មេទ័ពខ្មែរថៃជួបគ្នានៅថ្ងៃអង្គារនេះ ក្រោយសេចក្តីសម្រេចរបស់តុលាការឡាអេ
មេទ័ពក្នុងសមរភូមិជួរមុខរបស់កម្ពុជា និងថៃបានជួបគ្នានៅព្រឹកថ្ងៃអង្គារនេះ ដើម្បីបញ្ជាក់អំពីជំហររបស់ពួកគេជាថ្មីម្តងទៀតក្នុងការរក្សាភាពស្ងប់ស្ងាត់ នៅតាមតំបន់ព្រំដែនប្រាសាទព្រះវិហារនោះ។ ភាគីទាំងពីរបានជួបគ្នានៅ ចំនុចព្រំដែនក្បែរជើងប្រាសាទព្រះវិហារ។
ចុះផ្សាយនៅថ្ងៃ៖
ស្តាប់ - ០២:២៤
ក្រោយការប្រកាសសាលដីកានៅល្ងាចថ្ងៃចន្ទម្សិលមិញ នៅព្រឹកថ្ងៃអង្គារនេះ មេបញ្ជាការកងទ័ពប្រចាំព្រំដែនប្រាសាទព្រះវិហារ ទាំងកម្ពុជា និងថៃបានណាត់ជួបគ្នាដើម្បីបង្ហាញជំហរអនុវត្តសេចក្តីសម្រេចរបស់តុលាការយុត្តិធម៌អន្តរជាតិ។
ភាគីកម្ពុជាដឹកនាំដោយលោកឧត្តមសេនីយឯក ស្រី ឌឹក មេបញ្ជាការកងពលធំលេខ៣ទទួលបន្ទុកទិសប្រសាទព្រះវិហារ និងភាគីថៃដឹកនាំដោយមេបញ្ជាការកងពលលេខ៦។
ភាគីទាំងពីរបានសន្យាមិនអោយមានភាពតានតឹងកើតឡើង ហើយក៏សន្យាមិនផ្ទុះអាវុធ ដោយគោរពតាម សាលដីកាតុលាការឡាអេ និងជំហររបស់រដ្ឋាភិបាលទាំងពីរ។ ក្រោយពីការជួបគ្នា នៅចំនុចព្រំដែនក្បែរជើងប្រសាទព្រះវិហារនេះ មេបញ្ជាការទាំងពីរបានធ្វើសន្និសីទកាសែតរួមគ្នា ដោយមានទាំងអ្នកកាសែតខ្មែរ និងអ្នកកាសែតថៃចូលរួមផង។
គួរបញ្ជាក់ផងដែរថា នៅព្រឹកមិញនេះ នៅឯក្នុងរដ្ឋសភា ប្រធានរដ្ឋសភាជាតិកម្ពុជា លោកហេង សំរិនក៏បានថ្លែងការណ៍គាំទ្រគោលជំហររបស់រដ្ឋាភិបាល និងសាទរសេចក្តីសម្រេចរបស់តុលាការឡាអេផងដែរ។ លោកហេង សំរិនក៏បានអំពាវនាវបន្ថែមទៀត អោយកងទ័ពរក្សាភាពអត់ធ្មត់ដើម្បីរក្សាសន្តិភាពតាមព្រំដែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ