ប្រមុខការទូតអាមេរិកចេញធ្វើបេសកកម្មសន្តិភាពនៅអាហ្វ្រិក
ចុះផ្សាយនៅថ្ងៃ៖
ស្តាប់ - ០៤:១៤
លោក ចន ឃែរី John Kerry កំពុងបំពេញទស្សនកិច្ចផ្លូវការមួយជុំនៅអាហ្វ្រិក ជាលើកទីមួយ ក្នុងប្រទេសអេត្យូពី សាធារណរដ្ឋប្រជាធិបតេយ្យកុងហ្កោ និងអង់ហ្កោឡា។ កម្មវត្ថុនៃទស្សនកិច្ចនេះ គឺដើម្បីជំរុញការគោរព “សិទ្ធិមនុស្ស” និងពន្លឿន “សន្តិភាព” ក្នុងតំបន់។ អំពើកាប់សម្លាប់បង្ហូរឈាមរវាងជនជាតិពិន្ទុខុសគ្នា នៅប្រទេសស៊ូដង់ខាងត្បូង ជាវិញ្ញាសាសន្តិភាពជួរមុខ កំពុងរង់ចាំជាស្រេចទទួលលោកប្រមុខការទូតអាមេរិក។
ពូកែខាងធ្វើដំណើរមិនចេះនឿយហត់ លោក ចន ឃែរី បានតម្រង់ទិស លើកនេះទៅអាហ្វ្រិក ដើម្បីរកមើលជើងមេឃថ្មី ព្រោះការចុះឡើងញឹកញយនៅតំបន់ដើមបូព៌ា មិនបានផ្តល់លទ្ធផលល្អ។ ក្នុងនាមជារដ្ឋមន្ត្រីការបរទេស លោកធ្លាប់អញ្ជើញទៅប្រទេសអេត្យូពីម្តង កាលពីខែឧសភា ឆ្នាំ២០១៣ ក្នុងក្របខ័ណ្ឌជំនួបកំពូលសហភាពអាហ្វ្រិក។ គឺទើបតែលើកនេះទេ ដែលជាទស្សនកិច្ចផ្លូវការ។
បេសកកម្មនេះមានកម្មវត្ថុ លើកទឹកចិត្តដល់ការអភិវឌ្ឍន៍ប្រជាធិបតេយ្យ ជំរុញការគោរពសិទ្ធិមនុស្ស និង ពន្លឿនដំណើរការសន្តិភាព ព្រមទាំងសន្តិសុខក្នុងតំបន់។ គឺជាកម្មវិធី ដ៏ធំសម្បើមសម្រាប់ទស្សនកិច្ច ៥ថ្ងៃ។ អ៊ីចឹងសួរថាតើនឹងអាចសម្រេចលទ្ធផលបានប៉ុណ្ណាដែរ ? លទ្ធផលមិនមែនជាថ្ងៃនេះ ឬថ្ងៃស្អែកទេ។
ក្នុងថ្ងៃដំបូង ពេលទៅដល់ក្រុង អាឌី អាបេបា គឺជំនួបចរចាសន្តិភាព ឱ្យជម្លោះជាតិសាសន៍នៅប្រទេសស៊ូដង់ខាងត្បូងដ៏ក្មេងខ្ចី។ នៅចំពោះមុខសមភាគីអេត្យូពី កេនញ៉ា និងអ៊ូហ្កង់ដា លោកប្រមុខការទូតអាមេរិកបានទាមទារគ្រប់គ្នាយល់ពីភាពចាំបាច់នៃការបញ្ឈប់ការកាប់សម្លាប់គ្នា និងបើកច្រកឱ្យអង្គការមនុស្សធម៌ចូល។
អេត្យូពី បានធ្វើជាម្ចាស់ផ្ទះរៀបចំជំនួបចរចាសន្តិភាពឱ្យស៊ូដង់ខាងត្បូង តាំងពីថ្ងៃទី ១៥ធ្នូ ២០១៣មក រវាងក្រុមស្និទ្ធនឹងប្រធានាធិបតីស៊ូដង់ខាងត្បូងកំពុងអ្នកកាន់អំណាច និងក្រុមស្និទ្ធនឹងអតីតប្រធានាធិបតី ដែលជាជាតិពិន្ធុពីរខុសគ្នា និងប្រជែងសម្លាប់គ្នា។
គ្មានទេដំណោះស្រាយតាមផ្លូវយោធា
ការកាប់សម្លាប់គ្នា ដែលបានផ្តាច់ជីវិតមនុស្សរាប់ពាន់នាក់ និងធ្វើឱ្យជនស៊ីវិលរាប់សិបពាន់ ភៀសខ្លួនរកជម្រក គេចពួន ក្នុងមូលដ្ឋានអង្គការសហប្រជាជាតិ ការពារដោយកងទ័ពមួកខៀវ Minuss (បេសកកម្មអង្គការសហប្រជាជាតិប្រចាំស៊ូដង់ខាងត្បូង)។ បទឈប់បាញ់បានត្រូវចុះហត្ថលេខាតាំងពីថ្ងៃទី ២៣មករា មក នៅAddis Abeba នេះ ប៉ុន្តែមានតែលើក្រដាស គ្មាននរណាគោរពតាម។
វត្តមានរបស់លោក ចន ឃែរី គឺជាសារច្បាស់លាស់មួយ ទៅកាន់ភាគីបក្ខដិបក្ខស៊ូដង់ខាងត្បូងទាំងពីរ ថាជាអ្នកទទួលខុសត្រូវលើវិបត្តិនៅស៊ូដង់ខាងត្បូង ប្រសិនបើមិនព្រមបញ្ចប់ការស្អប់ខ្ពើមគ្នាទេ។ ជាមួយនឹងការព្រមានដោយប្រើពាក្យសំដី អាមេរិកក៏បានបញ្ជាក់ថាកំពុងជានឹងប្រើមធ្យោបាយតែមួយដូចនៅធ្លាប់ធ្វើប្រឆាំងនឹងរុស្ស៊ី គឺកំពុងសិក្សាបង្កើតបញ្ជីខ្មៅ ឈ្មោះបុគ្គលមួយចំនួនដែលត្រូវអាមេរិកដាក់ទណ្ឌកម្ម។
សូមបញ្ជាក់ថា ស៊ូដង់ខាងត្បូង អាចកកើត ក្លាយជារដ្ឋឯករាជ្យមួយបាន នៅខែកក្កដា ២០១១ ក៏ព្រោះតែមានការជួយជ្រោមជ្រែងខ្លាំងណាស់ពីសហរដ្ឋអាមេរិក ហេតុដូច្នេះហើយបានវ៉ាស៊ីនតោន តែងដាក់គំនាបកាន់តែច្រើនឡើងលើរដ្ឋដ៏តូច និងក្មេងខ្ចីមួយនេះ កុំឱ្យប្រេះឆា ធ្លាក់ចូលក្នុងភ្លើងសង្គ្រាមបាន ប៉ុន្តែគួរសោកស្តាយថ្វីបើសង្គ្រាមមិនផ្ទុះឡើងមែន តែភាពដុនដាបនិងសោកនាដកម្មបាន ឆ្លងកាត់ប្រទេសនេះទាន់ហន់និងធ្ងន់ធ្ងរ។
ក្រៅអំពីសំណុំរឿងស៊ូដង់ លោក នឹងបន្តដំណើរទៅក្រុងគីមស្ហាសា (Kishasa)នៅថ្ងៃសៅរ៍។ ជាមួយប្រធានាធិបតីកុងហ្គោ លោក ឃែរី ត្រូវត្រួតពិនិត្យលើដំណើរការរំសាយក្រុមឧទ្ទាម ប្រដាប់អាវុធ ជាច្រើនក្នុងប្រទេសនេះ និងតម្រែតម្រង់ទិសប្រជាធិបតេយ្យឱ្យកុងហ្គោ តាមរយៈរៀបចំបោះឆ្នោតឱ្យមានតម្លាភាពនៅឆ្នាំ២០១៥។
នៅចុងឆ្នាំ២០១៣ យោធាកុងហ្គោ និងបេសកកម្មអង្គការសហប្រជាជាតិ បានយកជ័យជំនះលើពួកឧទ្ទាម ទុតស៊ី នៃចលនា២៣មីនា (M២៣) ដែលបានធ្វើទុកបុកម្នេញភាគខាងកើតប្រទេសអស់រយៈពេលជិតមួយឆ្នាំកន្លះ។ ប្រតិបត្តិការនេះកំពុងបន្ត ព្រមទាំងមានថ្មីទៀត ប្រឆាំងនឹងក្រុមប្រដាប់អាវុធផ្សេងៗទៀតនៅក្នុងតំបន់។ ដូច្នេះវាគឺជាការចាំបាច់ ដែលលោកឃែរី ត្រូវលើកទឹកចិត្ត និងសរសើរកុងហ្គោ ដើម្បីឈានដល់ជ័យជំនះទាំងស្រុង។
ផ្ទុយទៅវិញ វិស្វកម្មសន្តិភាពរូបនេះ មិនអញ្ជើញទៅរវ៉ាន់ដា ប្រទេសជាតិខាងកុងហ្គោ និងជាសម្ព័ន្ធមិត្តរបស់វ៉ាស៊ីនតោនទេ ព្រោះទំនាក់ទំនងប្រទេសទាំងពីរ បានល្អក់កករ តាំងពីពីរឆ្នាំមក ដោយហេតុតែរវ៉ាន់ដាចូលជួយពួកឧទ្ទាមនៅកុងហ្គោ។
ដើម្បីបិទបញ្ចប់ទស្សនកិច្ច ប្រកបដោយតុល្យការវិជ្ជមាន លោកប្រមុខការទូត បានជ្រើសរើសចូលជួប ប្រធានាធិបតីប្រទេសអង់ហ្គោឡា ប្រទេសអ្នកមានខាងប្រេង ដើម្បីកោតសរសើរអំពីភាពជាមេដឹកនាំល្អក្នុងតំបន់ផង និងពិភាក្សាអំពីកិច្ចសហប្រតិបត្តិការទ្វេភាគី អាមេរិក-អង់ហ្គោឡាផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ