អង្គការអូតង់បារម្ភពីការចល័តនាវាចម្បាំងរុស្ស៊ី សំដៅទៅស៊ីរី
ថ្ងៃព្រហស្បតិ៍ម្សិលមិញ អង្គការអូតង់បានសំដែងការបារម្ភពីការចល័តនាវាចម្បាំងរុស្ស៊ី ជាច្រើនគ្រឿង កាត់ក្បែរប្រទេសអឺរ៉ុប សំដៅទៅស៊ីរី។ អូតង់បារម្ភថា នាវាផ្ទុកយន្តហោះរុស្ស៊ីអាចនឹងលួចចូលទៅទំលាក់គ្រាប់បែកនៅស៊ីរីបាន។ សហភាពអឺរ៉ុបបានប្រជុំគ្នា បន្តដាក់សម្ពាធលើរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៧
អង្គការអូតង់មិនសូវទុកចិត្តរុស្ស៊ីទេ ទោះបីជារុស្ស៊ីនិងកងទ័ពស៊ីរី បានយល់ព្រមអនុវត្តបទឈប់បាញ់ដែលកំពុងតែមាននៅតំបន់អាឡិប នៅស៊ីរីពេលនេះក្តី។ ម្សិលមិញនេះ លោកចេន ស្តូលតិនបឺរ ជាអគ្គលេខាធិការអូតង់ បានសំដែងការបារម្ភ ដោយប្រាប់ថា នាវាចម្បាំងរុស្ស៊ី កំពុងឆ្ពោះទៅមុខ សំដៅទៅសមុទ្រមេឌីទែររ៉ាណេ។ អូតង់គិតថា នាវាទាំងនេះ អាចចូលទៅបង្កើនការវាយលុកនៅអាឡិបបាន។
ម្សិលមិញនេះ អង់គ្លេសបានសង្កេតឃើញវត្តមាននាវាចម្បាំងរុស្ស៊ី៨គ្រឿង ក្នុងនោះមាននាវាផ្ទុកយន្តហោះAmiral Kouznetsov អាមៀរ៉ាល់ គូស្នេតសូវ។ ក្បួននាវាទាំងនេះធ្វើដំណើរឆ្ពោះទៅសមុទ្រមេឌីទែររ៉ាណេ។
រុស្ស៊ីប្រាប់ កាលពីថ្ងៃសៅរ៍ដែរថា នាវាផ្ទុកយន្តហោះខ្លួន មានផ្ទុកយន្តហោះប្រដេញ និងឧទ្ធម្ភាគចក្រច្រើនគ្រឿង ធ្វើដំណើរទៅស៊ីរី ដើម្បីពង្រឹងវត្តមានយោធារុស្ស៊ីក្នុងតំបន់នោះ។ សម្រាប់អង់គ្លេស រុស្ស៊ី ធ្វើសកម្មភាពយោធាបែបនេះ ដើម្បីចាំមើលប្រតិកម្មពីអូតង់។ ប្រទេសសមាជិកអូតង់កំពុងតាមដានសកម្មភាពយោធារុស្ស៊ីតទៅទៀត។
ម្សិលមិញ សហភាពអឺរ៉ុបបានដំឡើងសម្លេងដាក់រុស្ស៊ី ដោយគំរាមថា អាចដាក់ទណ្ឌកម្មថ្មីៗទៀត ប្រសិនបើរុស្ស៊ីនៅតែបន្តបង្កបទឧក្រិដ្ឋទំលាក់គ្រាប់បែក។ តាំងពីថ្ងៃ២២កញ្ញាមក ការទំលាក់គ្រាប់បែកនៅតំបន់គ្រប់គ្រងដោយក្រុមឧទ្ទាម ពីសំណាក់កងទ័ពស៊ីរីនិងរុស្ស៊ី បានសម្លាប់ជនស៊ីវិលរាប់រយនាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ