សញ្ញាប័ណ្ណរបស់រដ្ឋចិននឹងត្រូវជប៉ុនទិញជាលើកទីមួយ
ប្រទេសជប៉ុនបានប្រកាសឲ្យដឹងថា ទីក្រុងតូក្យូនឹងទិញសញ្ញាប័ណ្ណរបស់រដ្ឋចិនជាលើកទីមួយ។ ការទិញសញ្ញាប័ណ្ណរបស់ជប៉ុននេះគឺជាសញ្ញាបង្ហាញឲ្យឃើញពីការពង្រឹងទំនាក់ទំនងនិងការដោះដូរហិរញ្ញវត្ថុរវាងមហាអំណាចអាស៊ីទាំងពីរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
“យើងបានទទួលការយល់ព្រមពីអាជ្ញាធរចិនដើម្បីទិញសញ្ញាប័ណ្ណរបស់រដ្ឋចិនដែលមានទឹកប្រាក់ចំនួន៦៥ពាន់លានយ័នឬត្រូវជា១០,៣ពាន់លានដុល្លារ” នេះជាការថ្លែងពន្យល់នៅថ្ងៃអង្គារនេះដោយលោក Jun Azumi រដ្ឋមន្ត្រីក្រសួងហិរញ្ញវត្ថុជប៉ុន។
ការទិញសញ្ញាប័ណ្ណរដ្ឋចិនដោយជប៉ុននេះគឺឋិតនៅក្នុងក្របខ័ណ្ឌនៃកិច្ចព្រមព្រៀងហិរញ្ញវត្ថុមួយចំនួនដែលសម្រេចបាននាឱកាសជំនួបកំពូលរវាងលោកនាយករដ្ឋមន្ត្រីជប៉ុន Yoshihiko Noda និងលោកនាយករដ្ឋមន្ត្រីចិន Wen Jiabao នៅចុងខែធ្នូកន្លងទៅនេះ។
ខុសផ្ទុយពីប្រទេសដទៃទៀត ប្រទេសចិនពុំអនុញ្ញាតឲ្យវិនិយោគិនទិញសញ្ញាប័ណ្ណរបស់រដ្ឋចិនដោយសេរីឡើយ។ គេអាចទិញបាន លុះត្រាណាតែមានការអនុញ្ញាតពិសេសពីអាជ្ញាធរចិនជាមុនសិន។
គួរកត់សម្គាល់ថា ប្រទេសចិនបានក្លាយជាប្រទេសមួយដ៏សំខាន់ក្នុងចំណោមប្រទេសសំខាន់ៗទាំងប្រាំដែលបានទិញសញ្ញាប័ណ្ណរបស់រដ្ឋជប៉ុន។ ដូច្នេះទីក្រុងប៉េកាំងត្រូវតែផ្តល់ការអនុញ្ញាតឲ្យប្រទេសជប៉ុន ដើម្បីរក្សាឲ្យមានបដិការភាពរវាងប្រទេសទាំងពីរ។
ដូច្នេះ កិច្ចព្រមព្រៀងចិន-ជប៉ុននៅចុងខែធ្នូកន្លងទៅគឺមានគោលបំណងយកប្រាក់យេនជប៉ុននិងប្រាក់យ័នចិនមកប្រើក្នុងការដោះដូរពាណិជ្ជកម្មនិងវិនិយោគរវាងប្រទេសទាំងពីរ ដោយចៀសវាងប្រើប្រាក់ដុល្លារអាមេរិកដែលបច្ចុប្បន្ននេះតំណាងដល់ទៅ៦០%នៃការដោះដូររវាងចិននិងជប៉ុន។
សូមបញ្ជាក់ថា ការយកប្រាក់យេនជប៉ុននិងប្រាក់យ័នចិនមកប្រើក្នុងការដោះដូរពាណិជ្ជកម្មអាចធ្វើឲ្យសហគ្រាសនៃប្រទេសទាំងពីរកាត់បន្ថយសោហ៊ុយរបស់ខ្លួន ហើយនិងបន្ថយការខូចខាតនៅគ្រាដែលរូបិយប័ណ្ណអាមេរិកជួបនឹងការមុជងើបម្តងៗ។ ដូច្នេះ ទាំងទីក្រុងប៉េកាំង ទាំងទីក្រុងតូក្យូមើលឃើញថា កិច្ចព្រមព្រៀងចិន-ជប៉ុននេះនឹងនាំមកឲ្យនូវស្ថិរភាពហិរញ្ញវត្ថុដល់តំបន់អាស៊ីទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ