វិបត្តិស៊ីរី៖ បារាំងចេញមុខរកដំណោះស្រាយ ខណៈដែលអាមេរិកនិងរុស្ស៊ីលែងនិយាយគ្នា
ចុះផ្សាយនៅថ្ងៃ៖
ស្តាប់ - ០៧:៥៧
ពីរសប្តាហ៍ចុងក្រោយនេះ វិបត្តិស៊ីរីបានដុតរោលកំដៅកាន់តែខ្លាំងនៅលើឆាកអន្តរជាតិ រវាងប្រទេសមហាអំណាចធំៗទាំងពីរ សហរដ្ឋអាមេរិក និងរុស្ស៊ី ដែលម្នាក់ៗកំពុងតែធ្វើអន្តរាគមន៍យោធានៅស៊ីរី។ សហរដ្ឋអាមេរិក និងរុស្ស៊ី បានបែរខ្នងដាក់គ្នាជាផ្លូវការ បន្ទាប់ពីការចរចារកដំណោះស្រាយសន្តិភាពស៊ីរី បានបរាជ័យម្តងជាពីរដង។ រុស្ស៊ីដែលបានព្រមព្រៀងគ្នាទំលាក់អាវុធបណ្តោះអាសន្ន បែរជារឹតតែបញ្ជូនកម្លាំង បន្ថែមអាវុធទំនើបៗទៅកាន់ស៊ីរី ហើយបានបន្តទំលាក់គ្រាប់បែក ឥតលស់ថ្ងៃនៅតំបន់អាឡិប។ ថ្ងៃព្រហស្បតិ៍ទី ៦តុលានេះ លោករដ្ឋមន្ត្រីការបរទេសបារាំងកំពុងធ្វើដំណើរទៅមូស្គូ ដើម្បីនិយាយបញ្ហានេះជាមួយថ្នាក់ដឹកនាំរុស្ស៊ី។
សង្រ្គាមត្រជាក់កើតមានជាថ្មី?
ពាក្យសង្រ្គាមត្រជាក់ថ្មី ត្រូវបានអ្នកសារព័ត៌មានក៏ដូចជាអ្នកវិភាគទូទៅលើកយកមកនិយាយជារឿយៗ ទៅហើយ មួយរយៈពេលចុងក្រោយនេះ។ អ្នកខ្លះដល់ទៅហ៊ាននិយាយដល់ថា សង្រ្គាមលោកលើកទី៣ នឹងចាប់ផ្តើមទៀតផង។ តែយ៉ាងណា គ្រប់គ្នាមិនត្រូវនិយាយដើម្បីគ្រាន់តែធ្វើឲ្យមនុស្សផ្អើលទេ តែយើងគួរស្វែងយល់អំពីចំណុច ក៏ដូចជាធាតុផ្សំនីមួយៗ ដែលឈានមកដល់ជម្លោះបច្ចុប្បន្ននេះ។ ជាការពិត គិតមកត្រឹមពេលនេះ ម៉ោងនេះ រុស្ស៊ី និងអាមេរិក លែងមើលមុខគ្នាចំទៀតហើយ ក្នុងសំណុំរឿងស៊ីរី
តាំងពីដើមមកយើងដឹងហើយថា ក្នុងសំណុំរឿងស៊ីរី រុស្ស៊ីនិងសហរដ្ឋអាមេរិក ខ្វែងគំនិតគ្នារហូត។ រុស៊្សីគាំទ្រខាងរដ្ឋាភិបាលបាឆ្ហា អាល់អាសាដ បានចូលធ្វើអន្តរាគមន៍ដើម្បីការពាររដ្ឋាភិបាលនេះ។ ចំណែកសហរដ្ឋអាមេរិក និងប្រទេសលោកខាងលិច ដែលមិនពេញចិត្តបាឆ្ហា អាល់អាសាដ ដែលជាប្រធានាធិបតីផ្តាច់ការ បានចូលធ្វើអន្តរាគមន៍ ជួយខាងក្រុមឧទ្ទាមបះបោរ និងកងទ័ពសេរីរំដោះស៊ីរី។ អស់រយៈពេលជាច្រើនខែមកហើយ ដែលរុស្ស៊ី និងសហរដ្ឋអាមេរិក ព្យាយាមសាកល្បងនិយាយគ្នា ដើម្បីរកដំណោះស្រាយនយោបាយឲ្យស៊ីរី។ ការទម្លាក់អាវុធផ្អាកឈប់បាញ់បណ្តោះអាសន្ន បានចុះហត្ថលេខាជាច្រើនលើកមកហើយ ចុងក្រោយគឺនៅថ្ងៃទី៩ ខែកញ្ញា ឆ្នាំនេះ តែផ្ទុយទៅវិញ រុស្ស៊ីបន្តទំលាក់គ្រាប់បែកធ្វើព្រងើយ។
អ្វីដែលគេសង្កេតឃើញ គឺថា លោកចន ឃែរី ប្រមុខការទូតអាមេរិក ហាក់បាក់កំលាំងចិត្ត ហើយលែងចង់និយាយគ្នាជាមួយរុស្ស៊ីទៀតហើយ។ នេះក៏ដោយសារតែ ខាងរុស្ស៊ីប្រកែករហូត ទោះអ្នកណាសំណូមពរអ្វី ដាក់ផែនការរកដំណោះស្រាយអ្វី ក៏រុស្ស៊ីមិនស្តាប់ដែរ គឺដឹងតែធ្វើយ៉ាងណា បន្តទំលាក់គ្រាប់បែក ដើម្បីដណ្តើមយកក្រុងអាឡិបឲ្យបាន។ លោកចន ឃែរី បាននិយាយថា រុស្ស៊ីមានះចង់ឈ្នះណាស់ ទោះស្លាប់មនុស្សប៉ុន្មានអ្នកក៏ដោយ។
សម្រាប់អាមេរិក គឺមានន័យថា រុស្ស៊ីមិនញញើតអាមេរិក សូម្បីតែបន្តិច។ ហើយវាមិនមែនមានតែបញ្ហាស៊ីរីមួយទេ តែបញ្ហានេះ វាបានរាលដាលទៅដល់បញ្ហាផ្សេងទៀត រវាងរុស្ស៊ីនិងអាមេរិក។ តួយ៉ាងប៉ុន្មានថ្ងៃចុងក្រោយនេះ រុស្ស៊ីបានចាប់ផ្តើមសើររើ កិច្ចព្រមព្រៀងពីរធំៗជាមួយអាមេរិក។ តួយ៉ាង ថ្ងៃទី៣តុលា រុស្ស៊ីបានព្យួរកិច្ចព្រមព្រៀង ស្តីពីការចំរាញ់ធាតុព្លុយតូនីញ៉ូម ហើយក្រោយមកនៅថ្ងៃម្សិលមិញនេះ រុស្ស៊ីបានព្យួរកិច្ចព្រមព្រៀងស្តីពីកិច្ចសហប្រតិបត្តិការក្នុងការស្រាវជ្រាវផ្នែកថាមពលនុយក្លេអ៊ែរ។ ក្រសួងការបរទេសរុស្ស៊ីបានបញ្ជាក់ថា គេលែងទុកចិត្តអាមេរិកទៀតហើយ។ មហាអំណាចនុយក្លេអ៊ែរទាំងពីរ កំពុងចែកបក្សគ្នា ដូចកាលពីជំនាន់សង្រ្គាមត្រជាក់អញ្ចឹង។ តែអ្វីគួរឲ្យព្រួយបារម្ភនោះ គឺថាអំណាចនុយក្លេអ៊ែររបស់រុស្ស៊ីបច្ចុប្បន្ននេះ ខ្លាំងលើលជំនាន់សូវៀតច្រើនដងណាស់។
បញ្ហាស៊ីរី វាបានមកបន្ថែមពីលើបញ្ហាផ្សេងទៀត ដែលជាដំបៅជំលោះមានស្រាប់ រវាងអាមេរិក និងរុស្ស៊ី។ ជាក់ស្តែង បញ្ហាអ៊ុយក្រែន តំបន់គ្រីម៉េ បញ្ហាសន្តិសុខតំបន់អឺរ៉ុបខាងកើតរវាងអូតង់ និងរុស្ស៊ី ជាដើម។ ដូច្នេះ ម្នាក់ៗកាន់តែក្តៅស្លឹកត្រចៀករៀងៗខ្លួន។ យ៉ាងណាមិញ តាមព័ត៌មានលេចឮ គឺសហរដ្ឋអាមេរិក កំពុងត្រៀមអនុវត្តផែនការទីពីរ ព្រោះមើលទៅការចរចាជាមួយរុស្ស៊ីវាបានក្លាយជាផេះទៅហើយ។ ផែនការទីពីរនេះ បើតាមការស្មាន គឺគ្មានអ្វីក្រៅពីប្រើកម្លាំងទាហាន ទប់ទៅលើរុស្ស៊ីវិញនោះទេ។
រុស្ស៊ីបន្ថែមទ័ព និងសព្វាវុធទំនើប ដើម្បីត្រៀមតដៃ បើអាមេរិកសម្រេចចូលប្រកួត៖
ជាការពិតមែន រុស្ស៊ីបន្ថែមកម្លាំងច្រើនណាស់ ក្នុងប៉ុន្មានថ្ងៃចុងក្រោយនេះ។ កាលពីថ្ងៃពុធ ទី៥តុលា នាវាចម្បាំងមួយគ្រឿងរបស់រុស្ស៊ីឈ្មោះ Amiral Grigorovitch ទើបតែបានបើកឆ្លងកាត់ច្រកសមុទ្រផូស្វ័រ សំដៅទៅមូលដ្ឋានទ័ពរុស្ស៊ីនៅតំបន់Tartousនៅស៊ីរី។ នាវានេះអាចមានផ្ទុកមីស៊ីលអាកាស២៤គ្រាប់។ បន្ថែមពីនេះ មាននាវាតូចៗផ្សេងទៀត ដែលកំពុងធ្វើដំណើរទៅមក រវាងមូលដ្ឋានទ័ពនៅស៊ីរី និងកំពង់ផែសេបាស្ត្រូប៉ូល នៅគ្រីមេ ដើម្បីដឹកជញ្ជូនអាវុធបន្ថែម។ ក្រៅពីនេះទៀត រុស្ស៊ីបានប្រកាសទៀតថា ក្នុងខែនេះ នាវាផ្ទុកយន្តហោះចម្បាំងមួយគ្រឿងរបស់រុស្ស៊ី ឈ្មោះKuznetzov នឹងបើកសំដៅទៅធ្វើប្រតិបត្តិការនៅក្បែរស៊ីរី។ ពោលគឺ រុស្ស៊ីកំពុងបញ្ចេញអាវុធ មីស៊ីល នាវាចម្បាំង ដ៏ទំនើបៗបំផុតរបស់ខ្លួន។
ដោយឡែក បើតាមការផ្សាយរបស់បណ្តាញព័ត៌មានរុស្ស៊ី និងស៊ីរី បានឲ្យដឹងថារុស្ស៊ីបានបញ្ជូនកម្លាំងទាហ៊ានស្ម័គ្រចិត្តជាច្រើននាក់ ដើម្បីទៅសមរភូមិផ្ទាល់ ជួយខាងកងទ័ពរដ្ឋាភិបាលស៊ីរី។ តែព័ត៌មាននេះ នៅមិនទាន់មានការអះអាងជាផ្លូវការថាពិតរឺក៏អត់ទេ។
យ៉ាងណាក៏ដោយ ព័ត៌មានសំងាត់ស្តីពីផែនការត្រៀមជើងព្រួលរបស់រុស្ស៊ី ដើម្បីទប់ទៅនឹងការប្រើកំលាំងរបស់អាមេរិកនេះ ត្រូវបានបញ្ចេញឲ្យដឹងដោយមនុស្សសំខាន់ម្នាក់ ក្នុងជួរកងទ័ពរុស្ស៊ី។ ដូច្នេះយើងអាចសន្និដ្ឋានបានថា ការបញ្ជូនគ្រឿងសព្វាវុធ និងកម្លាំងបន្ថែមនេះ គឺជាផ្នែកមួយនៃផែនការត្រៀមតដៃជាមួយអាមេរិក។
បារាំងព្យាយាមចេញមុខដោះស្រាយបញ្ហា៖
ថ្ងៃព្រហស្បតិ៍ទី ៦ តុលា លោក ហ្សង់ម៉ាក អេរ៉ូ រដ្ឋមន្ត្រីការបរទេសបារាំងបានអញ្ជើញទៅទីក្រុងមូស្គូ ដើម្បីជួបនិយាយដោយផ្ទាល់ជាមួយរដ្ឋមន្ត្រីការបរទេសរុស្ស៊ី។ ច្រើនខែមកហើយ ដែលអាមេរិកព្យាយាមចរចាជាមួយរុស្ស៊ី តែនៅតែមិនបានផល រុស្ស៊ីនៅតែរឹងទទឹង។ តើសួរថា បារាំងមានទំងន់ប៉ុន្មានទៅក្នុងពេលនេះ ដើម្បីធ្វើឲ្យរុស្ស៊ីប្តូរចិត្ត? យើងមិនមែនមើលងាយបារាំងទេ តែកាលៈទេសៈនេះ គឺអ្នកវិភាគគ្រប់គ្នា យល់ថា បារាំងមិនអាចទៅជួយធ្វើឲ្យរុស្ស៊ី ត្រជាក់ចិត្តបានទេ។ រុស្ស៊ីកំពុងតែដើរជិតដល់ ផែនការចុងក្រោយរបស់ខ្លួនទៅហើយ ពោលគឺដណ្តើមយកតំបន់អាឡិបឲ្យបានដើម្បីប្រគល់ទៅឲ្យរដ្ឋាភិបាលបាឆ្ហា អាល់អាសាដ។ បើអាឡិបធ្លាក់ទៅក្នុងដៃរដ្ឋាភិបាលបាឆ្ហាវិញ គឺមានន័យថាក្រុមឧទ្ទាមស៊ីរី នឹងចាញ់ហើយ។
យ៉ាងណាក៏ដោយ យើងអាចស្វាគមន៍ និងអបអរស្ងើចសរសើរ ដល់ភាពក្លាហានរបស់បារាំង ដែលហ៊ានចេញមុខដោះស្រាយបញ្ហា។ កម្មវត្ថុចំបងរបស់បារាំងគឺ សង្រ្គោះប្រជាជនស៊ីរី ជាពិសេសប្រជាជនតំបន់អាឡិប។ ក្នុងកម្មវត្ថុនេះហើយ ទើបបារាំងមានគម្រោងដាក់ស្នើផែនការរបស់ខ្លួន ទៅក្រុមប្រឹក្សាសន្តិសុខ ឲ្យសម្រេចនៅចុងសប្តាហ៍នេះ។ ផែនការរបស់បារាំងនេះ គឺជាចំបង៖ ដាក់អាវុធបណ្តោះអាសន្នទាំងអស់គ្នា បញ្ជូនស្បៀងទៅជួយប្រជាជន ហាមឃាត់រាល់ការហោះកាត់ដោយយន្តហោះទាហាន ហើយចូលតុចរចាឡើងវិញ។
រុស្ស៊ី កំពុងចូលរួមធ្វើឧក្រិដ្ឋកម្មសង្រ្គាមជាមួយរដ្ឋាភិបាលស៊ីរី៖
កាលពីយប់ថ្ងៃពុធ មុនពេលចេញដំណើរទៅមូស្គូ លោក ហ្សង់ម៉ាកអេរ៉ូ រដ្ឋមន្ត្រីក្រសួងការបរទេសបារាំង បានមានប្រសាសន៍តាមទូរទស្សន៍ថា លោកទៅនិយាយជាមួយរុស្ស៊ី គឺនិយាយពីការពិតជាក់ស្តែង មិនមែនទៅថ្នាក់ថ្នមលោមចិត្តរុស្ស៊ីទេ។ លោកបន្ថែមថា រុស្ស៊ីកំពុងធ្វើទង្វើរអមនុស្សធម៌ មិនគប្បី យ៉ាងអាម្មាស ដែលបារាំងមិនអាចទទួលយកបានទេ។ បើរុស្ស៊ីចូលដៃធ្វើអំពើឧក្រិដ្ឋ រុស្ស៊ីត្រូវត្រៀមខ្លួនទទួលខុសត្រូវចំពោះមុខច្បាប់ទៅថ្ងៃមុខ។ គាត់បន្ថែមទៀតថា បើរុស្ស៊ីមិនឈប់ពេលនេះទេ គឺរុស្ស៊ីនឹងបង្ខំឲ្យបារាំងជ្រើសរើសយកជម្រើសប្រើកំលាំង ព្រោះបារាំងមានតួនាទីជួរមុខ ក្នុងការជួយប្រជាជនស៊ីរី។
យ៉ាងណាមិញ លោកបាន គីមូនវិញ បានមានប្រសាសន៍ដែរថា ទង្វើរដែររុស្ស៊ីនិងកងទ័ពបាឆ្ហា អាល់អាសាដកំពុងធ្វើនៅតំបន់អាឡិប គឺមិនខុសពីអំពើឧក្រិដ្ឋកម្មសង្រ្គាមទេ។ សំដីនេះគឺលោកបាន គីមូន បានសំដៅទៅដល់ការទំលាក់គ្រាប់បែកផ្ទួនៗ ទៅលើមន្ទីរពេទ្យពីរនៅអាឡិប ព្រមទាំងការបិទខ្ទប់ព័ត្រប្រជាជនប្រមាណជាជិត៣សែននាក់នៅទីនោះ ទៅណាមិនរួច គ្មានស្បៀងអាហារ។ នេះយើងនៅមិនរាប់ពីការដែលរុស្ស៊ីបានទំលាក់គ្រាប់ កំទេច រថយន្តដឹកស្បៀងមនុស្សធម៌ផង។
បន្ទាប់ពីមូស្គូ លោក ហ្សង់ម៉ាក អេរ៉ូ និងទៅក្រុងញូយ៉ក ដើម្បីជួបលោកចន ឃែរីទៀត។ យ៉ាងណាក៏ដោយ ចុងសប្តាហ៍នេះ បើសិនរុស្ស៊ីបោះឆ្នោតវេតូ ប្រឆាំងនឹងសំណើរបស់បារាំង គឺយើងនឹងអាចដឹងពីគោលជំហរពិតប្រាកដរបស់អាមេរិក និងបារាំង ថាត្រូវប្រើកម្លាំងរឺមិនប្រើជាមួយរុស្ស៊ី។ តែយើងកំភ្លេចថា អាណត្តិលោកអូបាម៉ា នៅសល់តែជាងមួយខែទៀតប៉ុណ្ណោះ។ រុស្ស៊ីដឹងពីចំណុចនេះ ទើបព្យាយាមឆក់ឱកាសនេះ ដើម្បីសង្គ្រប់លើអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ