លោកកឹម សុខា ហៅលោកនាយករដ្ឋមន្ត្រីចេញចរចា
នៅថ្ងៃអាទិត្យទី២៩ធ្នូនេះ គណបក្សសង្គ្រោះជាតិបានដង្ហែក្បួនបាតុកម្មមនុស្សរាប់ម៉ឺននាក់របស់ខ្លួនដើម្បីទាមទារឱ្យមានការបោះឆ្នោតឡើងវិញ និងទាមទារឱ្យប្រមុខរដ្ឋាភិបាលចុះចេញពីតំណែង។ ក្នុងអំឡុងពេលដង្ហែក្បួន លោកកឹម សុខា អនុប្រធានគណបក្សសង្គ្រោះជាតិ ដែលឈរលើក្បាលឡានដឹកនាំក្បួនបាតុកម្ម បានប្រកាសឱ្យប្រមុខរដ្ឋាភិបាលកម្ពុជាលោកនាយករដ្ឋមន្ត្រីហ៊ុន សែន ចេញមកចរចា និងស្តាប់ឆន្ទៈរបស់ប្រជាពលរដ្ឋ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
មេដឹកនាំគណបក្សសង្គ្រោះជាតិ ប្រកាសហៅប្រមុខរដ្ឋាភិបាលកម្ពុជា ចេញមកចរចា និងស្តាប់ឆន្ទៈរបស់ពលរដ្ឋ។ កំពុងឈរលើក្បាលឡានដឹកនាំបាតុកម្មប្រវែង៣គីឡូម៉ែត្រ លោក កឹម សុខា អនុប្រធានគណបក្សសង្គ្រោះជាតិ បានប្រកាសតាមម៉េក្រូ ហៅប្រមុខរដ្ឋាភិបាលកម្ពុជា លោកនាយករដ្ឋមន្ត្រីហ៊ុន សែន ចេញមកចរចាដើម្បីដោះស្រាយបញ្ហានាពេលបច្ចុប្បន្ន។
ជាការប្រកាសហៅលោកនាយករដ្ឋមន្ត្រីចំៗតែម្តង នៅចំពោះមុខក្រុមបាតុករ។ ស្ថិតក្នុងសម្លៀកអាវស និងឈរនៅខាងស្តាំដៃរបស់លោក សម រង្ស៊ី លោក កឹម សុខា បានបញ្ជាក់ថាបាតុកម្មនៅថ្ងៃទី២៩ធ្នូនេះ គឺជាមហាបាតុកម្មជាប្រវត្តិសាស្ត្រនៅប្រទេសកម្ពុជាដែលមានប្រជាពលរដ្ឋបានចូលរួមយ៉ាងខុសប្លែកជាងរាល់ដង។
សូមរំលឹកថា ក្នុងមហាបាតុកម្មប្រវែងបីគីឡូម៉ែត្រនេះ ក្រៅពីក្បួនបាតុកម្មរបស់លោក សម រង្ស៊ី និងលោក កឹម សុខានោះ ក៏មានដែរក្បួនឡានដង្ហែក្បួនរបស់លោក ម៉ម សុណង់ដូ ប្រធានវិទ្យុសម្បុកឃ្មុំ និងជាប្រធានសមាគមអ្នកប្រជាធិបតេយ្យ ដែលបានហែហមតាមពីក្រោយ។
ក្នុងកំឡុងពេលក្បួនបាតុកម្មធ្វើដំណើរតាមផ្លូវមួយចំនួនក្នុងក្រុងភ្នំពេញ ដូចជាមហាវិថីមុនីវង្ស និងផ្លូវម៉ៅសេទុងជាដើមនោះ ក្រុមអ្នកចូលរួមបាតុកម្មដែលចូលរួមភាគច្រើនជាយុវជន កម្មករ និងពលរដ្ឋអ្នកស្រុកស្រែចំការផងនោះ បានស្រែកមិនសំចៃមាត់ឡើយ ទាមទារឱ្យមានការបោះឆ្នោតឡើងវិញ និងទាមទារឱ្យលោកនាយករដ្ឋមន្ត្រីហ៊ុន សែន ចុះចេញពីតំណែង។ ក្រៅពីនោះ ក្រុមបាតុករ បានលើកឡើងពីបញ្ហាសង្គមនាពេលបច្ចុប្បន្ន ហើយទម្លាក់កំហុសនៃការទទួលខុសត្រូវទាំងស្រុងទៅលើលោកនាយករដ្ឋមន្ត្រីហ៊ុន សែន។ បញ្ហាទាំងនោះរួមមាន បញ្ហាជនអន្តោប្រវេសន៍វៀតណាម បញ្ហាដីធ្លី និងធនធានធម្មជាតិជាដើម។
យ៉ាងណាក៏ដោយ នៅថ្ងៃទី២៩ធ្នូដែលជាថ្ងៃមហាបាតុកម្មដង្ហែតាមដងផ្លូវរបស់បក្សសង្គ្រោះជាតិនោះ ស្ថាប័នរដ្ឋចំនួន៨នៅថ្ងៃអាទិត្យនេះ ក៏បានប្រឈមនឹងបាតុកម្មផងដែរ។ ស្ថាប័នទាំងនោះរួមមាន ទី១ ទីស្តីការគណៈរដ្ឋមន្ត្រី ទី២ ក្រសួងសេដ្ឋកិច្ច និងហិរញ្ញវត្ថុ ទី៣ ក្រសួងអប់រំ យុវជន និងកីឡា ទី៤ ក្រសួងធម្មការ និងសាសនា ទី៥ ក្រសួងកិច្ចការនារី ទី៦ ក្រុមប្រឹក្សាអភិវឌ្ឍន៍កម្ពុជា ទី៧ សាលារាជធានីភ្នំពេញ និងទី៨ ធនាគារជាតិនៃកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ