ប្រទេសចិនងាកទៅរកប្រទេសអឺរ៉ុបខាងកើត
ចុះផ្សាយនៅថ្ងៃ៖
ស្តាប់ - ០៤:០៥
លោកនាយករដ្ឋមន្ត្រីចិន វិន ជាប៉ាវ ត្រូវគេរង់ចាំទទួលដើម្បីបំពេញទស្សនកិច្ចចំនួនពីរថ្ងៃនៅប្រទេសប៉ូឡូញ ដែលនៅពេលជាមួយគ្នានោះមានជំនួបកំពូលសេដ្ឋកិច្ចនៅថ្ងៃព្រហស្បតិ៍ជាមួយប្រមុខដឹកនាំនៃប្រទេសអឺរ៉ុបកណ្តាលនិងអឺរ៉ុបខាងកើត។តើមានមូលហេតុអ្វីមកជំរុញឲ្យទីក្រុងប៉េកាំងមកបោះទុនធ្វើវិនិយោគនៅតំបន់អឺរ៉ុបកណ្តាលនិងអឺរ៉ុបខាងកើតយ៉ាងដូច្នេះ?
នាឱកាសជំនួបកំពូលសេដ្ឋកិច្ចនៅប្រទេសប៉ូឡូញ លោកនាយករដ្ឋមន្ត្រីចិន វិន ជាប៉ាវ បានជួបពិភាក្សាជាមួយប្រមុខរដ្ឋាភិបាលនៃប្រទេសអឺរ៉ុបកណ្តាលនិងអឺរ៉ុបខាងកើតចំនួន១៦ប្រទេសដែលក្នុងនោះមាន៖ ប្រទេសអាលបានី ប៊ុលហ្គារី បូស្នី ក្រូអាស៊ី ឆេគី អេស្តូនី ហុងគ្រី ឡេតូនី លីទុយអានី ម៉ាសេដ្វាន ម៉ុងតេនេក្រូ រូម៉ានី ស៊ែប៊ី ស្លូវ៉ាគី ស្លូវេនី ហើយនិងប្រទេសប៉ូឡូញជាម្ចាស់ផ្ទះ។
នាឱកាសនោះ ក៏មានវត្តមានរបស់ក្រុមហ៊ុនចិនប្រមាណ៣០០ក្រុមហ៊ុន ហើយនិងសហគ្រាសនៃតំបន់អឺរ៉ុបកណ្តាលនិងអឺរ៉ុបខាងកើតប្រមាណ៤៥០ ដែលក្នុងនេះមានសហគ្រាសនៃប្រទេសប៉ួឡូញប្រមាណ៣០០ផងដែរ។
គួរកត់សម្គាល់ថា ដំបូងឡើយប្រទេសចិនបានចាប់បោះទុនធ្វើវិនិយោគបន្តិចបន្តួចនៅក្នុងតំបន់អឺរ៉ុបកណ្តាលនិងអឺរ៉ុបខាងកើត ដោយបានបោះទុនប្រមាណជា៦២២ពាន់លានអឺរ៉ូនៅចន្លោះឆ្នាំ២០០៤-២០១០។ ក៏ប៉ុន្តែ បរិមាណប្រចាំឆ្នាំនៃប្រាក់វិនិយោគបានទ្វេមួយជាពីរនារយៈប៉ុន្មានឆ្នាំចុងក្រោយនេះ។ នេះបើយោងតាមតួលេខនៅក្នុងរបាយការណ៍នៅពេលថ្មីនេះរបស់វិជ្ជាស្ថានអភិវឌ្ឍន៍អឺរ៉ុបកណ្តាលនិងអឺរ៉ុបខាងកើត (CEED) ។
សំណួរមួយបានចោទសួរថា តើមានមូលហេតុអ្វីមកជំរុញឲ្យទីក្រុងប៉េកាំងមកបោះទុនធ្វើវិនិយោគនៅតំបន់អឺរ៉ុបកណ្តាលនិងអឺរ៉ុបខាងកើតយ៉ាងដូច្នេះ?
គេដឹងហើយថា ប្រទេសចិនមានសល់ប្រាក់អឺរ៉ូនិងប្រាក់ដុល្លារយ៉ាងច្រើនសន្ធឹកសន្ធាប់។ ប៉ុន្តែ ទីក្រុងប៉េកាំងដែលមកបោះទុនធ្វើវិនិយោគនៅតំបន់អឺរ៉ុបកណ្តាលនិងអឺរ៉ុបខាងកើតយ៉ាងដូច្នេះ មកពីប្រទេសចិនមើលឃើញថា “បច្ចុប្បន្ននេះ តំបន់អឺរ៉ុបកណ្តាលនិងអឺរ៉ុបខាងកើតជាតំបន់មានស្ថិរភាពនយោបាយ មានសន្ទុះកំណើនសេដ្ឋកិច្ច កម្លាំងពលកម្មមានតម្លៃទាប ហើយជាពិសេសគឺជាទីកន្លែងដ៏ប្រពៃសម្រាប់ធ្វើការបញ្ជូនផលិតផលទៅលក់ឲ្យទីផ្សារនៃប្រទេសអឺរ៉ុបខាងលិចដែលជាទិសដៅដ៏សំខាន់របស់ប្រទេសចិន”។
សូមបញ្ជាក់ថា ការនាំផលិតផលចិនចូលសហភាពអឺរ៉ុបបានគុណមួយជាបួននៅចន្លោះឆ្នាំ២០០០និងឆ្នាំ២០១០ ដោយបានកើនឡើងដល់២៤៣,៨ពាន់លានអឺរ៉ូសម្រាប់តែរយៈពេល១០ខែនៃឆ្នាំ២០១១ នេះបើយោងតាមវិជ្ជាស្ថានស្ថិតិអឺរ៉ុបEurostat។
រីឯប្រទេសនៃតំបន់ចាយប្រាក់អឺរ៉ូដែលកំពុងតែប្រយុទ្ធទប់ទល់នឹងវិបត្តិប្រាក់បំណុលដ៏ធំធេង កើតមានក្តីបាម្ភយ៉ាងខ្លាំងនៅចំពោះមុខការមកបោះទុនធ្វើវិនិយោគរបស់ប្រទេសចិននៅក្នុងតំបន់អឺរ៉ុបកណ្តាលនិងអឺរ៉ុបខាងកើត ដែលបាននាំគ្នាក្រាលព្រំក្រហមសម្រាប់ទទួលវិនិយោគិននិងអ្នកដឹកនាំចិន។
គួរកត់សម្គាល់ថា ប្រទេសហុងគ្រីអតីតប្រទេសកុម្មុនិស្តអឺរ៉ុបខាងកើតបានមកចូលជាសមាជិកនៃសហភាពអឺរ៉ុប បានស្វាគមន៍ទទួលឧស្សាហករចិនខាងផលិតគ្រឿងឧបករណ៍សម្រាប់ទូរគមនាគមន៍ឈ្មោះ Huawei ដែលជាវិនិយោគិនដ៏សំខាន់សម្រាប់តំបន់ ដែលរកបានប្រាក់ចំណូលបានប្រមាណជាងពីរពាន់លានអឺរ៉ូសម្រាប់ឆ្នាំ២០១១។
ហើយនាឱកាសជំនួបកំពូលសេដ្ឋកិច្ចនៅប្រទេសប៉ូឡូញនេះ លោកនាយករដ្ឋមន្ត្រីចិន វិន ជាប៉ាវ បានថ្លែងឲ្យដឹងថា គេនឹងបង្កើតឲ្យមាន “មូលនិធិចិន-អឺរ៉ុបកណ្តាល”មួយសម្រាប់ជួយជំរុញការបោះទុនធ្វើវិនិយោគនៅក្នុងអតីតប្រទេសកុម្មុយនិស្តអឺរ៉ុបខាងកើត។
“ហើយប្រទេសចិននឹងធ្វើសហការជាមួយប្រទេសនៃតំបន់អឺរ៉ុបកណ្តាលនិងអឺរ៉ុបខាងកើត ដើម្បីជួយពង្រឹងពង្រីកការដោះដូរពាណិជ្ជកម្មឲ្យកើនឡើងដល់១០០ពាន់លានដុល្លារនៅឆ្នាំ២០១៥ខាងមុខ។ នេះជាការប្រកាសរបស់លោកនាយករដ្ឋមន្ត្រីចិន វិន ជាប៉ាវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ