អេស្បូឡាលីបង់ចង់បន្តស្ថិតក្នុងប្រទេសស៊ីរីរហូតដល់ទទួលបានជ័យជំនះលើពួកជីហាត
ចុះផ្សាយនៅថ្ងៃ៖
ស្តាប់ - ០៥:០០
ជួនចំពេលដែលដំណើរកិច្ចចរចាស្វែងរកសន្តិភាពឲ្យប្រទេសស៊ីរីឈានចូលដល់សប្តាហ៍ទី២ នៅក្នុងទីក្រុងហ្សឺណែវ ប្រទេសស្វ៊ីស មេចលនាអេស្បូអេឡាលីបង់ហាសាន ណាស្រ្តាឡាបានចេញមុខប្រកាសជាផ្លូវការនាថ្ងៃទី២១ មីនាថា យុទ្ធជនប្រដាប់អាវុធអេស្បូឡានឹងបន្តស្ថិតក្នុងទឹកដីស៊ីរីរហូតដល់ទទួលបានជ័យជំនះទាំងស្រុងលើពួកជីហាតអង្គការរដ្ឋអ៊ីស្លាម និងពួកជីហាតនៃចលនារណសិរ្យអាល់ ណូស្រាដែលជាសាខាភេរវនិយមអាល់កៃដា។ តែគេមិនត្រូវភ្លេចនិយាយទេថា យុទ្ធជនអេស្បូឡាបានជួយគាំទ្រកម្លាំងរបស់រដ្ឋាភិបាលស៊ីរីប្រឆាំងនឹងក្រុមបះបោរ។ តើជំហររបស់ចលនាអេស្បូឡាពេលនេះអាចនឹងធ្វើឲ្យប៉ះពាល់ដល់ដំណើរការចរចារវាងភាគីជម្លោះផ្ទៃក្នុងស៊ីរីនៅក្នុងប្រទេសស្វ៊ីសពេលនេះដែរ ឬទេ?។
« យើងបានទៅស៊ីរីដើម្បីជួយប្រទេសមួយនេះកុំឲ្យធ្លាក់ក្នុងកណ្តាប់ដៃអង្គការរដ្ឋអ៊ីស្លាម និងចលនារណសិរ្យអាល់ណូស្រា។ ដរាបណាយើងមានតួនាទីជាអ្នកទទួលខុសត្រូវនៅទីនោះ យើងនឹងបន្តស្ថិតនៅទីនោះ » នេះជាការថ្លែងរបស់ប្រមុខចលនាអេស្បូឡាលីបង់ហាសាន ណាស្រាឡា។ ការថ្លែងរបស់មេចលនាអេស្បូឡាលីបង់ពេលនេះមិនមែនជារឿងចៃដន្យឡើយ មិនចៃដន្យព្រោះទី១ វាបានកើតមានឡើងនៅមួយសប្តាហ៍បន្ទាប់ពីប្រទេសរុស្ស៊ីបានប្រកាសដកកម្លាំងទ័ព និងគ្រឿងសព្វាវុធមួយភាគរបស់ខ្លួនចេញពីទឹកដីស៊ីរី ទី២ វាបានកើតមានឡើងចំពេលដែលកិច្ចចរចាស្វែងរកសន្តិភាពឲ្យស៊ីរីកំពុងបន្តធ្វើនៅក្នុងទីក្រុងហ្សឺណែវ ប្រទេសស្វ៊ីស និងទី៣ ចលនាអេស្បូឡានិកាយឈីអ៊ីតនិយមអ៊ីរ៉ង់មួយនេះចង់ឆ្លើយតបនឹងពាក្យចចាមអារ៉ាមដែលថា ពួកគេក៏បានដកកម្លាំងទ័ពចេញពីទឹកដីស៊ីរីដូចរុស្ស៊ីអ៊ីចឹងដែរ។
នៅក្នុងន័យនេះ និងដើម្បីរំងាប់ពាក្យចចាមអារ៉ាមខាងលើ មេចលនាអេស្បូឡាលីបង់ហាសាន ណាស្រ្តាឡាបានបញ្ជាក់ច្បាស់ៗថា ទោះបីជារុស្ស៊ីដកទ័ព ឬមិនដកទ័ពពីស៊ីរី ទោះបីជាអ៊ីរ៉ង់ដកទ័ព ឬបន្តស្ថិតនៅស៊ីរី អេស្បូឡាមិនឈឺក្បាលឡើយ ហើយអេស្បូឡា និងពលរដ្ឋស៊ីរីជាមនុស្សតែមួយដែលគ្មាននរណាអាចបំបែកបានទេ។ គួររម្លឹកជូនថាសព្វថ្ងៃនេះ ក្រុមយុទ្ធជនប្រដាប់អាវុធអេស្បូឡាលីបង់កំពុងចូលប្រឡូកនៅក្នុងសមរភូមិចំនួនពីរនៅបរទេស គឺនៅក្នុងប្រទេសស៊ីរី និងនៅក្នុងប្រទេសអ៊ីរ៉ាក់។ នៅស៊ីរីក៏ដូចជានៅអ៊ីរ៉ាក់ត្រូវបានចលនានិកាយឈីអ៊ីតមួយនេះលើកយកហេតុផលថា ដើម្បីប្រយុទ្ធប្រឆាំងនឹងពួកជីហាតនៃអង្គការរដ្ឋអ៊ីស្លាម និងពួកជីហាតនៃរណសិរ្យអាល់ ណូស្រា។
តាំងពីឆ្នាំ ២០១៣ មក ចលនាអេស្បូឡាលីបង់បានបញ្ជូនកម្លាំងប្រដាប់អាវុធរបស់ខ្លួនជាច្រើនពាន់នាក់ទៅកាន់ប្រទេសស៊ីរី ក្រោមហេតុផលការពារស៊ីរីកុំឲ្យធ្លាក់ក្នុងកណ្តាប់ដៃអង្គការរដ្ឋអ៊ីស្លាម និងរណសិរ្យអាល់ ណូស្រា។ មេចលនាអេស្បូឡាបានបញ្ជាក់ជាថ្មីថា បើស៊ីរីធ្លាក់ក្នុងកណ្តាប់ដៃអង្គការរដ្ឋអ៊ីស្លាម ឬរណសិរ្យអាល់ ណូស្រា គឺជារឿងមួយគ្រោះថ្នាក់ខ្លាំងណាស់សម្រាប់ប្រទេសលីបង់។ ជាការពិត ស៊ីរី និងអ៊ីរ៉ាក់ពិតជាកំពុងទទួលរងការគំរាមកំហែងយ៉ាងខ្លាំងពីសំណាក់ពួកជីហាតអង្គការរដ្ឋអ៊ីស្លាម និងរណសិរ្យអាល់ ណូស្រា។ ទន្ទឹមគ្នានេះ កំណើនឥទ្ធិពលរបស់អង្គការរដ្ឋអ៊ីស្លាម និងរណសិរ្យអាល់ ណូស្រាក៏ជាក្តីបារម្ភខ្លាំងរបស់ពិភពលោកដែរ។
វាជារឿងល្អណាស់ដែលមេចលនាអេស្បូឡាបានចេញមុខប្តេជ្ញាចិត្តជាថ្មីក្នុងយុទ្ធនាការវាយកម្ទេចអង្គការរដ្ឋអ៊ីស្លាម និងរណសិរ្យអាល់ ណូស្រាឲ្យដល់ឫសគល់នៅក្នុងប្រទេសស៊ីរី ព្រោះនេះ ក៏ជាអ្វីដែលសហគមន៍អន្តរជាតិចង់បានដែរ។ តែបញ្ហាដែលកំពុងបន្តចោទឡើងនៅត្រង់ថា ចលនាអេស្បូឡាបានទៅចូលរួមជាមួយកម្លំាងទ័ពរបស់រដ្ឋាភិបាលស៊ីរីក្នុងការវាយកម្ទេចក្រុមប្រឆាំងស៊ីរីដែលកំពុងទទួលស្គាល់ដោយសហគមន៍អន្តរជាតិ។ គឺទង្វើរបស់ចលនានិកាយឈីអ៊ីតមានទំនោររកអ៊ីរ៉ង់ រួមជាមួយអន្តរាគមន៍របស់ទ័ពអាកាសរុស្ស៊ីកន្លងមកនេះហើយដែលបានធ្វើឲ្យកម្លាំងរបស់លោកប្រធានាធិបតីស៊ីរីអាសាដនិកាយឈីអ៊ីតមានប្រៀបជាងកម្លាំងក្រុមប្រឆាំង។
កម្លាំងរដ្ឋាភិបាលស៊ីរីមានប្រៀបជាងកម្លាំងក្រុមប្រឆាំងនៅលើសមរភូមិពេលនេះបានកើតមានឡើង ចំពេលដែលកិច្ចចរចាស្វែងរកសន្តិភាពឲ្យស៊ីរីរៀបចំក្នុងទីក្រុងហ្សឺណែវ ប្រទេសបានឈានចូលដល់សប្តាហ៍ទី២។ នៅក្នុងកិច្ចចរចាក្នុងសប្តាហ៍ទី១ រុស្ស៊ីបានធ្វើឲ្យគ្រប់គ្នាភ្ញាក់ផ្អើលដោយប្រកាសពីការដកកម្លាំងទ័ព និងសព្វាវុធពិសេសយន្តហោះចម្បាំងមួយចំនួនចេញពីទឹកដីស៊ីរី។ ទង្វើរបស់ក្រុងមូស្គូកាលណោះត្រូវបានសហគមន៍អន្តរជាតិចាត់ទុកជាកាយវិការវិជ្ជមានមួយដែលអាចជួយផ្តល់សន្ទុះនៅក្នុងកិច្ចចរចារវាងភាគីជម្លោះផ្ទៃក្នុងស៊ីរី។ តែផ្ទុយពីរុស្ស៊ី ចលនាអេស្បូឡាលីបង់បានប្រកាសបន្តរក្សាកម្លាំងរបស់ខ្លួននៅស៊ីរីរហូតដល់កម្ចាត់ពួកជីហាតអង្គការរដ្ឋអ៊ីស្លាម និងរណសិរ្យអាល់ណូស្រាបានទាំងស្រុង។
មកដល់ត្រង់ចំណុចនេះនាំឲ្យមានសំណួរចោទឡើងថា តើជំហររបស់ចលនាអេស្បូឡា លីបង់ពេលនេះនឹងមិនចូលទៅបង្កឲ្យមានបរិយាកាសតានតឹង អាប់អួរនៅក្នុងកិច្ចចរចាទេ ឬយ៉ាងណា?
ក្រុមអ្នកវិភាគបានយល់ឃើញថា តិច ឬច្រើនគឺមាន តែវាមិនរហូតដល់បំផ្លាញកិច្ចចរចានោះទេ។ ការហ៊ានអះអាងយ៉ាងដូចនេះមកពីគេយល់ថា តាំងពីស៊ីរីបានធ្លាក់ក្នុងវិបត្តិជាង ៥ឆ្នាំកន្លងទៅមក ប្រទេសក្នុងតំបន់ដើមបូព៌ាមួយបាន និងកំពុងបន្តក្លាយជាសមរភូមិនៃការដណ្តើមឥទ្ធិពលគ្នារវាងក្រុមនិកាយស៊ុយនីតដែលមានអារ៉ាប៊ីសាអូឌីតនៅពីក្រោយ និងក្រុមនិកាយឈីអ៊ីតដែលមានអ៊ីរ៉ង់ជាមេក្លោងជួយគាំទ្រដោយក្រុមឈីអ៊ីតអេស្បូឡាលីបង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ