ក្រុមប្រទេសផ្តល់ជំនួយ ៖ ស្ថានការណ៍ទូទៅនៅក្នុងប្រទេសម៉ាលីមានលក្ខណៈវិជ្ជមាន
ចុះផ្សាយនៅថ្ងៃ៖
ស្តាប់ - ០៥:០៣
កាលពីជិតមួយឆ្នំាមុន ពោលគឺនៅថ្ងៃទី១៥ ឧសភា ឆ្នំា ២០១៣ សន្និសីទនៃក្រុមប្រទេសផ្តល់ជំនួយឲ្យម៉ាលីបានរៀបចំធ្វើម្តងហើយនៅក្នុងទីក្រុងព្រុចសែល ប្រទេសបែលហ្ស៊ិក។ គឺនៅកន្លែងដដែលនោះឯងដែលក្រុមប្រទេសផ្តល់ជំនួយឲ្យម៉ាលីបានរួមប្រជុំគ្នាជាថ្មីនៅថ្ងៃពុធ ទី៥ កុម្ភៈ ឆ្នំា ២០១៤។ កម្មវត្ថុនៃសន្និសីទលើកទី២ ពេលនេះ គឺដើម្បីស្វែងយល់អំពីស្ថានភាពជំនួយដែលបានសន្យាកាលពីលើកទី១ ក្នុងខែឧសភា ឆ្នំា ២០១៣ ពិសេសចង់ដឹងថា តើមានចំនួនលុយប៉ុន្មានដែលរដ្ឋម៉ាលីបានទទួល និងថា តើការចំណាយទំាងអស់មានបានបម្រើចំគោលដៅរបស់វា ឬអត់។
បន្ទាប់ពីបានជួបប្រជុំគ្នាចុងក្រោយកាលពីខែវិច្ឆិកា ឆ្នំា ២០១៣ ក្នុងទីក្រុងបាម៉ាកូ ប្រទេសម៉ាលី ក្រុមតំណាងរដ្ឋាភិបាលម៉ាលី និងក្រុមតំណាងប្រទេសផ្តល់ជំនួយបានរួមប្រជុំគ្នាជាថ្មីនៅក្នុងទីក្រុងព្រុចសែល ប្រទេសបែលហ្ស៊ិក។ កម្មវត្ថុនៃកិច្ចប្រជុំលើកទី២ក្នុងទីក្រុងប្រទេសបែលហ្ស៊ិកលើកនេះ មិនមែនដើម្បីស្វែងរកជំនួយបន្ថែមទេ តែគឺដើម្បីផ្ទៀងផ្ទាត់ ពិនិត្យអំពីទឹកប្រាក់ជំនួយចំនួន ៣ ៣០០លានអឺរ៉ូដែលប្រទេសផ្តល់ជំនួយបានសន្យាផ្តល់ឲ្យម៉ាលីកាលពីខែឧសភា ឆ្នំា ២០១៣ កន្លងទៅ។ ក្នុងចំនួនទឹកប្រាក់ ៣ ៣០០លានអឺរ៉ូនោះ មានប្រាក់ជំនួយឥតសំណង និងប្រាក់កម្ចីមានអត្រាការប្រាក់ទាប។ តុល្យការបានបង្ហាញឲ្យឃើញថា មានប្រាក់ចំនួន ២ភាគ៣នៃចំនួនទឹកប្រាក់សន្យាសរុបទំាង ៣ ៣០០លានអឺរ៉ូត្រូវបានបញ្ជូនរួចហើយ។
ដូច្នេះជំហានបន្ទាប់សម្រាប់ក្រុមប្រទេសផ្តល់ជំនួយ គឺការពិនិត្យ ផ្ទៀងផ្ទាត់ការចាយវាយលើប្រាក់ជំនួយ និងប្រាក់កម្ចីពីសំណាក់រដ្ឋាភិបាលទីក្រុងបាម៉ាកូ។ ជាទូទៅ ក្រុមប្រទេសផ្តល់ជំនួយបានសម្តែងការពេញចិត្តចំពោះការងារប្រកបដោយតម្លាភាពរបស់ម៉ាលី។ អ្នកដែលបានកោតសរសើរមុនគេ គឺលោកអនុប្រធានគណៈកម្មការអឺរ៉ុបម៉ាគូស ករណារ៉ូ (Markus Cornaro)។ លោកករណារ៉ូដែលបានគូសបញ្ជាក់ថា រដ្ឋាភិបាលម៉ាលីត្រូវតែទទួលបានការសរសើរពីការខិតខំប្រឹងប្រែងរបស់ខ្លួនក្នុងរយៈពេលប៉ុន្មានខែចុងក្រោយនេះ។ ការប្រឹងប្រែងនៅក្នុងយុទ្ធនាការប្រយុទ្ធប្រឆំាងនឹងអំពើពុករលួយ បង្កើនបរិយាកាសនៅក្នុងសង្គមទូទៅ និងវិធានការចំាបាច់មួយចំនួនជាលើកដំបូងក្នុងការនំាជនភៀសខ្លួន និងអ្នកផ្លាស់ប្តូរលំនៅដ្ឋានឲ្យវិលមកកាន់ផ្ទះសម្បែងវិញជាដើម។
បច្ចុប្បន្ននេះ កម្មវិធីរៀបចំនំាជនភៀសខ្លួន និងអ្នកផ្លាស់ប្តូរលំនៅដ្ឋានចំនួន ៤២៣ ០០០នាក់កំពុងមានដំណើរការទៅមុខគួរឲ្យកត់សម្គាល់។ ក្នុងខែតុលាកន្លងទៅ មានជនភៀសខ្លួនចំនួន ៦ ០០០នាក់បានវិលទៅកាន់លំនៅដ្ឋានដើមរបស់ខ្លួនវិញហើយ។ ក្រៅពីវិធានការនំាជនភៀសខ្លួន និងអ្នកផ្លាស់ប្តូរលំនៅដ្ឋានទៅកាន់កន្លែងដើមវិញ រដ្ឋាភិបាលក៏បានបង្កើតកម្មវិធីអភិវឌ្ឍន៍សេដ្ឋកិច្ចដោយផ្តោតសំខាន់លើការបង្កើតប៉ូលអភិវឌ្ឍន៍វិស័យកសិកម្ម។ ទន្ទឹមគ្នានេះ រដ្ឋាភិបាលក៏បានកសាង និងដាក់ឲ្យដំណើរការឡើងវិញនូវហេដ្ឋារចនាសម្ព័ន្ធមួយចំនួនដែលខូចខាតដោយសារសង្រ្គាម ពិសេសសាលារៀន។
សម្រាប់អង្គការមនុស្សធម៌ Oxfam ដែលបានតាមដានស្ថានការណ៍នៅម៉ាលីនាប៉ុន្មានខែក្រោយការបោះឆ្នោត ក៏បានទទួលស្គាល់ពីស្ថានការណ៍ចម្រើនទៅមុខរបស់ម៉ាលីដែរ។ តែទន្ទឹមគ្នានេះ Oxfam ក៏បានផ្តល់អនុសាសន៍អាទិភាពមួយចំនួនដើម្បីអាចទទួលបានអភិបាលកិច្ចល្អ ទី១ រៀបចំពង្រឹងប្រព័ន្ធតុលាការសម្រាប់គ្រប់គ្នា ទី២ អនុវត្តន៍នយោបាយផ្សះផ្សាជាតិដោយរួមសហការណ៍ជាមួយគ្រប់សហគមន៍ ទី៣ បន្តយុទ្ធនាការប្រយុទ្ធប្រឆំាងនឹងអំពើពុករលួយ និងទី៤ ជំរុញស្រី្តភេទឲ្យចូលរួមច្រើនកុះករនៅក្នុងជីវិតនយោបាយ។ គឺនៅចំណុចទី៤ នេះហើយដែលនាយកអង្គការ Oxfam លោក Mohamed Coulibady បានព្យាយាមនិយាយសង្កត់ហើយ សង្កត់ទៀតថា វត្តមានស្រ្តីនៅក្នុងសង្គមជារឿងមួយចំាបាច់មិនអាចខ្វះបាន មិនថានៅក្នុងផ្នែកអប់រំ សុខភាព ឬក៏នយោបាយឡើយ។
សូមជម្រាបជូនថា គឺទើបតែនៅប៉ុន្មានខែក្រោយការជាប់ឆ្នោតប្រធានាធិបតីរបស់លោកអ៊ីប្រាហ៊ីម ប៊ូបាការ កេតា (Ibrahim Boubacar Keïta) ទេ ដែលស្ថានការណ៍ទូទៅនៅម៉ាលីបាន និងកំពុងវិលមករកភាពប្រក្រតីឡើងវិញបន្តិចម្តងៗ។ មានអាយុ ៦៨ឆ្នំា លោកអ៊ីប្រាហ៊ីម ប៊ូបាការ កេតា គឺជាឥស្សរជនម្នាក់ដែលមានភាពចាស់ទុំច្រើនខាងនយោបាយ និងដែលប្រជាជនម៉ាលីទូទៅចាត់ទុកលោក ជាមនុស្សស្គាល់ស្ថានការណ៍ប្រទេសច្បាស់លាស់ ព្រមទំាងយល់ដឹងអំពីកិត្តិយស និងសេចក្តីថ្លៃថ្នូររបស់ពលរដ្ឋម៉ាលី។ សក្ខីកម្មជាក់ស្តែងមិនអាចប្រកែកបាន គឺស្ថានការណ៍ល្អប្រសើររបស់ម៉ាលីដែលបាន និងកំពុងធ្វើឲ្យសហគមន៍អន្តរជាតិបង្កើនជំនឿទុកចិត្តនាពេលសព្វថ្ងៃនេះឯង។
តែទោះជាយ៉ាងនេះក្តី នៅមានបញ្ហាចម្បងមួយដែលលោកអ៊ីប្រាហ៊ីមត្រូវព្យាយាមសម្រេចឲ្យបាននាពេលខាងមុខ នោះគឺព្យាយាមផ្សះផ្សាប្រជាជនម៉ាលីនៅក្នុងប្រទេសមួយដែលបាន និងកំពុងបន្តហែកហួរគ្នា រហូតដល់គំរាមពុះប្រទេសជាពីរបំណែក ខាងជើង និងខាងត្បូង។ បំណងរបស់លោកអ៊ីប្រាហ៊ីម គឺរៀបចំតុមូលមួយដោយប្រមែប្រមូលភាគីជម្លោះគ្រប់ស្រទាប់វណ្ណៈ និងគ្រប់ជំនាន់ឲ្យមកអង្គុយជជែកគ្នាដើម្បីស្វែងរកផ្លូវកណ្តាលមួយដោយមានការយល់ព្រមទំាងអស់គ្នា។ ថ្មីៗនេះ គណៈប្រតិភូរបស់ក្រុមប្រឹក្សាសន្តិសុខអង្គការសហប្រជាជាតិក៏បានទៅធ្វើទស្សនកិច្ចរយៈពេល ២ថ្ងៃនៅប៉ែកខាងជើងម៉ាលី។
នៅក្នុងដំណើរទស្សនកិច្ចនោះ ក្រុមគណៈប្រតិភូបានជួបជជែកជាមួយក្រុមប្រដាប់អាវុធសំខាន់ៗចំនួន ៣ក្រុម ដែលបាន និងកំពុងទាមទារកាន់កាប់តំបន់ប៉ែកខាងជើងផ្តាច់ចេញពីរដ្ឋាភិបាលក្រុងបាម៉ាកូ។ ជាលទ្ធផល ក្រុមប្រដាប់អាវុធទំាង ៣ ក្រុមបាននិយាយសម្លេងតែមួយដូចគ្នា គឺការបើកកិច្ចចរចាជាមួយរដ្ឋាភិបាលក្រុងបាម៉ាកូភ្លាមៗ និងការគោរពអធិបតេយភាពរបស់ម៉ាលី។ ឃើញថា ទំាងនេះសុទ្ធសឹងជាចំណុចវិជ្ជមានមួយដែលបានបើកផ្លូវឲ្យគ្រប់ភាគីជម្លោះបន្តដោះស្រាយបញ្ហាដោយសន្តិវិធីរវាងគ្នានៅពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ