កងកម្លាំងអ៊ីរ៉ាក់ បើកសមរភូមិដណ្តើមភាគខាងលិចម៉ូស៊ូល ពីដៃក្រុមជីហាតអង្គការរដ្ឋអ៊ីស្លាម
ចុះផ្សាយនៅថ្ងៃ៖
ស្តាប់ - ០៦:៤៣
នៅថ្ងៃអាទិត្យ ទី១៩ កុម្ភៈនេះ លោកនាយករដ្ឋមន្ត្រីអ៊ីរ៉ាក់ បានប្រកាសពីការចាប់ផ្តើម បើកសមរភូមិ វាយដណ្តើមយកភាគខាងលិច នៃទីក្រុងម៉ូស៊ូល ពីដៃពួកជីហាតអង្គការរដ្ឋអ៊ីស្លាម។ សូមបញ្ជាក់ថា ផ្នែកខាងកើតក្រុងម៉ូស៊ូល ត្រូវបានដណ្តើមបានមកវិញ កាលពីថ្ងៃទី១៨ មករា។ បន្ទាប់ពីបានបង្អង់ចាំអស់រយៈពេល១ខែ ដើម្បីរៀបចំយុទ្ធសាស្ត្រប្រយុទ្ធ កងកម្លាំងអ៊ីរ៉ាក់ ដោយមានជំនួយពីកងទ័ពសម្ព័ន្ធមិត្តផងនោះ អាចចាប់ផ្តើមសមរភូមិ ចាប់ពីថ្ងៃនេះទៅ។ តែយ៉ាងណាក៏ដោយ មន្ត្រីកងទ័ពសម្ព័ន្ធមិត្តបានទទួលស្គាល់ថា សមរភូមិភាគខាងលិចម៉ូស៊ូល គឺជាសមរភូមិដ៏គ្រោះថ្នាក់ និងលំបាកបំផុត។
សមាសភាពនៃកងកម្លាំងអ៊ីរ៉ាក់៖
កងកម្លាំងដែលនៅខាងរដ្ឋាភិបាលអ៊ីរ៉ាក់ មិនមែនមានតែមួយក្រុមទេ តែមានច្រើនក្រុម។ យើងអាចបែងចែកជាបីផ្នែក ទីមួយ គឺកងកម្លាំងដែលស្ថិតក្រោមការគ្រប់គ្រងរបស់រដ្ឋាភិបាលអ៊ីរ៉ាក់ ដោយផ្ទាល់ ទីពីរគឺកងម្លាំង ដែលកើតចេញពីចលនាមហាជន និងទីបី គឺកងកម្លាំងដែលបញ្ជូនទៅពីបរទេស។
កងកម្លាំងដែលស្ថិតក្រោមការគ្រប់គ្រងរបស់រដ្ឋាភិបាលអ៊ីរ៉ាក់ គឺមានកងទ័ពអ៊ីរ៉ាក់ ផ្ទាល់តែម្តង។ កងទ័ពអ៊ីរ៉ាក់នេះ កាលពីសមរភូមិឆ្នាំ២០១៥ នៅម៉ូស៊ូល បានរងការរិះគន់ច្រើនណាស់ ដោយសារតែមានការខ្វះខាតច្រើន ទាំងសម្ភារៈ ទាំងសមត្ថភាព និងទាំងយុទ្ធសាស្ត្រប្រយុទ្ធ។ ក៏ប៉ុន្តែជាងមួយឆ្នាំមកនេះ កងទ័ពអ៊ីរ៉ាក់ បានទទួលការហ្វឹកហាត់ច្រើន ពីអ្នកជំនាញការរបស់កងទ័ពអាមេរិក។
ក្រៅពីកងទ័ពអ៊ីរ៉ាក់ នៅមានកងកម្លាំងពិសេសពីរទៀត គឺកងកម្លាំងពិសេសប្រឆាំងភេរវកម្ម និងកងកម្លាំងអន្តរាគមន៍រហ័ស។ ក្រុមកម្លាំងប្រឆាំងភេរវកម្ម ត្រូវគេទទួលស្គាល់ថាមានសមត្ថភាពខ្ពស់ ជាក់ស្តែង ដោយយោងទៅលើលទ្ធផលជោគជ័យ កាលពីមួយខែមុននេះ ក្នុងពេលវាយដណ្តើមភាគខាងកើតម៉ូស៊ូល។ តាមការគ្រោងទុក ក្រុមនេះ នឹងត្រូវចូលទៅភាគខាងលិចម៉ូស៊ូល ក្នុងដំណាក់កាលទីពីរ។ ចំណែកកងអន្តរាគមរហ័សវិញ គឺមានតួនាទីដណ្តើមយកទីតាំងយុទ្ធសាស្ត្រធំៗ ដូចជាព្រលានយន្តហោះម៉ូស៊ូលជាដើម ដែលបច្ចុប្បន្ននេះ ស្ថិតក្នុងដៃក្រុមជីហាតនៅឡើយ។
ចំណែកកងកម្លាំងមហាជនវិញ គឺមានក្រុមមួយឈ្មោះថា ក្រុមHachd Al Chaabi ដែលជាចលនាអ្នកស្ម័គ្រចិត្តសុទ្ធសាធ។ ក្រុមនេះ ជាការរួបរួមគ្នា សុទ្ធតែជាប្រជាជនអ៊ីរ៉ាក់ កាន់សាសនអ៊ីស្លាម និកាយឈីអ៊ីត ហើយដែល បានទទួលការទំនុកបំរុង ទាំងសម្ភារៈ និងថវិកា ដោយផ្ទាល់ពីកងទ័ពអ៊ីរ៉ង់។
កន្លងមក កងទ័ពសម្ព័ន្ធមិត្ររបស់អាមេរិក មិនសូវជាចង់រាប់កងកម្លាំងមហាជននេះទេ ដោយសារតែក្រុមនេះ មានអ៊ីរ៉ង់ជាអ្នកនៅពីក្រោយ។ ក៏ប៉ុន្តែ ដោយសង្កេតឃើញពីភាពក្លាហាន និងសមត្ថភាពរបស់ក្រុមនេះ នៅព្រឹកថ្ងៃទី១៩កុម្ភៈ លោក Stephen Townsend មេទ័ពអាមេរិក ប្រចាំការនៅអ៊ីរ៉ាក់ បានសរសើរ ក្រុម Hachd Al Chaabi នេះ ព្រោះដោយសារក្រុមនេះ ជាក្រុមស្ម័គ្រចិត្តនៅជួរមុខគេបង្អស់។ ក៏ប៉ុន្តែកន្លងមក ក្រុមនេះក៏ត្រូវរងការរិះគន់ដែរ ដោយសារតែបានប្រើអំពើហឹង្សាព្រៃផ្សៃជ្រុលហួសហេតុ ទៅលើក្រុមជីហាតអង្គការរដ្ឋអ៊ីស្លាម។
ចំពោះ កងកម្លាំងសម្ព័ន្ធមិត្តវិញ ជាផ្លូវការគឺមានប្រទេសទាំងអស់៦០ប្រទេសចូលរួម ដែលសរុបទាហានរាប់ពាន់នាក់ ក៏ប៉ុន្តែជាងពាក់កណ្តាល គឺសុទ្ធតែជាទាហានអាមេរិក។ កងទ័ពសម្ព័ន្ធមិត្ត ដែលដឹកនាំដោយអាមេរិកនេះ មិនមែនធ្វើប្រតិបត្តិការតែនៅម៉ូស៊ូលទេ តែវាយប្រហារតាមរយៈការទម្លាក់គ្រាប់បែក ទៅលើទីតាំងបន្ទាយរបស់ពួកជីហាត ទូទាំងអ៊ីរ៉ាក់។ តួនាទីរបស់កងទ័ពនេះ មួយទៀត គឺបានហ្វឹកហាត់ បណ្តុះបណ្តាលកងកម្លាំងពិសេសរបស់អ៊ីរ៉ាក់ ប្រមាណជា៦៥០០០នាក់។
ក្រៅពីកងកម្លាំងចម្រុះទាំងនេះ ក៏នៅមានកងកម្លាំងគួក និងកងទ័ពពិសេសដែលបញ្ជូនមកដោយរដ្ឋាភិបាលតួកគី នៅភាគខាងជើងអ៊ីរ៉ាក់ ដើម្បីវាយប្រយុទ្ធជាមួយក្រុមជីហាតអង្គការរដ្ឋអ៊ីស្លាម។ តែយ៉ាងណា គេនៅមិនទាន់ប្រាកដថា ក្រុមទាំងពីរនេះ នឹងចូលរួមក្នុងសមរភូមិម៉ូស៊ូល រឺទេ។
ភាគខាងលិចម៉ូស៊ូល ជាសមរភូមិគ្រោះថ្នាក់បំផុត
លោកមេបញ្ជាការ Stephen Townsend បាននិយាយថា សមរភូមិខាងលិចម៉ូស៊ូល គឺជាសមរភូមិលំបាក និងគ្រោះថ្នាក់បំផុត មិនថាសម្រាប់កងទ័ពអ៊ីរ៉ាក់ រឺកងទ័ពណាទាំងអស់។ មានកត្តាពីរ ដែលនាំឲ្យសមរភូមិនេះ ជាសមរភូមិគ្រោះថ្នាក់។ ទីមួយ គឺកត្តាភូមិសាស្ត្រ។ ខុសពីភាគខាងកើត ភាគខាងលិចម៉ូស៊ូល ជាទីក្រុងបូរាណ ដែលមានអាគារចាស់ៗ និងផ្លូវតូចៗខ្វាត់ខ្វែង។ ច្រកផ្លូវតូចៗ មិនអាចឲ្យកងទ័ពអ៊ីរ៉ាក់ បើករថក្រោះចូលទៅបានទេ។ ដូច្នេះមានន័យថា ការប្រយុទ្ធសឹងតែទាំងស្រុង គឺត្រូវធ្វើឡើងដោយថ្មើរជើង ម្តងមួយដំណាក់ ទៅមួយដំណាក់។
កត្តាទីពីរ គឺកត្តាមនុស្ស។ នៅម៉ូស៊ូល ភាគខាងលិច នៅមានប្រជាជនស៊ីវីលរស់នៅច្រើនណាស់។ យុទ្ធសាស្ត្ររបស់ក្រុមជីហាត គឺប្រើប្រជាជនសាមញ្ញ ជាខែល ហើយបន្លំខ្លួន លាយឡំជាមួយប្រជាជន។ នេះហើយដែលជាការលំបាករបស់កងទ័ពអ៊ីរ៉ាក់ ព្រោះមិនដឹងអ្នកណា ជាពួកជីហាត អ្នកណាជាប្រជាជនស្លូតត្រង់ទេ។ ដូច្នេះ សកម្មភាពធ្វើភេរវកម្ម ដាក់បង្កៃគ្រាប់បែក ដើម្បីសម្លាប់កងទ័ពអ៊ីរ៉ាក់ ប្រាកដជាកើតមាន។ មួយវិញទៀត ក្រុមជីហាតនេះ ប្រើប្រាស់ សាលារៀន មន្ទីរពេទ្យ និងវិហារម៉ូស្កេ ជាកន្លែងលាក់ខ្លួន និងលាក់អាវុធរបស់ពួកវា។ ដូច្នេះ កងកម្លាំងអ៊ីរ៉ាក់ ត្រូវតែមានការប្រុងប្រយ័ត្នខ្ពស់ ដើម្បីចៀសវៀង មិនឲ្យប៉ះពាល់ ដល់អាយុជីវិតរបស់ប្រជាជនស្លូតត្រង់។
ប្រជាជនស្លូតត្រង់ ៧សែន នៅម៉ូស៊ូលភាគខាងលិច
បញ្ហានេះជាបញ្ហាចំបង ព្រោះបើសិនជាអ្នករងគ្រោះច្រើន ដែលជាប្រជាជនសាមញ្ញ គឺពិតជារងការរិះគន់មិនខានទេ។ នៅខាងលិចម៉ូស៊ូល បច្ចុប្បន្ននេះ មានប្រជាជនរស់នៅប្រមាណជា៧សែននាក់។ ចំនួននេះច្រើនណាស់ បើប្រៀបធៀបទៅនឹងទំហំរបស់ទីក្រុងនេះ។
កាលពីថ្ងៃសោរ៍ម្សិលមិញនេះ ក្រសួងការពារជាតិអ៊ីរ៉ាក់ បានប្រកាសថា កងទ័ពអាកាស បានទំលាក់ខិតបណ្ណ ពីលើក្រុងម៉ូស៊ូលខាងលិច ដើម្បីប្រាប់ដំណឹងពីការបើកសមរភូមិ ទៅកាន់ប្រជាជនស្លូតត្រង់ ឲ្យត្រៀមខ្លួន។ ខាងក្រសួងបញ្ជាក់ថា ក្នុងខិតបណ្ឌនេះ គេមានសរសេរប្រាប់ទៅប្រជាជន ឲ្យត្រូវធ្វើយ៉ាងណា នៅពេលកងទ័ពអ៊ីរ៉ាក់ ចូលទៅដល់ ដើម្បីចៀសវៀងកុំឲ្យមានការយល់ច្រឡំថា ថាជាជនជីហាត។ បន្ទាប់មកទៀត គឺត្រូវប្រមូលផ្តុំគ្នា ដើម្បីចាកចេញពីសមរភូមិ។
បើតាមគ្រោងទុក កងទ័ពអ៊ីរ៉ាក់ មានគម្រោងឡោមព័ទ្ធភាគខាងលិច ជាមុនសិន រួច វាយសម្រុកបន្តិចម្តងៗ។ ដូច្នេះ គ្រោះថ្នាក់ស្លាប់ប្រជាជនសាមញ្ញ គឺជារឿងដែលមិនអាចចៀសបានទេ។ យ៉ាងណាមិញ លោកស្រីប្រធានការិយល័យមនុស្សធម៌ នៃអង្គការសហប្រជាជាតិ បានសម្តែងការព្រួយបារម្ភ ជាខ្លាំង ហើយបានសំណូមពរ ឲ្យទុកសង្កាត់ទីក្រុងបូរាណដែលនៅកណ្តាលម៉ូស៊ូលខាងលិច ជាតំបន់គ្មានការប្រយុទ្ធ ដើម្បីរក្សាអាយុជីវិតប្រជាជនសាមញ្ញ ហើយឲ្យជនជីហាត ប្រគល់ខ្លួនចេញម្តងមួយ។ តែយ៉ាងណា ធ្វើយ៉ាងនេះ វាចំណាយពេលយូរ ហើយអាចបង្កគ្រោះថ្នាក់ ដល់កងកម្លាំងអ៊ីរ៉ាក់ វិញក៏ថាបានដែរ។ មួយវិញទៀត សមរភូមិ អាចចំណាយពេលច្រើនសប្តាហ៍ទៀត ដូច្នេះ បើសិនកងកម្លាំងអ៊ីរ៉ាក់ ហ៊ុំព័ទ្ធភាគខាងលិចម៉ូស៊ូលយូរ គឺមានន័យប្រជាជនសាមញ្ញ ទាំង៧សែននាក់ ក៏អាចនឹងជួបគ្រោះទូរភិក្ខកាន់តែធ្ងន់ធ្ងរ ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ