កំណើនសេដ្ឋកិច្ចចិនធ្លាក់ចុះដល់កម្រិតទាបបំផុតរាប់ចាប់ពីឆ្នាំ២០០៩
កំណើនសេដ្ឋកិច្ចចិន ដែលជាមហាសេដ្ឋកិច្ចលំដាប់ទី២ នៅលើពិភពលោក នៅតែបន្តធ្លាក់ចុះ។ នៅត្រីមាសទី១ ឆ្នាំ២០១២នេះ កំណើនសេដ្ឋកិច្ចចិន (គិតជាអត្រាប្រចាំឆ្នាំ) បានធ្លាក់ចុះមកនៅត្រឹមតែ ៨,១% ប៉ុណ្ណោះ។ ថ្វីដ្បិតតែ ទាំងរដ្ឋាភិបាលចិន និងទាំងអ្នកជំនាញសេដ្ឋកិច្ចជាទូទៅសុទ្ធតែបានព្យាករទុកអំពីការធ្លាក់ចុះនៃកំណើនសេដ្ឋកិច្ចចិន ក៏ប៉ុន្តែ ៨,១% គឺជាអត្រាមួយទាបជាងការរំពឹងទុកទៅទៀត។
ចុះផ្សាយនៅថ្ងៃ៖
ស្តាប់ - ០១:៥៦
កំណើនសេដ្ឋកិច្ច ៨,១% នៅតែជាអត្រាមួយខ្ពស់ បើធៀបនឹងមហាអំណាចសេដ្ឋកិច្ចភាគច្រើនផ្សេងទៀត។ ក៏ប៉ុន្តែ សម្រាប់ចិន វាជាអត្រាមួយទាបបំផុត មិនធ្លាប់មាន ក្នុងរយៈពេល ប្រមាណជា ៣ឆ្នាំកន្លងទៅនេះ។ កាលពី៣ខែមុន អត្រាកំណើនសេដ្ឋកិច្ចចិន មានរហូតដល់ទៅ ៨,៩%។ អ្នកជំនាញខាងសេដ្ឋកិច្ចបាននាំគ្នាព្យាករថា អត្រាកំណើននេះនឹងធ្លាក់ចុះ ប៉ុន្តែ មិននឹកស្មានថាធ្លាក់ចុះមកដល់ ៨,១% បែបនេះទេ។
កាលពីថ្ងៃព្រហស្បតិ៍ ធនាគារពិភពលោកបានព្យាករថា អត្រាកំណើនសេដ្ឋកិច្ចចិនអាចនឹងបន្តធ្លាក់ចុះតទៅទៀត នៅក្នុងរយៈពេលប៉ុន្មានខែខាងមុខទៀតនេះ។
សេដ្ឋកិច្ចចិន ដែលពឹងផ្អែកខ្លាំងលើការនាំចេញ និងការវិនិយោគ កំពុងប្រឈមមុខនឹងបញ្ហាពីរ៖ ទីមួយ គឺការធ្លាក់ចុះនៃតម្រូវការទីផ្សារក្រៅប្រទេស ជាពិសេស ទីផ្សារអាមេរិក និងអឺរ៉ុប ដែលបណ្តាលមកពីវិបត្តិសេដ្ឋកិច្ច និងវិបត្តិបំណុល។ ក្នុងពេលជាមួយគ្នានេះ ការបង្កើនតម្រូវការទីផ្សារក្នុងស្រុកចិនខ្លួនឯង ក៏ពិបាកនឹងធ្វើ។
បញ្ហាទីពីរ គឺការធ្លាក់ចុះនៃតម្លៃទំនិញ ជាពិសេស តម្លៃអចលនទ្រព្យ។ តាមការពិត គឺអាជ្ញាធរចិនខ្លួនឯង ដែលបានព្យាយាមចាត់វិធានការជាច្រើន ក្នុងនោះ រួមមានការកម្រិតចរន្តឥណទានឯកជនផង ដើម្បីបញ្ចុះតម្លៃទំនិញ និងទប់ស្កាត់វិបត្តិទីផ្សារអចលនទ្រព្យ។ ក៏ប៉ុន្តែ ការកម្រិតចរន្តឥណទាននេះទំនងជាកំពុងតែធ្វើឲ្យប៉ះពាល់ដល់វិស័យវិនិយោគ និងធ្វើឲ្យកំណើនសេដ្ឋកិច្ចចិនធ្លាក់ចុះហួសពីអ្វី ដែលអាជ្ញាធរចង់បាន។
រដ្ឋាភិបាលចិនត្រូវប្រឈមមុខនឹងជម្រើសនយោបាយដ៏ស្មុគស្មាញមួយ គឺម្ខាងត្រូវរក្សាកំណើនសេដ្ឋកិច្ចឲ្យមានកម្រិតខ្ពស់ និងម្ខាងទៀត ត្រូវទប់ស្កាត់តម្លៃទំនិញឲ្យនៅទាប។ វិធានការជំរុញកំណើនសេដ្ឋកិច្ច អាចនឹងធ្វើឲ្យតម្លៃទំនិញកើនឡើង ចំណែកឯវិធានការទប់ស្កាត់ការកើនឡើងនៃតម្លៃទំនិញវិញ អាចនឹងធ្វើឲ្យកំណើនសេដ្ឋកិច្ចធ្លាក់ចុះ។ ដូច្នេះ រដ្ឋាភិបាលចិនកំពុងតែព្យាយាមរកនយោបាយកណ្តាលមួយ ពីព្រោះថា ការធ្លាក់ចុះនៃអត្រាកំណើនសេដ្ឋកិច្ចក៏អាចបណ្តាលឲ្យមានវិបត្តិសង្គម ហើយការកើនឡើងនៃតម្លៃទំនិញក៏អាចបណ្តាលឲ្យមានការបះបោរពីសំណាក់ប្រជាជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ