ក្រុមហ៊ុនម៉ាឡេស៊ីអ៊ែរឡាញត្រដរខ្យល់ក្រោយសោកនាដកម្មធ្លាក់យន្តហោះផ្ទួនៗ
ចុះផ្សាយនៅថ្ងៃ៖
ស្តាប់ - ០៥:៣១
ជិត១០ក្រោយការធ្លាក់យន្តហោះ Boeing MH17 មឈូសដឹកសាកសព២២៧នាក់ បានទៅដល់ប្រទេសហូឡង់ ! ដូច្នេះត្រូវនៅខ្វះ ៧១នាក់ទៀត ដែលនៅកប់ក្នុងគំនរខ្មោចយន្តហោះ នៅភាគខាងកើតប្រទេសអ៊ុយក្រែន។ ការរុករកនៅតែបន្ត ! ក្រុមអ្នកឯកទេសហូឡង់ត្រូវទៅដល់កន្លែងគ្រោះថ្នាក់ ប៉ុន្តែការងារត្រូវជួបការលំបាកខ្លាំង ព្រោះការប្រយុទ្ធគ្នារវាងកងទ័ពរដ្ឋាភិបាលអ៊ុយក្រែន និងពួកឧទ្ទាមកាន់តែរំកិលមកជិតកន្លែងយន្តហោះធ្លាក់។ នៅថ្ងៃនេះ ឯកអគ្គរដ្ឋទូតហូឡង់ និងម៉ាឡេស៊ី បានរៀបចំដង្ហែក្បួនរួមគ្នា ក្នុងអត្ថន័យប្រយុទ្ធប្រឆាំងនឹងភេរវកម្ម ដោយមានការចូលរួមពីសំណាក់ប្រជាជនជាច្រើនពាន់នាក់ នៅទីក្រុងគៀវ។ ឯចំណែកក្រុមហ៊ុនអាកាសចរណ៍ម៉ាឡេស៊ីអ៊ែរឡាញវិញ ថ្វីបើបាននិងកំពុងនឹងបន្តសកម្មភាពដឹកជញ្ជូនអ្នកដំណើរមែន ប៉ុន្តែឥទ្ធិពល នៃធ្លាក់យន្តហោះនេះផ្តើមជះ ចំហាយអាក្រក់ ជោគវាសនាក្រុមហ៊ុនជាបណ្តើរហើយ។
ការប្រយុទ្ធប្រដាប់រំខានការងារអង្កេតរបស់ក្រុមជំនាញ
ការងារស៊ើបអង្កេត មានលក្ខណៈស្មុគស្មាញខ្លាំងណាស់ ដោយហេតុតំបន់ធ្លាក់យន្តហោះនោះ ជាតំបន់ប្រយុទ្ធគ្នារវាងកងទ័ពរដ្ឋាភិបាល និងពួកឧទ្ទាម។ លើសពីនេះទៅទៀត នៅថ្ងៃនេះ កងទ័ពអ៊ុយក្រែន បានបន្តយុទ្ធនាការប្រយុទ្ធប្រឆាំងនឹងពួកចង់ផ្តាច់ទឹកដី ស្និទ្ធនឹងរុស្ស៊ី ដើម្បីសាកល្បងដណ្តើមយកក្រុងដូណេត និងលូហ្កង់មកវិញ។
ក្រុមជំនាញហូឡង់ ៣០នាក់ ត្រូវអញ្ជើញទៅកន្លែងធ្លាក់យន្តហោះ ដែលមានទីតាំងនៅភាគខាងកើត តាមរយៈកិច្ចព្រមព្រៀងរវាងអង្គការសន្តិសុខនិងសហប្រតិបត្តិការអឺរ៉ុប ជាមួយពួកឧទ្ទាម។ អាជ្ញាធរម៉ាឡេស៊ី ក៏ទើបបានប្រកាសអំបាញ់មិញដែរថា បានព្រមព្រៀងជាមួយពួកបះបោរនៅភាគខាងកើតអ៊ុយក្រែន បើកផ្លូវឱ្យមានបេសកកម្មប៉ូលិសអន្តរជាតិ។ ប៉ុន្តែប្រតិបត្តិការនេះទំនងជាត្រូវលើកពេល ឬលុបចោលទៅវិញ ដោយហេតុតែមានការប្រយុទ្ធគ្នាខ្លាំងពេក។
ថ្នាក់ដឹកនាំអូស្ត្រាលី និងហូឡង់ កំពុងពិចារណាគ្នា រកមធ្យោបាយការពារសុវត្ថិភាពកន្លែងធា្លក់យន្តហោះ។ ប៉ូលិសប្រដាប់អាវុធអូស្ត្រាលី នឹងមកដល់ភាគខាងកើតអ៊ុយក្រែន នៅសប្តាហ៍ក្រោយ។ អូស្ត្រាលីនិងហូឡង់ ដែលជាអ្នករងគ្រោះខ្លាំងជាងគេពីការធ្លាក់យន្តហោះម៉ាឡេស៊ី MH17នេះ ត្រៀមបញ្ជូនកងពលរបស់ខ្លួន មកអ៊ុយក្រែនក្នុងក្របខ័ណ្ឌប៉ូលិសអន្តរជាតិ ដើម្បីធានាឱ្យបានសន្តិសុខសុវត្ថិភាពកន្លែងយន្តហោះធ្លាក់ ប្រមូលបំណែកសាកសពជនរងគ្រោះដែលនៅសេសសល់ និងឱ្យក្រុមអ្នកធ្វើការជាលក្ខណៈឯករាជ្យ។
ក្រុមហ៊ុនម៉ាឡេស៊ីអ៊ែរឡា ជួបវិបត្តិហិរញ្ញវត្ថុខ្លាំង ត្រូវការជំនួយជាបន្ទាន់ !
មែនហើយ ! គ្រប់ក្រុមហ៊ុនអាកាសចរណ៍ស៊ីវិលទាំងអស់ តែងតែត្រដរខ្សល់នៅពេលបាត់បង់យន្តហោះ ផ្ទុកពេញទៅដោយអ្នកដំណើរ ហើយកាន់តែយ៉ាបយឺនពិសេសទៅទៀត បើក្រុមហ៊ុនកំពុងខាតបង់ស្រេច។ យ៉ាងណាមិញ ក្រុមហ៊ុនម៉ាឡេស៊ី ពិតជាមិនអាចចៀសផុតពីវិបត្តិបានឡើយ ព្រោះក្នុងរយៈពេលតែប៉ុន្មានខែ ក្រុមហ៊ុនបាត់បង់យន្តហោះដល់ទៅពីរគ្រឿង។
បើតាមអ្នកវិភាគ Malaisia Airlines ពេលនេះត្រូវការអន្តរាគមន៍ជាបន្ទាន់ពីមូលនិធិវិនិយោគសាធារណៈដែលមានភាគហ៊ុន៦៩% និងចាំបាច់ត្រូវសើរើ ឡើងវិញរចនាសម្ព័ន្ធឱ្យដល់ឬសគល់ បើចង់មានមុខមានមាត់ឡើងវិញ។ ស្ថានភាពហិរញ្ញវត្ថុរបស់ក្រុមហ៊ុន មានលក្ខណៈដុបដាបខ្លាំងណាស់ តែយ៉ាងណាក៏ដោយ ក៏ក្រុមហ៊ុនអាចស្តារបានដែរ។ មានក្រុមហ៊ុនអាកាសចរណ៍ស៊ីវិលច្រើនមកហើយ មានជាអាទិ៍ ក្រុមហ៊ុនកូរ៉េអ៊ែរ ឬឥណ្ឌូណេស៊ី ហ្ការ៉ូដា ដែលដាំដូងចុះ តែអាចងើបឡើងវិញបាន។
ប្រសិនបើរដ្ឋាភិបាលម៉ាឡេស៊ីមិនចូលជួយចូកជួយចែវទេ ស្នើផែនការយុទ្ធសាស្ត្រថ្មីទេ នោះក្រុមហ៊ុននឹងត្រូវស្លាប់តែម្តង ! ត្រដររស់បានត្រឹមតែ៦ខែទៀតប៉ុណ្ណោះ។ ជាច្រើនឆ្នាំមកហើយដែលចំនួនអ្នកដំណើរជិះម៉ាឡេស៊ីអ៊ែរឡាញបានធ្លាក់ចុះ ហើយខាតបង់កាន់តែធំធេង នៅពេលមានគ្រោះបាត់យន្តហោះMH370 កាលពីថ្ងៃទី ៨មីនា ២០១៤។ នៅថ្ងៃទី ១៧កក្កដា យន្តហោះMH17មួយគ្រឿងបានធា្លក់សម្លាប់ជីវិតមនុស្សអស់ ២៩៨នាក់ ដូចជាបានធ្លាក់ពន្លិចក្រុមហ៊ុនឱ្យកាន់តែផុងជ្រៅក្នុងវិបត្តិ។
អ្នកដំណើរថយចុះ រដ្ឋាភិបាលមានភារកិច្ចជួយស្រោចស្រង់
យន្តហោះMH17 ធ្លាក់ គ្មានពាក់ព័ន្ធនឹងក្រុមហ៊ុន ឬបញ្ហាសុវត្ថិភាពទេ ! បើតាមប្រភពអាមេរិក យន្តហោះប៊ូអ៊ីននេះបានធ្លាក់ព្រោះគ្រាប់មីស៊ីលរបស់ពួកឧទ្ទាមចង់ផ្តាច់ទឹកដីនៅភាគខាងកើតអ៊ុយក្រែន វាមិនគួរមានអ្វីប៉ះពាល់ដល់ការកក់ ទិញ ឬការជ្រើសរើសជិះយន្តហោះក្រុមហ៊ុនម៉ាឡេស៊ីនេះឡើយ ប៉ុន្តែគួរឱ្យសោកស្តាយ អ្នកដំណើរអន្តរជាតិទាំងឡាយបានចង់ចាំនិងភ្ជាប់ឈ្មោះក្រុមហ៊ុនម៉ាឡេស៊ីទៅនឹងសោកនាដកម្មធ្លាក់យន្តហោះ ! មិនគិតដល់ពីមូលហេតុដើមឡើយ ! ម៉ាឡេស៊ីអ៊ែរឡាញ បែរជាមានន័យថាគ្រោះថ្នាក់ធ្លាក់យន្តហោះ ចំណាត់ការមិនល្អ គ្មានវិន័យ ឬកត្តាអវិជ្ជមានផ្សេងទៀត...
អ្នកវិភាគខ្លាំងព្រួយបារម្ភ និងព្យាករថា មូលនិធិវិនិយោគជាតិ ដែលមានភាគហ៊ុន៦៩% អាចនឹងដកក្រុមហ៊ុនម៉ាឡេស៊ីអ៊ែរឡាញចេញពីទីផ្សារភាគហ៊ុន និងចេញវិធានការដ៏តឹងតែង កាត់បន្ថយចំណាយ និងកំណែទម្រង់ផ្សេងៗទៀត។ ចំណាត់ការមិនល្អ រដ្ឋាភិបាលជ្រៀតជ្រែក បុគ្គលិកច្រើនហួសតម្រូវការ សហជីពចេះតែស្រែកប្រឆាំង រាល់ការប្តូរផ្លាស់ បានធ្វើឱ្យក្រុមហ៊ុនជួបការលំបាកខ្លាំង ឥលូវត្រូវមកជួបគ្រោះធ្លាក់និងបាត់យន្តហោះទៀត។
ប៉ុន្តែនេះមិនមែនមានន័យថាម៉ាឡេស៊ីអ៊ែរឡាញគ្មានថ្ងៃរស់ឡើងវិញនោះឡើយ ! កាលពីទសវត្សរ៍ឆ្នាំ៩០ ក្រុមហ៊ុនកូរ៉េ និងឥណ្ឌូណេស៊ី បានខាតបង់ធ្ងន់ធ្ងរ បន្ទាប់ពីមានគ្រោះថ្នាក់ធ្លាក់យន្តហោះតែដល់ពេលប្តូរយុទ្ធសាស្ត្រ ប្តូរអ្នកដឹកនាំ ក្រុមហ៊ុនអាកាសចរណ៍ឥណ្ឌូណេស៊ី បានប្រសើរឡើង ឯក្រុមហ៊ុនកូរ៉េ បានក្លាយជាក្រុមហ៊ុនគំរូទៀតផង។ ដូច្នេះករណីម៉ាឡេស៊ីអ៊ែរឡាញដូចគ្នា ពេលនេះគេត្រូវរំពឹងលើរដ្ឋាភិបាលនិងម្ចាស់មូលនិធិក្នុងការស្តារកត្តិយសឡើងវិញ ព្រោះការស្តារក្រុមហ៊ុនម៉ាឡេស៊ី ក៏ដូចជាស្តារវិស័យទេសចរណ៍ ដែលរដ្ឋាភិបាលចាត់ទុកជាអាទិភាពមួយចង់ធ្វើការអភិវឌ្ឍន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ