ព្រំដែនខ្មែរ-ថៃ៖ គណៈកម្មាធិការព្រំដែនទូទៅប្រជុំថ្ងៃទី២១នៅភ្នំពេញ
រដ្ឋមន្ត្រីក្រសួងការពារជាតិថៃបានឆ្លើយតបមកកម្ពុជាហើយចំពោះការអញ្ជើញប្រជុំគណៈកម្មាធិការព្រំដែនទូទៅ។ កិច្ចប្រជុំគណៈកម្មាធិការព្រំដែន ដែលកម្ពុជារង់ចាំ៣ខែមកហើយនោះ នឹងត្រូវរៀបចំធ្វើ នៅថ្ងៃទី២១ធ្នូ សប្តាហ៍ក្រោយនេះ នៅក្នុងរាជធានីភ្នំពេញ។ អ្នកនាំពាក្យក្រសួងការពារជាតិ លោកឧត្តមសេនីយ៍ឯកឈុំ សុជាតិ អត្ថាធិប្បាយថា ការឆ្លើយតបរបស់ភាគីថៃនៅពេលនេះ គឺជាសញ្ញាល្អឈានទៅរកការអនុវត្តសាលក្រមតុលាការឡាអេស្តីពីការកែសម្រួលកងទ័ពក្នុងតំបន់ដែលត្រូវគ្មានកងទ័ពបណ្តោះអាសន្ន។
ចុះផ្សាយនៅថ្ងៃ៖
ស្តាប់ - ០១:៣៧
ប្រសិនបើគ្មានអ្វីផ្លាស់ប្តូរទេ កិច្ចប្រជុំគណៈកម្មាធិការព្រំដែនទូទៅនឹងត្រូវប្រព្រឹត្តទៅនៅថ្ងៃទី២១សប្តាហ៍ក្រោយនេះហើយ។ អ្នកនាំពាក្យក្រសួងការពារជាតិលោកឧត្តមសេនីយ៍ឯក ឈុំ សុជាតិ បានប្រាប់វិទ្យុបារាំងអន្តរជាតិអោយដឹងថា រដ្ឋមន្ត្រីក្រសួងការពារជាតិថៃបានឆ្លើយតបមកកម្ពុជា កាលពីថ្ងៃព្រហស្បតិ៍ទី១៥ធ្នូ យល់ព្រមមកចូលរួមប្រជុំគណៈកម្មាធិការព្រំដែនទូទៅ លើកទី៨ នៅក្នុងរាជធានីភ្នំពេញ។ ការឆ្លើយតបរបស់ថៃ ដែលអ្នកនាំពាក្យក្រសួងការពារជាតិខ្មែរអត្ថាធិប្បាយថា វាគឺជាសញ្ញាល្អមួយ ឆ្ពោះទៅរកការពិភាក្សា ស្តីពីការអនុវត្តសាលក្រមតុលាការឡាអេ ថ្ងៃទី១៨កក្កដាឆ្នាំ២០១១នេះ។
គួរបញ្ជាក់ថា មុននឹងមានកិច្ចប្រជុំគណៈកម្មាធិការព្រំដែនទូទៅ នៅថ្ងៃទី២១ធ្នូនោះ ក្រុមលេខានៃគណៈកម្មាធិការទាំងភាគី (កម្ពុជានិងថៃ) នឹងជួបប្រជុំគ្នា២ថ្ងៃផងដែរ គឺថ្ងៃទី១៩ និងថ្ងៃទី២០ ដើម្បីត្រៀមរៀបចំរបៀបវារៈនៃកិច្ចប្រជុំធំថ្ងៃទី២១នោះ។ មន្ត្រីជាន់ខ្ពស់យោធាកម្ពុជាបានប្រាប់អោយដឹងថា ភាគីថៃនឹងមានសមាជិកប្រតិភូទាំងអស់ប្រហែល១០០នាក់ ហើយពួកគេនឹងធ្វើដំណើរមកភ្នំពេញតាមយន្តហោះយោធាពិសេសរបស់គេ។
គួររំឭកថា មុនកិច្ចប្រជុំគណៈកម្មាធិការព្រំដែនទូទៅកើតឡើង កងទ័ពខ្មែរនិងថៃបានប្រយុទ្ធគ្នាក្នុងទ្រង់ទ្រាយតូចមួយ កាលពីរសៀលថ្ងៃទី១៥ធ្នូ នៅខាងព្រំដែនកោះកុង។ សារព័ត៌មានក្នុងស្រុកបានផ្សាយថា ទាហានកម្ពុជាបានបាញ់រះលើឧទ្ធម្ភាគចក្រថៃ ដែលបើកចូលក្នុងដែនអាកាសកម្ពុជា។ ឆ្លើយតបចំពោះបញ្ហានេះអ្នកនាំពាក្យក្រសួងការពារជាតិមិនទាន់អាចធ្វើអត្ថាធិប្បាយអី្វនៅឡើយទេ ដោយរង់ចាំលទ្ធផលនៃការស៊ើបអង្កេត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ