រដ្ឋាភិបាលស៊ីរីសម្រុកយកជ័យនៅអាឡិប ដោយមិនខ្វល់ពីជីវិតជនស៊ីវិល ?
ចុះផ្សាយនៅថ្ងៃ៖
ស្តាប់ - ០៦:៣៩
កងទ័ពរដ្ឋាភិបាលស៊ីរី របស់លោក បាស្ហារ អាល់ អាសាដ បានកំពុងតែបោះជំហានទៅក្តោបក្តាប់ទាំងស្រុងក្រុងអាឡិបហើយ បន្ទាប់ពីបានបើកយុទ្ធនាការវាយលុកអស់រយៈពេលជាងមួយខែ និងបន្ទាប់ពីភាគខាងកើតក្រុងនេះធ្លាក់ក្នុងកណ្តាប់ដៃពួកឧទ្ទាមអស់ពេលជាងបួនឆ្នាំ។ ពួកឧទ្ទាម និងពួកបះបោរប្រឆាំង បានតស៊ូប្រយុទ្ធរហូតដល់នាទីចុងក្រោយ ប៉ុន្តែប្រឈមមុខនឹងអំណាចគ្រាប់កាំភ្លើងរបស់កងទ័ពរដ្ឋាភិបាលនិងសម្ព័ន្ធមិត្តរុស្ស៊ី ពួកគេទំនងជាគ្មានជម្រើសអ្វីឡើយ ! សមរភូមិអាឡិប ទំនងជានឹងត្រូវចប់នៅក្នុងពេលឆាប់ៗ ប៉ុន្តែគឺប្រជាពលរដ្ឋស៊ីវិលជាអ្នករងគ្រោះខ្លាំង។ លោក អគ្គលេខាធិការអង្គការសហប្រជាជាតិ បានទាញសញ្ញាអាសន្ននៅពេលបានទទួលដំណឹងថាមានការកាប់សម្លាប់មនុស្សដោយគ្មានរើសមុខ។ សម្តេចប៉ាបក៏លែងនៅស្ងៀម ព្រះអង្គបានសរសេរលិខិតទៅជូនប្រធានាធិបតីស៊ីរីដោយផ្ទាល់តែម្តង។
អាឡិប ទីក្រុងសេដ្ឋកិច្ចដ៏ធំជាងគេរបស់ស៊ីរី ដែលបានធ្លាក់ក្នុងភ្លើងសង្គ្រាម និងពុះច្រៀកជាពីរ ម្ខាងគ្រប់គ្រងដោយកងកម្លាំងរដ្ឋាភិបាល និងម្ខាងទៀត ដោយក្រុមឧទ្ទាមប្រឆាំង “កងទ័ពសេរីរំដោះស៊ីរី” និងកា្លយជាសមរភូមិក៏ក្តៅគគុក តាំងពីខែកក្កដា ២០១២មក កំពុងឈានដល់ទីបញ្ចប់ហើយ !
ទូរទស្សន៍រដ្ឋបានបង្ហាញរូបភាពកងកម្លាំងរដ្ឋាភិបាលចូលគ្រប់គ្រងសង្កាត់ដោយបោះបង់ដោយពួកឧទ្ទាម ពោលគឺគ្រប់គ្រងបានដល់ទៅ៩០%។ រដ្ឋាភិបាលស៊ីរី បានប្រកាសថា យុទ្ធនាការរំដោះក្រុងអាឡិប បានឈានចូលដំណាក់កាលចុងក្រោយ។ ពួកឧទ្ទាមនៅមានលាក់ខ្លួនក្នុងចំណែកដីប្រមាណជា៣គីឡូម៉ែត្រការ៉េទៀតប៉ុណ្ណោះ នេះបើតាមសេចក្តីថ្លែងការណ៍រុស្ស៊ី។
គិតមកទល់ពេលនេះ បើរាប់ទាំងក្រុងអាឡិបមួយទៀតផង របបក្រុងដាម៉ាស បានដណ្តើមគ្រប់គ្រងមកវិញ នូវក្រុងធំៗរបស់ប្រទេស។ ទាំងនេះក៏ដោយសារមានជំនួយពីរុស្ស៊ី។ រុស្ស៊ី ដែលបានចូលធ្វើអន្តរាគមន៍ផ្លូវអាកាសនៅស៊ីរី តាំងពីឆ្នាំ២០១៥មក បានបើកយុទ្ធនាការយ៉ាងសន្ធាប់ខ្លាំង នារយៈពេល១ខែចុងក្រោយដើម្បីយកជ័យជំនះផ្តាច់ព្រ័ត្រនៅអាឡិប។
ជ័យជំនះលើផ្ទៃនៃភាពព្រៃផ្សៃ កាប់សម្លាប់ជនស៊ីវិល ?!
ខ្លះបានស្រែកថា មានកាប់សម្លាប់ដោយបិទទ្វារនៅក្រុងអាឡិប ! ទង្វើសង្គ្រប់យកជ័យ លើសង្កាត់ភាគខាងកើតក្រុងអាឡិប កំពុងរេទៅជាការសងសឹក កាប់សម្លាប់ ជួនដោយប្រើកាំបិតផង បន្ថែមពីលើការគ្រាប់កាំភ្លើង។ ប្រជាជនស៊ីវិលប្រមាណ១សែននាក់ ដែលរស់នៅក្នុងទីនោះ ត្រដរស្រែកដង្ហើយអន្តរាគមន៍ពីសហគមន៍អន្តរជាតិ ទាំងអស់សង្ឃឹម។ សកម្មជនបក្សប្រឆាំងនៅក្រុងអាឡិបម្នាក់ ដែលអ្នកឆ្លើយឆ្លងព័ត៌មានពិសេសរបស់វិទ្យុយើង អាចទាក់ទងបាន កាលពីប៉ុន្មានម៉ោងមុននេះ បានទទូចសុំអន្តរាគមន៍អន្តរជាតិ ព្រោះជាដង្ហើមចុងក្រោយហើយ។
“កងកម្លាំងយោធានៃរបបអាសាដ កំពុងតែបាញ់សម្លាប់ជនស៊ីវិល ជាស្ត្រី ជាកុមារ នៅក្នុងសង្កាត់ ហ្វែរឌូ នៃក្រុងអាឡិប។ ជនស៊ីវិល កំពុងជាប់កុន ៖ រងការទម្លាក់គ្រាប់បែកពីលើអាកាសផង និងរងការបាញ់ប្រហារពីសំណាក់ទាហានឆ្មក់ផង។ ពួកគេកំពុងតែប្រព្រឹត្តអំពើប្រល័យពូជសាសន៍ ! ឱ្យតែឃើញមានចលនា ពួកវាបាញ់គ្មានប្រណី និងមើលរើសមុខឡើយ មិនថាមនុស្សធំ ឬក្មេងតូចទេ។ យន្តហោះរុស្ស៊ី ស៊ីរី ហោះគ្មានដាច់លើក្បាលពួកយើង។ មានសាកសព នៅគ្រប់កន្លែងតាមដងផ្លូវ។ មានគ្រួសារជាច្រើននាក់ផ្សេងទៀត កំពុងជាប់កុនក្នុងគំនរបាក់បែក។ គ្រាប់បែកទម្លាក់ផង គ្រាប់ផ្លោងផង ចប់ហើយតំបន់កាន់កាប់ដោយអ្នកប្រឆាំង។
ការដង្ហើយសុំជំនួយក៏មានកាន់តែច្រើនឡើងៗ នៅតាមប្រព័ន្ធសង្គម ខ្លះមានបង្ហោះរូបភាព រូបវីដេអូឧក្រិដ្ឋផង និងសុទ្ធបាននិយាយ ថានេះជាឱកាសចុងក្រោយដែលខ្ញុំនិយាយទៅកាន់អ្នក។
សម្តេចប៉ាបសរសេរសំបុត្រទៅប្រធានាធិបតីស៊ីរី
នៅពេលបានឮដំនឹងនេះ គ្រប់គ្នាសុទ្ធតែតក់ស្លុត ! លោក អគ្គលេខាធិការអង្គការសហប្រជាជាតិ បានគីមូន បានទាញសញ្ញាអាសន្ន និងសម្តែងការខ្វល់ខ្វាយយ៉ាងខ្លាំងនៅចំពោះដំណឹងនេះប៉ុន្តែបានគូសបញ្ជាក់ថា អង្គការសហប្រជាជាតិមិនអាចផ្ទៀងផ្ទាត់ព័ត៌មាននេះ ដោយលក្ខណៈឯករាជ្យបាននៅឡើយ។ លោកបានស្នើសុំឱ្យតំណាងពិសេសអង្គការសហប្រជាជាតិ ទទួលបន្ទុកស៊ីរី ត្រួតពិនិត្យឱ្យស៊ីជម្រៅ និងអំពាវនាវជាថ្មីឱ្យគ្រប់ភាគីពាក់ព័ន្ធការពារជនស៊ីវិល។ ឧត្តមស្នងការសិទ្ធិមនុស្សអង្គការសហប្រជាជាតិ បានលើកឡើងដែរថាមានសញ្ញានៃការធ្វើឃាតមនុស្សពីសំណាក់ពួកគាំទ្ររបបក្រុងដាម៉ាស។
ចំណែកលោក ប្រធានាធិបតីបារាំង ហ្វ្រង់ស័រ ហូឡង់វិញបានអះអាងថា
“យើងដឹងហើយថាការទម្លាក់គ្រាប់បែកឥតដាច់ បង្កើតឱ្យមានក្តីឱ្យរន្ធត់ និងជាពិសេសអារម្មណ៍ចង់ធ្វើបដិវត្តនៅចំពោះមុខអំពើកាប់សម្លាប់លើជនស៊ីវិល ! មន្ទីរពេទ្យ សាលារៀនត្រូវបំផ្លាញ ហើយថ្ងៃនេះ ជនស៊ីវិលបានក្លាយជាចំណាប់ខ្មាំង។ មិនតែប៉ុណ្ណោះ អ្វីដែលគួរឱ្យបារម្ភខ្លាំងទៀត គឺអាចនឹងមានការកាប់សម្លាប់ នៅពេលជនស៊ីវិលនោះចង់រត់គេចខ្លួន។ ដូច្នេះកាតព្វកិច្ចដំបូងរបស់យើង គឺមនុស្សធម៌ ! បារាំងនិងសហគមន៍អន្តរជាតិ កំពុងផ្តុំកម្លាំងគ្នាដើម្បីធ្វើយ៉ាងណា បើកច្រកមនុស្សធម៌ ជួយជម្លៀសប្រជាជន និងផ្តល់ស្បៀងដល់អ្នកនៅក្នុងក្រុងអាឡិប។”
ហើយជាលើកទីមួយ គិតចាប់តាំងពីសង្គ្រាមនៅស៊ីរីបានផ្ទុះឡើង សម្តេចប៉ាប បានដាច់ចិត្តសរសេរលិខិតមួយទៅឱ្យប្រធានាធិបតីស៊ីរី លោក បាស្ហារ អាល់ អាសាដ ដោយផ្ទាលតែម្តង។ យើងមិនបានដឹងអំពីខ្លឹមសារពិតក្នុងសំបុត្រនោះទេ ប៉ុន្តែបុរីវ៉ាទីកង់បានអះអាង មានឃ្លាដែលសម្តេចប៉ាប ហ្វ្រង់ស័រ សុំឱ្យលោក បាស្ហារ អាល់ អាសាដ និងសហគមន៍ អន្តរជាតិ បិទបញ្ចប់អំពើហិង្សា និងរកដំណោះស្រាយបញ្ចប់ការស្អប់ខ្ពើមគ្នានៅស៊ីរីដោយសន្តិវិធី។
សម្តេចប៉ាបបានថ្កោលទោសគ្រប់ទម្រង់នៃភេរវកម្ម និងបានបង្ខំឱ្យលោកអាសាដ ប្រកាន់ឱ្យខ្ជាប់ច្បាប់មនុស្សធម៌អន្តរជាតិ ការពារជនស៊ីវិល និងអនុញ្ញាតឱ្យជនស៊ីវិលបានទទួលជំនួយមនុស្សធម៌។ នេះបើតាមការបញ្ជាក់បន្ថែមរបស់ឯកអគ្គរាជទូតវ៉ាទីកង់ ប្រចាំក្រុងដាម៉ាស។ សម្តេចប៉ាប ហ្វ្រង់ស័រ ធ្លាប់បានធ្វើការអំពាវនាវជាញយដងមកហើយក្នុងរយៈពេលប៉ុន្មានខែចុងក្រោយនេះ។ ព្រះអង្គបានសម្តែងភាពស្និទ្ធស្នាលជាមួយពលរដ្ឋស៊ីរី ដោយបង្កើតឱ្យមានតំណាងប្រមុខសង្ឃកាតូលិកនៅក្រុងដាម៉ាសផងកាលពីខែមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ