ឡាវ៖ ផលចំណេញពីការចូលក្នុងអង្គការពាណិជ្ជកម្មពិភពលោក
ចុះផ្សាយនៅថ្ងៃ៖
ស្តាប់ - ០៣:៣៧
បន្ទាប់ពីឆ្លងកាត់ដំណើរការចរចា អស់រយៈពេល ១៥ឆ្នាំ ទីបំផុត ឡាវបានឈានជើងមួយជំហានចូលទៅក្នុងក្លឹបនៃប្រទេសជាសមាជិកអង្គការពាណិជ្ជកម្មពិភពលោក ក្រោយពីក្រុមការងារទទួលបន្ទុកចរចាជាមួយឡាវ បានឯកភាពទទួលសមាជិកភាពឡាវ កាលពីសប្តាហ៍មុន។ ការដែលឡាវបានចូលក្នុងអង្គការពាណិជ្ជកម្មពិភពលោកនេះ អាចនឹងជួយជួយឲ្យអាស៊ានកាន់តែមានឥទ្ធិពល និងដើរតួនាទីកាន់តែសំខាន់ថែមទៀត នៅលើឆាកអន្តរជាតិ ជាពិសេស ក្នុងវិស័យពាណិជ្ជកម្មអន្តរជាតិ និងវិនិយោគ។
ឡាវ ដែលមានឈ្មោះជាផ្លូវការថា “សាធារណរដ្ឋប្រជាមានិតប្រជាធិបតេយ្យឡាវ” បានដាក់ពាក្យសុំចូលជាសមាជិកអង្គការពាណិជ្ជកម្មពិភពលោក (ហៅកាត់តាមភាសាអង់គ្លេស WTO ហើយតាមភាសាបារាំង OMC) កាលពីឆ្នាំ១៩៩៧។ ក្រុមការងារដែលមាន ៦៦ប្រទេសជាសមាជិក OMC ត្រូវបានបង្កើតឡើង នៅឆ្នាំ១៩៩៨ ដើម្បីទទួលបន្ទុកចរចាជាមួយឡាវ។ ក៏ប៉ុន្តែ រហូតដល់ឆ្នាំ២០០៤ ទើបក្រុមការងារនេះចាប់ផ្តើមជួបប្រជុំគ្នា។
ការចរចានេះត្រូវបានបិទបញ្ចប់ កាលពីថ្ងៃសុក្រ ២៨ កញ្ញា សប្តាហ៍មុន ដោយប្រទេសទាំង ៦៦ នៅក្នុងក្រុមការងារ (ដែលក្នុងនោះក៏រួមមានប្រទេសកម្ពុជា និងប្រទេសសមាជិកអាស៊ានទាំង៨ផ្សេងទៀតផងដែរ) បានមូលមតិគ្នា សម្រេចឲ្យអង្គការពាណិជ្ជកម្មពិភពលោក ទទួលយកឡាវជាសមាជិក។
សមាជិកភាពឡាវនឹងត្រូវដាក់ជូនក្រុមប្រឹក្សាសមាជិកអង្គការពាណិជ្ជកម្មពិភពលោកទាំង ១៥៧ប្រទេស អនុម័ត នៅថ្ងៃទី២៦ តុលាខាងមុខនេះ។ បន្ទាប់មក សភាឡាវត្រូវអនុម័តផ្តល់សច្ចាប័នលើកិច្ចព្រមព្រៀង រួចហើយបញ្ជូនលិខិតូបករណ៍គតិយុត្តស្តីពីការផ្តល់សច្ចាប័ននេះត្រឡប់ទៅតម្កល់ទុកនៅអង្គការពាណិជ្ជកម្មពិភពលោកវិញ ហើយ៣០ថ្ងៃក្រោយមក ឡាវនឹងក្លាយជាសមាជិកផ្លូវការ។
និយាយជារួម ឡាវបានឆ្លងផុតដំណាក់កាលសំខាន់រួចហើយ នៅសល់តែការបំពេញនីតិវិធីច្បាប់ជាផ្លូវការប៉ុណ្ណោះ។ ជាទូទៅ ដំណើរការនីតិវិធីទាំងនេះ មិនមានអ្វីត្រូវចោទជាបញ្ហានោះទេ។ ជោគជ័យរបស់ឡាវ ក្នុងការចរចាចូលជាសមាជិកអង្គការពាណិជ្ជកម្មពិភពលោកនៅពេលនេះ កើតមានគាប់ជួននឹងពេលដែលឡាវត្រូវធ្វើជាម្ចាស់ផ្ទះរៀបចំជំនួបកំពូលអាស៊ី-អឺរ៉ុប (ហៅកាត់ថា ASEM) នៅខែវិច្ឆិកាក្រោយនេះ។
ការចូលជាសមាជិកអង្គការពាណិជ្ជកម្មពិភពលោក គឺមានន័យថា ឡាវនឹងត្រូវកាត់បន្ថយរនាំងពន្ធគយ សម្រាប់ការនាំចូលទំនិញពីបរទេស ក៏ប៉ុន្តែ ក្នុងពេលជាមួយគ្នា ឡាវក៏អាចមានឱកាសទាញយកផលចំណេញពីការនាំទំនិញចេញ ទៅកាន់ទីផ្សារអន្តរជាតិផងដែរ។
លើសពីនេះទៅទៀត សមាជិកភាពនេះ នឹងជួយជំរុញឲ្យរដ្ឋាភិបាលឡាវធ្វើកំណែទម្រង់ក្នុងស្រុក ដើម្បីតម្រូវតាមលក្ខខណ្ឌរបស់អង្គការពាណិជ្ជកម្មពិភពលោក។ ជាក់ស្តែង យើងសង្កេតឃើញថា ក្នុងរយៈពេលប៉ុន្មានឆ្នាំចុងក្រោយនេះ ក្នុងក្របខ័ណ្ឌនៃការចរចាចូលជាសមាជិកអង្គការពាណិជ្ជកម្មពិភពលោក ឡាវ ដែលជាប្រទេសស្ថិតក្រោមរបបដឹកនាំកុម្មុយនិស្តនោះ បានរៀបចំធ្វើកំណែទម្រង់សំខាន់ៗជាច្រើន ជាពិសេស គឺការបើកចំហសេដ្ឋកិច្ច និងកំណែទម្រង់ប្រព័ន្ធច្បាប់។
នៅក្នុងការចរចាជាមួយក្រុមការងាររបស់អង្គការពាណិជ្ជកម្មពិភពលោក រដ្ឋាភិបាលឡាវក៏បានសន្យាផងដែរថានឹងជំរុញការធ្វើកំណែទម្រង់នេះជាបន្តទៀត ជាពិសេស ការរៀបចំច្បាប់ការពារកម្មសិទ្ធិបញ្ញា ការត្រួតពិនិត្យគុណភាពចំណីអាហារ តម្លាភាពក្នុងការផ្តល់អាជ្ញាប័ណ្ណនាំចូល ព្រមទាំងការបង្កើនប្រសិទ្ធិភាពការងារគយ ការប្រកួតប្រជែងដោយស្មើភាពរវាងក្រុមហ៊ុនរដ្ឋ និងក្រុមហ៊ុនឯកជន ។ល។ និង ។ល។ ក្នុងឋានៈជាប្រទេសមានការអភិវឌ្ឍតិចតួច ឡាវអាចទទួលបាននូវជំនួយពីប្រទេសសមាជិកផ្សេងទៀត ក្នុងអង្គការពាណិជ្ជកម្មពិភពលោក ដើម្បីបន្តធ្វើកំណែទម្រង់ទាំងនេះ។
យោងតាមការប៉ាន់ស្មានរបស់ធនាគារពិភពលោក កាលពីឆ្នាំ២០០៨ ប្រជាជនឡាវប្រមាណជា ២៨% កំពុងរស់នៅក្រោមបន្ទាត់ភាពក្រីក្រ។ ក៏ប៉ុន្តែ ធនាគារពិភពលោកក៏បានបញ្ជាក់ផងដែរថា ឡាវកំពុងតែដើរតាមគន្លងផ្លូវល្អមួយ ឆ្ពោះទៅសម្រេចគោលដៅកាត់បន្ថយភាពក្រីក្រ សម្រាប់ឆ្នាំ២០២០។
អ្នកវិភាគជាច្រើនយល់ថា ការចូលក្នុងអង្គការពាណិជ្ជកម្មពិភពលោក នឹងជួយឲ្យឡាវបង្កើនពាណិជ្ជកម្មក្រៅប្រទេស បង្កើតដៃគូពាណិជ្ជកម្មថ្មីៗ ទាក់ទាញវិនិយោគពីបរទេសឲ្យមកដាក់ទុនក្នុងប្រទេសឡាវ បង្កើនសកម្មភាពផលិត និងបង្កើតការងារដល់ប្រជាជនឡាវ។ ទាំងអស់នេះ បើរួមជាមួយនឹងតម្លាភាព និងអភិបាលកិច្ចល្អ គឺជាកត្តាដ៏សំខាន់មួយ ក្នុងការអភិវឌ្ឍសេដ្ឋកិច្ច ដើម្បីកាត់បន្ថយភាពក្រីក្រ។
សម្រាប់អាស៊ាន ការដែលឡាវបានចូលជាសមាជិកអង្គការពាណិជ្ជកម្មពិភពលោកក៏អាចនឹងផ្តល់ផលល្អដែរ។ គួរបញ្ជាក់ថា នៅពេលបច្ចុប្បន្ននេះ ឡាវ គឺជាប្រទេសតែមួយគត់ នៅក្នុងតំបន់អាស៊ាន ដែលនៅមិនទាន់បានចូលជាសមាជិកអង្គការពាណិជ្ជកម្មពិភពលោក។ សមាជិកភាពរបស់ឡាវ មានន័យថា តំបន់អាស៊ានទាំងមូលនឹងត្រូវស្ថិតក្នុងអង្គការពាណិជ្ជកម្មពិភពលោក ដែលជាជំហានដ៏សំខាន់មួយទៀត ដើម្បីឲ្យអាស៊ានឈានទៅបង្កើនឥទ្ធិពល និងតួនាទីក្នុងឆាកអន្តរជាតិ ទាំងក្នុងវិស័យពាណិជ្ជកម្មអន្តរជាតិ វិនិយោគ និងនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ