែលជាអ្នករៀបចំការវាយប្រហារលើវិស្វករបារាំង ដើម្បីជាការសងសឹក។
ហេតុអ្វីបានជារឿងអាស្រូវពុករលួយនេះមានជាប់ពាក់ព័ន្ធដល់លោកនីកូឡា សាកូហ្ស៊ី (Nicolas Sarkozy) ដែលជាប្រធានាធិបតីបច្ចុប្បន្នរបស់បារាំង?
មនុស្សដែលគេសង្ស័យខ្លាំងជាងគេ ក្នុងសំណុំរឿង Karachigate គឺលោកអេឌ័រ បាឡាឌៀរ (Edouard Balladur) ដែលជានាយករដ្ឋមន្រ្តីបារាំង នៅពេលចុះកិច្ចសន្យាលក់នាវាមុជទឹកទៅឲ្យប៉ាគីស្តង់។ លោកបាឡាឌៀរ ក៏ជាបេក្ខជនឈរឈ្មោះក្នុងការបោះឆ្នោតប្រធានាធិបតីផងដែរ នៅឆ្នាំ១៩៩៥។ ដូច្នេះ គេសង្ស័យថា លោកបាឡាឌៀរឃុបឃិតគ្នាជាមួយឈ្មួញកណ្តាល ដើម្បីបានលុយកុម្មីស្យុងមួយផ្នែកមកចាយវាយ ក្នុងយុទ្ធនាការឃោសនាបោះឆ្នោត។
បន្ទាប់មកទៀត ការសង្ស័យបានរាលដាលមកដល់លោកនីកូឡា សាកូហ្ស៊ី ពីព្រោះថា ក្នុងពេលបារាំងចុះកិច្ចសន្យាជាមួយប៉ាគីស្តង់ លោកសាកូហ្ស៊ី គឺជារដ្ឋមន្រ្តីទទួលបន្ទុកថវិកាជាតិ ពោលគឺ ជាអ្នកទទួលខុសត្រូវលើរឿងចុះកិច្ចសន្យាជាមួយនឹងប៉ាគីស្តង់។ ម្យ៉ាងទៀត លោកសាកូហ្ស៊ី គឺជាមនុស្សជំនិតរបស់លោកបាឡាឌួរ នៅក្នុងពេលធ្វើយុទ្ធនាការឃោសនាបោះឆ្នោតប្រធានាធិបតី នៅឆ្នាំ១៩៩៥។
ហេតុអ្វីបានជារឿងអាស្រូវ Karachigate ផ្ទុះឡើងខ្លាំង នៅពេលនេះ?
រឿង Karachigate បានចាប់ផ្ទុះឡើងកាន់តែខ្លាំង កាលពីល្ងាចថ្ងៃពុធ ម្សិលមិញ ក្រោយពីមានលេចធ្លាយព័ត៌មាន ដែលថា ចៅក្រមទទួលបន្ទុកស៊ើបអង្កេតលើសំណុំរឿងនេះ បានកោះហៅ លោកស្ហាល មីយ៉ុង (Charles Millon) អតីតរដ្ឋមន្រ្តីក្រសួងការពារជាតិបារាំង ទៅសួរ។ លោកមីយ៉ុង គឺជារដ្ឋមន្រ្តីក្រសួងការពារជាតិ ដែលឡើងកាន់អំណាច នៅក្រោយការបោះឆ្នោត ឆ្នាំ១៩៩៥ ហើយដែលបានដឹងអំពីលុយកុម្មីស្យុងខុសច្បាប់។ ប្រភពស្និទ្ធនឹងសំណុំរឿង Karachi នេះបានឲ្យដឹងថា នៅចំពោះមុខចៅក្រុមស៊ើបអង្កេត លោកមីយ៉ុង បានឆ្លើយទទួលស្គាល់ថា រឿងចែកលុយកុម្មីស្យុងគ្នាដោយខុសច្បាប់ ក្នុងកិច្ចសន្យាលក់នាវាមុជទឹកទៅឲ្យប៉ាគីស្តង់ គឺពិតជាមានមែន។
ក្រោយពីមានលេចឮព័ត៌មាននេះ សាច់ញាតិវិស្វករបារាំង ដែលស្លាប់នៅក្នុងការវាយប្រហារ នៅការ៉ាឈី ក៏បានទាមទារឲ្យតុលាការកោះហៅលោកសាកូហ្ស៊ី និងឥស្សរជននយោបាយបារាំងមួយចំនួនទៀត ឲ្យទៅឆ្លើយបំភ្លឺជុំវិញសំណុំរឿងនេះ។ ក៏ប៉ុន្តែ តុលាការបារាំងមិនអាចកោះហៅលោកសាកូហ្ស៊ីទៅសួរនាំបានទេ ពីព្រោះគាត់មានអភ័យឯកសិទ្ធិជាប្រធានាធិបតី។
ក្រៅពីនេះ គេក៏បានទាមទារផងដែរឲ្យរដ្ឋាភិបាលបញ្ជូនរាល់ឯកសារទាំងអស់ ដែលទាក់ទងនឹងសំណុំរឿង Karachi នេះ ទៅឲ្យចៅក្រម។ គួរបញ្ជាក់ថា រាល់ឯកសារជុំវិញសំណុំរឿង Karachi ត្រូវបានរដ្ឋាភិបាលដាក់ជាឯកសារសម្ងាត់បំផុត ដែលតុលាការមិនអាចយកទៅមើលបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ