ប៉ូលិសបារាំងធ្វើបាតុកម្ម ច្រើនថ្ងៃជាប់គ្នា តវ៉ានឹងលក្ខខណ្ឌការងារ
យប់ថ្ងៃព្រហស្បតិ៍ម្សិលមិញ កងកម្លាំងប៉ូលិសនៅបារាំងបានបន្ត ធ្វើបាតុកម្មតវ៉ានឹងលក្ខខណ្ឌការងាររបស់ពួកគេ នៅតាមទីក្រុងជាច្រើន ក្នុងប្រទេស។ បាតុកម្មទាំងនេះ ធ្វើឡើង បន្ទាប់ពីមានហេតុការណ៍វាយប្រហារ ទៅលើរថយន្តប៉ូលិសមួយគ្រឿង កាលពីដើមខែ ធ្វើអោយកងកម្លាំងប៉ូលិស២នាក់ រងរបួសធ្ងន់ធ្ងរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៤
យប់ថ្ងៃព្រហស្បតិ៍ម្សិលមិញ ជាយប់ទី៤ នៃបាតុកម្មរបស់កងកម្លាំងប៉ូលិសបារាំង។ នៅទីលានTrocadéro ជិតអគារទេសចរ Tour Eiffel ប៉ូលិសជិត៥០០នាក់បានជួបជុំគ្នា តវ៉ាក្នុងភាពស្ងប់ស្ងៀម។ ពួកគេបានលើកបដា បង្ហាញកំហឹងពួកគេ និងទាមទារអោយរដ្ឋមន្ត្រីមហាផ្ទៃ និងអគ្គនាយកនគរបាលជាតិ ចុះពីតំណែង។ ប៉ូលិសខ្លះ បានសំដែងការគាំទ្រដល់អ្នករួមការងារខ្លួន ដែលរងរបួស ក្នុងពេលបំពេញការងារកន្លងមក។
ប៉ូលិសសន្ធឹកសន្ធាប់រាប់រយនាក់ផ្សេងទៀត នៅតំបន់ជាយក្រុងប៉ារីស និងនៅតាមខែត្រធំៗ ដូចជា Toulouse រឺក៏Bordeaux ក៏បានចេញតវ៉ាដូចគ្នាដែរ។ នៅខែត្រLyon ភាគកណ្តាល មានប៉ូលិសតវ៉ាដល់ទៅជាង៨០០នាក់។ បាតុកម្មប៉ូលិសបារាំងធ្វើឡើង បន្ទាប់ពីមានហេតុការណ៍វាយប្រហារ ទៅលើរថយន្តប៉ូលិសមួយគ្រឿង កាលពីថ្ងៃ៨តុលា ដើមខែ ធ្វើអោយកងកម្លាំងប៉ូលិស២នាក់ រងរបួសធ្ងន់ធ្ងរ។ ប៉ូលិសម្នាក់កំពុងស្ថិតក្នុងមន្ទិរពេទ្យនៅឡើយ។
ដើម្បីបន្ធូរកំហឹងប៉ូលិស ប្រធានាធិបតីបារាំង ហូឡង់ បានសន្យាជួបសហជីពប៉ូលិស នៅដើមសប្តាហ៍ក្រោយនេះ។ នាយករដ្ឋមន្ត្រី ម៉ានុយអែល វ៉ាល់ វិញ បានស្នើអោយប៉ូលិសបន្តចរចាជាមួយរដ្ឋាភិបាល។ រដ្ឋមន្ត្រីមហាផ្ទៃបានសន្យាឆ្លើយតបសំណូមពរប៉ូលិស។ រដ្ឋមន្ត្រីយុត្តិធម៌ ក៏បានសន្យាដាក់ទោសជនល្មើសដែលបង្កហិង្សាលើប៉ូលិស អោយទទួលទោសធ្ងន់ជាងមុនដែរ។
សកម្មជនសំខាន់ៗ មកពីបក្សប្រឆាំង របស់អតីតប្រធានាធិបតីសាកូហ្ស៊ី មានទាំងលោកសាកូហ្ស៊ីផងដែរ បាននាំគ្នាបន្ទោសរដ្ឋាភិបាលលោកហូឡង់ ថាទាល់តែជិតផុតអាណត្តិដឹកនាំ ទើបបានចង់ដោះស្រាយបញ្ហាប៉ូលិស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ