រដ្ឋមន្ត្រីក្រសួងមហាផ្ទៃឆ្លើយឆ្លងលើកដំបូងមកលោកជា មុនី
គឺជាលើកដំបូងហើយ ដែលលោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានឆ្លើយ តបនឹងលិខិតរបស់លោក ជា មុនី ប្រធានសហជីពសេរីកម្មករ។ នោះគឺលោក ស ខេង បានស្នើឲ្យលោកជាមុនី ជួយចលនាអប់រំ ណែនាំដល់កម្មករ ដែលធ្វើបាតុកម្ម សូមចៀសវាងការប្រើអំពើហិង្សាឬក៏បិទផ្លូវ នៅពេលតវ៉ា។ លោកជាមុនី បានសរសេរលិខិតគាំទ្របទបញ្ជារបស់លោក ស ខេង ដែលបានហាមមិនឲ្យកម្លាំងប្រដាប់អាវុធ ប្រើអំពើហិង្សាលើកម្មករតវ៉ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
ក្នុងលិខិតចុះថ្ងៃទី២៨ ខែកុម្ភៈ ឆ្នាំ២០១២ ដែលបានបញ្ជូនទៅដល់សហជីពសេរីកម្មករនៅព្រឹកថ្ងៃពុធនេះ លោក ស ខេង រដ្ឋមន្ត្រីក្រសួងមហាផ្ទៃ បានអរគុណលោកជាមុនី ដែលបានសរសេរលិខិត ដើម្បីសម្តែងនូវការគាំទ្រ និងអបអរសាទរចំពោះអនុសាសន៍របស់លោករដ្ឋមន្ត្រី ដែលបានណែនាំអាជ្ញាធរមានសមត្ថកិច្ច និងកងកម្លាំងនគរបាលជាតិ ត្រូវចៀសវាងដាច់ខាតការប្រើប្រាស់កាំភ្លើង និងអំពើហិង្សា ក្នុងការទប់ស្កាត់បាតុកម្ម កូដកម្ម ឬការតវ៉ានានា របស់កម្មករ និងប្រជាពលរដ្ឋ។
ក្នុងលិខិត លោក ស ខេង បានលើកឡើងថា បទបញ្ជាខាងលើនេះ ជាគោលការណ៍ដឹកនាំរបស់រដ្ឋាភិបាលកម្ពុជា ដែលមានលោក ហ៊ុនសែន ជាប្រមុខ។ ជាមួយគ្នានោះ លោកសខេងបានស្នើលោកជាមុនី ក្នុងនាមជាប្រធានសហជីពសេរីកម្មករ សូមជួយចលនា អប់រំណែនាំ ដល់កម្មករកម្មការិនីយើងដែលធ្វើបាតុកម្ម កូដកម្ម ឬតវ៉ានានា សូមជៀសវាងការប្រើអំពើហិង្សានានា ដូចជាកាន់ដំបង គប់ដបសាំង គប់ដុំថ្ម ឬដុំឥដ្ឋ...។ល។ មកលើសមត្ថកិច្ច ឬវាយបំផ្លាញរោងចក្រ ឬបិទផ្លូវមិនឲ្យសាធារណជនធ្វើចរាចរណ៍..."។
លោក ស ខេង បានគូសបញ្ជាក់ថា ការតវ៉ា ត្រូវធ្វើដោយសន្តិវិធី តាមរយៈការចរចាដោះស្រាយជាមួយអ្នកពាក់ព័ន្ធ និងត្រូវធានាថា ការធ្វើបាតុកម្ម ឬកូដកម្ម ត្រូវអនុវត្តឲ្យបានហ្មឹងម៉ាត់ តាមច្បាប់ស្តីពីការធ្វើបាតុកម្មដោយសន្តិវិធី។
នៅថ្ងៃពុធនេះ លោកជាមុនី បានទទួលយកការពឹងពាក់របស់លោករដ្ឋមន្ត្រីក្រសួងមហាផ្ទៃ ដែលបានធ្វើលិខិតឆ្លើយតបជាលើកដំបូង។ លោកជាមុនី សន្យាថា លោកនឹងអប់រំកម្មករ កុំឲ្យប្រើអំពើហិង្សា នៅពេលតវ៉ា។ ក៏ប៉ុន្តែតាមលោកជាមុនី អំពើហិង្សា កើតឡើងដោយសារតែភាគីថៅកែរោងចក្រ និងប៉ូលិស រំលោភលើកម្មករ ដែលជាអ្នកទន់ខ្សោយ។ លោកជាមុនី ស្នើឲ្យមានការគោរពតាមបទបញ្ជារបស់លោករដ្ឋមន្ត្រីក្រសួងមហាផ្ទៃ ហើយភាគីថៅកែរោងចក្រ ក៏ត្រូវដោះស្រាយការទាមទាររបស់កម្មករភ្លាមៗផងដែរ។
នៅរយៈពេលចុងក្រោយនេះ លោកជាមុនី បានបង្ហាញភាពស្និទ្ធស្នាលនឹងរដ្ឋាភិបាល។ កាលពីចុងឆ្នាំ២០១១ លោកនាយករដ្ឋមន្ត្រី ហ៊ុន សែន បានអនុញ្ញាតឲ្យមានការរៀបចំសាងសង់រូបសំណាកលោកជាវិជ្ជា អតីតប្រធានសហជីពកម្មករ និងជាបងប្រុសរបស់លោកជាមុនី ដែលត្រូវបានគេបាញ់សម្លាប់ កាលពីខែមករាឆ្នាំ២០០៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ