ការបាញ់រះក្នុងស្ថានទូតអ៊ីស្រាអែលនៅហ្សកដានី ដរមកពីវិបត្តិនៅហ្ស៊េរុយសាឡិម ?
ចុះផ្សាយនៅថ្ងៃ៖
វិបត្តិនៅដើមបូព៌ាបន្តឆាបឆេះ ! វិធានការសន្តិសុខដាក់ទ្វារសុវត្ថិភាពចាប់អាវុធនៅមាត់ច្រកចូលវិហារអ៊ីស្លាមនៅហ្ស៊េរុយសាឡិម ដែលបង្កបង្កើតឱ្យមានអំពើហិង្សាមរណៈ អំឡុងពេលពេញមួយចុងសប្តាហ៍នេះ កំពុងក្លាយជាសម្ពាធធ្ងន់ឡើងៗសង្កត់លើអ៊ីស្រាអែលខ្លួនឯង។ មានការបាញ់រះស្លាប់មនុស្សពីរនាក់ ក្នុងស្ថានទូតអ៊ីស្រាអែលនៅហ្សកដានី។ ចំណែកក្រុមប្រឹក្សាសន្តិសុខអង្គការសហប្រជាជាតិវិញ ត្រូវបើកជំនួបប្រជុំបន្ទាន់នៅថ្ងៃចន្ទនេះ។
ក្នុងពេលភ្លាមៗនេះ គេមិនទាន់អាចអះអាង ឬទាញសេចក្តីសន្និដ្ឋាន ដោយច្បាស់លាស់បានទេ ថាតើហេតុការណ៍បាញ់រះនៅស្ថានទូតអ៊ីស្រាអែល ប្រចាំក្រុងអាម៉ាន់ ប្រទេសហ្សកដានី មានពាក់ព័ន្ធនឹងភាពតានតឹងនៅហ្ស៊េរុយសាឡិមឬក៏អត់នោះ។ អ្វីដែលច្បាស់គឺ នៅល្ងាចថ្ងៃអាទិត្យម្សិលមិញ មានករណីបាញ់រះក្នុងស្ថានទូតអ៊ីស្រាអែ ខាងផ្នែកអាគារស្នាក់នៅ មិនមែនជាអាគាររដ្ឋបាលទេ។
បើតាមក្រសួងការបរទេសអ៊ីស្រាអែល កម្មករជាងឈើហ្សកដានីម្នាក់ ដែលត្រូវមកជួលជុលតុទូតាមទម្លាប់ បានយកតួនឺវិស ទៅចាក់ភ្នាក់ងារសន្តិសុខអ៊ីស្រាអែលមុន។ សន្តិសុខរងរបួសបានតដៃវិញបាន ដោយដកកាំភ្លើងបាញ់កម្មករដៃដល់អាយុ១៧ឆ្នាំ ឱ្យស្លាប់នៅនឹងកន្លែង។ ប៉ុន្តែការបាញ់រះក៏បានបង្កឱ្យមានអ្នករងរបួសម្នាក់ទៀត គឺជាម្ចាស់ អាគារនោះ។ របួសធ្ងន់ពេក ម្ចាស់ផ្ទះជាតិហ្សកដានីនោះក៏ស្លាប់ នៅពេលដឹកដល់មន្ទីរពេទ្យ។
អាជ្ញាធរហ្សកដានី បានបិទតំបន់ជុំវិញស្ថានទូតអ៊ីស្រាអែល នៅអាម៉ាន់ ដើម្បីការពារសុវត្ថិភាព និងបានប្រកាសបើកអង្កេត ព្រមទាំងចេញបម្រាមហាមឃាត់មិនឱ្យភ្នាក់ងារអ៊ីស្រាអែល ចាកចេញពីប្រទេសទេ។
ការរីករាលដាលអំពើហិង្សា និងវិបត្តិការទូត
ប៉ុន្តែខាងអ៊ីស្រាអែល បានគូសបញ្ជាក់ថា ភ្នាក់ងារអ៊ីស្រាអែលដែលបើកការបាញ់រះនេះដោយប្រើសិទ្ធិការពារខ្លួនតែប៉ុណ្ណោះ ហើយម្យ៉ាងទៀត គាត់មានអភ័យឯកសិទ្ធិទូត ដូច្នេះភ្នាក់ងារអ៊ីស្រាអែលរូបនេះ ត្រូវតែអាចចេញចូលទៅណាក៏បាន។
ទំនាក់ទំនងរវាងអ៊ីស្រាអែល និងហ្សកដានី ហាក់មានភាពរកាំរកូសនឹងគ្នា តាំងពីជាងមួយសប្តាហ៍មកហើយ ពោលគឺតាំងពីអ៊ីស្រាអែលបានចាត់វិធានការ ដាក់ទ្វារសុវត្ថិភាពចាប់អាវុធ នៅទីលានវិហារអ៊ីស្លាមហ្ស៊េរុយសាឡិម ទីកន្លែងសក្តិសិទ្ធសំខាន់ទីបីរបស់សាសនាអ៊ីស្លាម។
ក្រុងចាស់ហ្ស៊េរុយសាឡិម ដែលជាប្រភពនៃជម្លោះ រវាងអ៊ីស្រាអែលនិងប៉ាឡេស្ទីន ស្ថិតនៅតំបន់ហ្ស៊េរុយសាឡិមខាងកើត ជាសង្កាត់អ៊ីស្លាម ស្ថិតក្រោមអាណានិគមកិច្ចអ៊ីស្រាអែល តែប្រទេសហ្សកដានីជាអ្នកគ្រប់គ្រងរដ្ឋបាលមជ្ឈមណ្ឌលនេះ។ អ៊ីស្រាអែល ជាអ្នកយាមត្រួតពិនិត្យនៅច្រកចូលទីលានសក្តិសិទ្ធិ ព្រោះនៅទីនោះក៏ជាទីកន្លែងសក្តិសិទ្ធិ របស់សាសនាជី្វហ្វ ដែលអ៊ីស្រាអែល ហៅថា វិហារភ្នំ។ អ្នកកាន់សាសនាអ៊ីស្លាមអាចចេញចូលទៅវិហារនោះបានគ្រប់ពេលវេលា ឯចំណែកជនជាតិជ្វីហ្វ (អ៊ីស្រាអែល) អាចឡើងទៅកាន់ទីលាននោះ ទៅតាមពេលម៉ោងកំណត់ និងមិនអាចនៅសូត្រធម៌ទីនោះបានឡើយ។ លក្ខន្តិកៈនេះ ត្រូវបានចែងតាំងពីជាច្រើនទសវត្សរ៍មកហើយ។
អាជ្ញាធរអ៊ីស្រាអែល បានធានាអះអាងថាមិនប៉ះពាល់លក្ខន្តិកៈនេះទេ និងប្រកាសចង់រកដំណោះស្រាយ ដោយបានព្រលយអំពីលទ្ធភាពដកទ្វារសុវត្ថិភាពចេញ ហើយដាក់ជំនួសនូវវិធីការពារសន្តិសុខថ្មី គឺការបំពាក់កាមេរ៉ាសុវត្ថិភាពវិញ។ កាមេរ៉ានោះទំនើបមានសម្ត្ថភាពអាចចាប់ដឹងថាមនុស្សណាមានផ្ទុកជាតិផ្ទុះនិងកាំភ្លើងបាន។ គណៈកម្មការសន្តិសុខអ៊ីស្រាអែលបានជួបប្រជុំគ្នានៅយប់មិញ និងនៅថ្ងៃចន្ទនេះទៀត អំពីវិធានការថ្មីនេះ។ តែមូលនិធិអ៊ីស្លាម អ្នកគ្រប់គ្រងទីលាននេះ ដែលគ្មាននរណាក្រៅពីហ្សកដានី បានព្រមានជាស្រេចហើយថាក៏មិនអាចទទួលវិធានការថ្មីរបស់អ៊ីស្រាអែលនេះបានដែរ។
អាមេរិកបញ្ជូនអន្តរការីពិសេសទៅអ៊ីស្រាអែល ក្រុមប្រឹក្សាសន្តិសុខបើកប្រជុំបន្ទាន់
គេពិតជាពិបាកស្រមៃឃើញភាពធូរស្រាលក្នុងពេលឆាប់ៗណាស់។ សហគមន៍អន្តរជាតិ មានការព្រួយបារម្ភខ្លាំងឡើងៗ។ លោកប្រធានាធិបតីត្រាំ បានបញ្ជូនអន្តរការីពិសេស មកកាន់តំបន់ដើមបូព៌ានេះ ដើម្បីសាកល្បងរកដំណោះស្រាយវិបត្តិ។
បើតាមអ្នកទទួលខុសត្រូវអាមេរិក សុំមិនបញ្ចេញឈ្មោះ ការដែរអាមេរិកបញ្ជូនអន្តរការីពិសេសមកអ៊ីស្រាអែលក៏ព្រោះតែខ្លាចស្ថានការណ៍ធ្លាក់កាន់តែដុនដាបថែមទៀត។ ព្រោះទន្ទឹមនឹងបាតុកម្មហិង្សា និងការបាញ់រះនៅហ្ស័កដានី ម្សិលមិញនេះ មានករណីបាញ់ផ្លោងចេញពីតំបន់ហ្កាហ្សាគ្រប់គ្រងដោយពួកហាម៉ាស មកលើទឹកដីអ៊ីស្រាអែលផង តែគ្មានជនរងគ្រោះរបួសឬស្លាប់។ ហើយអ៊ីស្រាអែលក៏បានបញ្ចេញរថក្រោះទៅត្រៀមប្រយុទ្ធ តបវិញទៀត។
ចំណែក ក្រុមប្រឹក្សាសន្តិសុខក៏ត្រូវបើកជំនួបប្រជុំបន្ទាន់ ដោយបិទទ្វារ ដើម្បីរកវិធីបន្ធូរសម្ពាធ នៅហ្ស៊េរុយសាឡិម។ ជំនួបនេះ ត្រូវបានស្នើឡើងដោយបារាំង ស៊ុយអែត និងអេហ្ស៊ីប ប៉ុន្តែគេមិនបានដឹងថាតើអាមេរិករបស់លោកត្រាំ បង្ហាញជំហរយ៉ាងណា លើកនេះ។ ពីមុនៗមកអាមេរិកតែងតែបិទខ្ទប់រាល់គ្រប់សេចក្តីសម្រេចចិត្តរបស់អង្គការសហប្រជាជាតិ ដើម្បីការពារអ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ