សម័យប្រជុំប្រចាំឆ្នាំសភាចិនចាប់បើកដោយផ្តោតលើបញ្ហាសេដ្ឋកិច្ចនិងសង្គម
កិច្ចប្រជុំប្រចាំឆ្នាំនៃសភាប្រជាជនចិនបានចាប់បើកធ្វើ នៅថ្ងៃចន្ទនេះ សម្រាប់រយៈពេល ១០ថ្ងៃ។ នៅក្នុងសុន្ទរកថាបើកកិច្ចប្រជុំនេះ លោកនាយករដ្ឋមន្រ្តី វេន ជៀប៉ាវ បានផ្តោតជាសំខាន់លើអត្រាកំណើនសេដ្ឋកិច្ច និងអត្រាអតិផរណា សម្រាប់ឆ្នាំ២០១២ ព្រមទាំងជម្លោះដីធ្លី ដែលជាបញ្ហាដ៏ក្តៅគគុកនៅចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
នៅក្នុងសុន្ទរកថាចំពោះមុខគណៈប្រតិភូប្រមាណ ៣០០០នាក់ នៅក្នុងការបើកកិច្ចប្រជុំសភាប្រចាំឆ្នាំ នៅព្រឹកថ្ងៃចន្ទនេះ លោក វេន ជៀប៉ាវ បានកំណត់គោលដៅកំណើនសេដ្ឋកិច្ច សម្រាប់ឆ្នាំ២០១២នេះ ត្រឹម ៧,៥% ពោលគឺ តិចជាងអត្រាកំណើន កាលពីឆ្នាំ២០១១ ដែលមាន ៨%។ អត្រាអតិផរណាវិញ ក៏នឹងត្រូវកាត់បន្ថយឲ្យមកនៅត្រឹម ៤% ដែរ នៅឆ្នាំ២០១២ ធៀបនឹងឆ្នាំ២០១១ ដែលមានរហូតដល់ ៥,៤%។
ការកើនឡើងនៃតម្លៃទំនិញទូទៅ ជាពិសេស ទំនិញ ដែលជាតម្រូវការចាំបាច់ប្រចាំថ្ងៃរបស់ប្រជាជន កំពុងតែធ្វើឲ្យរដ្ឋាភិបាលចិនព្រួយបារម្ភខ្លាចកើតមានការបះបោរតវ៉ា ពីសំណាក់ប្រជាជន។ ជម្លោះដីធ្លី ក៏ជាកង្វល់ដ៏ធំមួយដែរ។ នៅក្នុងពេលដែលតម្លៃដី និងផ្ទះ កំពុងតែត្រូវប៉ាន់ អាជ្ញាធរដែនដីចិនបានឃុបឃិតជាមួយឈ្មួញ យកដីប្រជាជន ដើម្បីសង់អគារលក់ ដែលជាហេតុនាំឲ្យប្រជាជនម្ចាស់ដីនាំគ្នាងើបឡើងតវ៉ាប្រឆាំងឥតលស់ពេល។
នៅក្នុងសុន្ទរកថាថ្ងៃចន្ទនេះ លោក វេន ជៀប៉ាវ បានសង្កត់ធ្ងន់ថា សិទ្ធិរបស់ប្រជាជនលើដីធ្លី ដែលពួកគេកំពុងកាន់កាប់ មិនអាចអ្នកណារំលោភបានជាដាច់ខាត។ ក៏ប៉ុន្តែ នេះទំនងជាបណ្តាំនយោបាយសម្រាប់មេដឹកនាំជំនាន់ក្រោយ ជាជាងនយោបាយរបស់រដ្ឋាភិបាលបច្ចុប្បន្ន ពីព្រោះថា នេះគឺជាឆ្នាំចុងក្រោយ ដែលលោកវេន ជៀប៉ាវ កាន់តំណែងជានាយករដ្ឋមន្រ្តី។
ការផ្លាស់ប្តូរថ្នាក់ដឹកនាំ ដែលគណបក្សកុម្មុយនិស្តចិនតែងតែរៀបចំធ្វើនៅរៀងរាល់១០ឆ្នាំម្តង នឹងត្រូវចាប់ផ្តើមនៅខែតុលា ខាងមុខ។ មេដឹកនាំបក្ស រាប់ចាប់តាំងពីសមាជិកគណៈមជ្ឈិម រហូតដល់អគ្គលេខាបក្ស នឹងត្រូវផ្លាស់ប្តូរថ្មី។ បន្ទាប់ពីផ្លាស់ប្តូរមេដឹកនាំបក្ស ថ្នាក់ដឹកនាំរដ្ឋក៏នឹងត្រូវផ្លាស់ប្តូរដែរ នៅខែមីនា ឆ្នាំ២០១៣។
លោកស៊្ហី ជីនពីង (Xi Jinping) ដែលបច្ចុប្បន្នជាអនុប្រធានាធិបតី ត្រូវគេមើលឃើញថាជាអ្នកត្រូវឡើងមកកាន់តំណែងជាអគ្គលេខាបក្ស និងជាប្រធានាធិបតី ជំនួសលោកហ៊ូ ជិនតាវ។ ចំណែកឯតំណែងនាយករដ្ឋមន្រ្តីវិញ ទំនងជានឹងត្រូវផ្ទេរទៅឲ្យលោកលី ខឺឈាំង (Li Keqiang) ដែលបច្ចុប្បន្នជាឧបនាយករដ្ឋមន្រ្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ