កម្ពុជា-អាស៊ាន-អឺរ៉ុប

អ្នកវិនិយោគបារាំងនឹងចូលរួមកិច្ចប្រជុំកំពូលសេដ្ឋកិច្ចអាស៊ាន-អឺរ៉ុប

អ្នកវិនិយោគបារាំងចំនួន២៥នាក់មកពី២០ក្រុមហ៊ុននឹងចូលរួមកិច្ចប្រជុំកំពូលសេដ្ឋកិច្ចអាស៊ាន-អឺរ៉ុបនៅថ្ងៃស្អែក។ អាស៊ានបាននិងកំពុងក្លាយទៅជាទីផ្សារសេដ្ឋកិច្ចដ៏មានសក្តានុពលរបស់ប្រទេសមហាអំណាចសេដ្ឋកិច្ចពិភពលោក។

ចុះផ្សាយនៅថ្ងៃ៖ 31/03/2012 - 14:48

វិមានសន្តិភាព ឬទីស្តីការគណៈរដ្ឋមន្ត្រី ©ចាន់ណា

ផ្សាយពាណិជ្ជកម្ម

អ្នកវិនិយោគបារាំងចំនួន២៥នាក់មកពីសហគ្រាសបារាំងចំនួន២០មកដល់ប្រទេសកម្ពុជានៅថ្ងៃសៅរ៍នេះ ហើយពួកគេនឹងចូលរួមកិច្ចប្រជុំកំពូលសេដ្ឋកិច្ចអាស៊ាន-អឺរ៉ុបនៅថ្ងៃស្អែកនៅទីក្រុងភ្នំពេញ។ នៅក្នុងកិច្ចប្រជុំកំពូលសេដ្ឋកិច្ចអាស៊ាន-អឺរ៉ុប អ្នកវិនិយោគបារាំងនឹងជជែកគ្នាអំពីចក្ខុវិស័យវិនិយោគនៅក្នុងប្រទេសកម្ពុជានិងទំនាក់ទំនងសេដ្ឋកិច្ចនៃតំបន់ទាំងពីរគឺតំបន់អាស៊ាននិងតំបន់អឺរ៉ូ។ ឯកអគ្គរដ្ឋទូតបារាំងប្រចាំនៅក្នុងប្រទេសកម្ពុជាបានថ្លែងនៅក្នុងសេចក្តីថ្លែងការណ៍របស់ខ្លួនថា អាស៊ានគឺជាតំបន់សេដ្ឋកិច្ចមួយប្រកបដោយថាមពលខ្លាំងក្លា។ ការផ្លាស់ប្តូរពាណិជ្ជកម្មអាស៊ាននិងអឺរ៉ុបមានទំហំធំធេង។

សេចក្តីថ្លែងការណ៍របស់ស្ថានទូតបារាំងប្រចាំនៅកម្ពុជាបានលើកឡើងថា អ្នកជំនួញជនជាតិបារាំងដែលកំពុងមានវត្តមាននៅកម្ពុជានឹងចែករំលែកបទពិសោធន៍និងចំណេះដឹងដែលខ្លួនមានទៅកាន់កិច្ចប្រជុំកំពូលសេដ្ឋកិច្ចអាស៊ាន-អឺរ៉ុប។ មិនត្រឹមតែប៉ុណ្ណោះ អ្នកជំនួញបារាំងអាចលើកឡើងផងដែរពីគម្រោងវិនិយោគថ្មីៗនៅក្នុងប្រទេសក្រីក្រកម្ពុជានាពេលអនាគត។
សេចក្តីថ្លែងការណ៍ដដែលបានគូសបញ្ជាក់ថា កាលពីឆ្នាំ២០១១កន្លងមក ការផ្លាស់ប្តូរពាណិជ្ជកម្មរវាងកម្ពុជានិងបារាំងមានទំហំទឹកប្រាក់ជាង២០០លានអឺរ៉ូ។ ប្រទេសបារាំងគឺជាប្រទេសនាំចូលអង្ករពីប្រទេសកម្ពុជាច្រើនជាងគេក្នុងចំណោមប្រទេសក្នុងសហភាពអឺរ៉ុប។ ប្រទេសបារាំងបាននាំចេញទំនិញមួយចំនួនមកក្នុងប្រទេសកម្ពុជាវិញក្នុងនោះមាន៖ផលិតផលឳសថ ផលិតផលកសិ-ចំណីអាហារនិងផលិតផលសម្អាង។

កាលពីឆ្នាំ២០១០កន្លងមក ប្រទេសបារាំងបានបោះទុនវិនិយោគជាង១០០លានអឺរ៉ូនៅក្នុងប្រទេសកម្ពុជាក្នុងវិស័យសំណង់ អចលនទ្រព្យនិងប្រេងឥន្ធនៈ។ នាពេលបច្ចុប្បន្ននេះ ក្រុមហ៊ុនបារាំងចំនួន៥០កំពុងប្រតិបត្តិការនៅក្នុងប្រទេសកម្ពុជាដោយប្រើប្រាស់កម្លាំងពលកម្មជិត៥០០០នាក់។
សូមបញ្ជាក់ថា វត្តមានរបស់ក្រុមហ៊ុនបារាំងនៅលើទឹកដីប្រទេសកម្ពុជានៅពេលនេះគឺបានធ្វើឡើងស្របពេលដែលប្រធានាធិបតីនៃប្រទេសចិនប្រជាមានិតកំពុងទស្សនកិច្ចនៅក្នុងប្រទេសកម្ពុជាដែរ។ ការផ្លាស់ប្តូរពាណិជ្ជកម្មរវាងប្រទេសកម្ពុជានិងប្រទេសចិនមានទំហំទឹកប្រាក់ជាង២០០០លានដុល្លារអាមេរិកកាលពីឆ្នាំ២០១១កន្លងមក។ ក្រៅពីប្រទេសចិននិងប្រទេសបារាំង អ្នកវិនិយោគអាមេរិកនិងជប៉ុនបាននិងកំពុងសម្លឹងមើលទីផ្សារកម្ពុជាផងដែរ៕