លោកញឹក ប៊ុនឆៃ ប្រកាសគ្រប់គ្រងស្នាក់ការបក្សហ៊ុនស៊ិនប៉ិចតាមខេត្ត២១
ក្រោយពីទទួលបានការអនុញ្ញាតពីក្រសួងមហាផ្ទៃ គណបក្សរួបរួមជាតិរបស់លោកញឹក ប៊ុនឆៃ បានរៀបចំធ្វើសមាជបក្ស នាព្រឹកថ្ងៃទី ២៦កុម្ភៈនេះ នៅសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ។ សមាជ ដែលមានសមាជិកចូលរួមប្រមាណជាង ១ពាន់នាក់ បានប្រកាសតែងតាំងលោកញឹក ប៊ុនឆៃ ជាប្រធាន លោកទារ ចំរ៉ាត់ ជាប្រធានកិត្តិយស លោកខាន់ សាវឿន ជាអនុប្រធាន និងលោកស៊ឹម សុន ជាតំណាងអគ្គលេខាធិការបក្ស។ ហើយនៅក្នុងសមាជនោះ លោកញឹក ប៊ុនឆៃ បានបញ្ជាក់ថា គណបក្សរួបរួមជាតិ នឹងគ្រប់គ្រងសាខាស្នាក់ការបក្សហ៊្វុនស៊ិនប៉ិច នៅតាមខេត្តចំនួន ២១ មិនឲ្យនរណាយកបានជាដាច់ខាត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
ទីបំផុតទៅគណបក្សរួបរួមជាតិ ដែលមានលោកញឹក ប៊ុនឆៃ ជាស្ថាបនិក បានធ្វើសមាជដំណើរការគណបក្សជាផ្លូវការ នាព្រឹកថ្ងៃទី ២៦កុម្ភៈ នៅខណ្ឌជ្រោយចង្វា រាជធានីភ្នំពេញ។ យោងតាមសមាជនោះ លោកញឹក ប៊ុនឆៃ ត្រូវបានអង្គសមាជលើកដៃអនុម័តទទួលស្គាល់ជាប្រធានគណបក្ស ខណៈលោកទារ ចំរ៉ាត់ ជាប្រធានកិត្តិយស លោកខាន់ សាវឿន ជាអនុប្រធាន និងលោកស៊ឹម សុន ជាតំណាងអគ្គលេខាធិការបក្ស។ គណបក្សថ្មីនេះ ក៏មានគណៈកម្មាធិការនាយកចំនួន ១៨០នាក់ និងសមាជិកក្រុមប្រឹក្សាជាតិ ចំនួន ១៦០០នាក់។
ឆ្លៀតឱកាសនោះដែរ លោកញឹក ប៊ុនឆៃ បានបញ្ជាក់ថា សាខាស្នាក់ការរបស់គណបក្សហ៊្វុនស៊ិនប៉ិច នៅតាមបណ្តាខេត្តចំនួន ២១ ក្នុងចំណោមខេត្ត រាជធានីទាំង ២៥ គឺជាកម្មសិទ្ធរបស់គណបក្សរួបរួមជាតិ។ ជាកម្មសិទ្ធ ព្រោះថាក្រសួងមហាផ្ទៃ បានចេញលិខិតប្រកាសមោក្ខភាពលទ្ធផលសមាជដែលជ្រើសរើសសម្តេចក្រុមព្រះ ជាព្រះប្រធានគណបក្សហ្វ៊ុនស៊ិនប៉ិច។ តាមលោកញឹក ប៊ុនឆៃ ស្នាក់ការទាំងនោះជាស្នាក់ការរបស់គណបក្សហ្វ៊ុនស៊ិនប៉ិច តាំងពីពេលដែលលោកជាលេខាបក្ស ក្រោមព្រះរាជដឹកនាំរបស់ព្រះអង្គម្ចាស់ក្សត្រិយ៍អរុណរស្មី ដោយមិនទាន់មានគណបក្សសង្គមរាស្ត្ររាជាធិបតីរបស់សម្តេចក្រុមព្រះ ច្របាច់បញ្ជូលគ្នានៅឡើយទេ។
សូមបញ្ជាក់ថា គោលនយោបាយរបស់គណបក្សរួបរួមជាតិ គឺដើរតាមមាគ៌ាសីហនុនិយម ការពាររាជបល្ល័ង្គព្រះមហាក្សត្រ ការពារបូរណភាពដែនដី និងចូលរួមអភិវឌ្ឈន៍ប្រទេស កម្ពុជា។ ហើយពាក្យស្លោករបស់គណបក្សរួបរួមជាតិ គឺឯករាជ្យ សន្តិភាព និងយុត្តិធម៌។
យ៉ាងណាមិញ គណបក្សថ្មីរបស់លោកញឹក ប៊ុនឆៃ ក្រោមស្លាកការពាររាជានិយមនេះ នៅមិនទាន់មានសែរាជវង្សចូលរួមក្នុងជួរថ្នាក់ដឹកនាំនៅឡើយទេ ទោះលោកញឹក ប៊ុនឆៃ បញ្ជាក់ ថា ទទួលបានការគាំទ្រពីសែរាជវង្សក៏ដោយ។ មួយវិញទៀត ចំពោះរឿងដែលព្រះអង្គម្ចាស់ក្សត្រិយ៍អរុណរស្មី មិនអាចធ្វើជាព្រះប្រធានគណបក្ស ក៏ត្រូវបានលោកញឹក ប៊ុនឆៃ ឲ្យដឹងថា ជាការសម្រេចផ្ទាល់របស់ព្រះអង្គ ព្រោះទ្រង់ជាប់ព្រះរាជកិច្ចបម្រើព្រះ មហាក្សត្រក្នុងព្រះបរមរាជវាំង ក្រោយពីចប់ការងារជាឯកអគ្គរាជទូត។
គួរជម្រាបជូនថា ដើម្បីផ្សព្វផ្សាយពីគណបក្សថ្មី ប្រធានគណបក្ស នឹងចុះប្រកាសពីសុពលភាពរបស់បក្ស និងសួរសុខទុក្ខប្រជាពលរដ្ឋ នៅតាមខេត្ត រាជធានី ទាំង ២៥ ក្នុងពេលឆាប់ៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ