អ.ស.ប.៖ប្រជាជនគួដនៅស៊ីរីត្រូវតែមានយោបល់ស្តីពីអនាគតនយោបាយស៊ីរី
លោកស្តាហ្វាន មីស្ទូរ៉ា ប្រេសិតពិសេសរបស់អង្គការសហប្រជាជាតិទទួលបន្ទុកសំណុំរឿងស៊ីរីបានយល់ឃើញថា ប្រជាជនគួដរស់នៅស៊ីរីត្រូវតែបញ្ចេញយោបល់របស់ខ្លួនទាក់ទងនឹងអនាគតនយោបាយស៊ីរី និងដំណើរការកសាងប្រទេសស៊ីរីឡើងវិញ។ លោកមីស្ទូរ៉ាបានថ្លែងយ៉ាងដូចនេះនៅក្នុងបទសម្ភាសន៍មួយជាមួយកាសែតស្វ៊ីសឈ្មោះ Le Temps នាថ្ងៃសៅរ៍ ទី១២ មីនា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
ការថ្លែងរបស់លោកប្រេសិតពិសេសអង្គការសហប្រជាជាតិស្តាហ្វាន មីស្ទូរ៉ាបានធ្វើឡើង មួយថ្ងៃមុនការបើកកិច្ចចរចាស្វែងរកសន្តិភាពឲ្យស៊ីរីដែលគ្រោងរៀបចំនៅថ្ងៃចន្ទ ទី១៤ មីនាដើមសប្តាហ៍ក្រោយ។ កិច្ចចរចាដែលនឹងចូលរួមដោយភាគីជម្លោះផ្ទៃក្នុងនៅស៊ីរី តែគ្មានវត្តមានអ្នកតំណាងប្រជាជនគួដរស់ក្នុងទឹកដីស៊ីរីទេ។ នៅក្នុងបទសម្ភាសន៍ជាមួយកាសែតស្វ៊ីសឈ្មោះ Le Temps លោកមីស្ទូរ៉ាបានទទួលស្គាល់ថា ប្រជាជនគួដស៊ីរីជាតួអង្គមួយយ៉ាងសំខាន់នៅស៊ីរីដែលគេត្រូវស្វែងរករូបមន្តកណ្តាលមួយដើម្បីអាចឲ្យពួកគេមានសិទ្ធិបញ្ចេញមតិយោបល់នៅក្នុងដំណើរការកសាងប្រទេសស៊ីរីឡើងវិញ។
ប្រតិកម្មរបស់ប្រេសិតពិសេសសហប្រជាជាតិរូបនេះបានធ្លាក់មក បន្ទាប់ពីលោកប្រមុខការទូតរុស្ស៊ីស៊ែរហ្កី ឡាវឺរ៉ូសបានស្នើកាលពីថ្ងៃសុក្រ ទី១១ មីនាឲ្យលោកមីស្ទូរ៉ាដាក់បញ្ចូលអ្នកតំណាងប្រជាជនគួដស៊ីរីនៅក្នុងកិច្ចចរចាស្វែងរកសន្តិភាពឲ្យស៊ីរីនៅសប្តាហ៍ក្រោយ។ លោកឡាវឺរ៉ូសបានយល់ឃើញថា ការមិនដាក់ភាគីគួដស៊ីរីទៅក្នុងកិច្ចចរចា គឺជាសញ្ញាទន់ខ្សោយរបស់សហគមន៍អន្តរជាតិ។ គួរជម្រាបជូនថា ប្រជាជនគួដនៅស៊ីរីដែលជាសម្ព័ន្ធមិត្តរបស់រុស្ស៊ី និងអាមេរិកកំពុងកាន់កាប់ទឹកដីស៊ីរីជាង ១០% ដែលមាន ៣ភាគ៤ ស្ថិតក្បែរព្រំដែននឹងប្រទេសតួកគី។
លោកមីស្ទូរ៉ាបានបញ្ជាក់ជាថ្មីថា នៅក្នុងគម្រោងកិច្ចចរចាវគ្គទី២ នៅសប្តាហ៍ក្រោយ លោកបានអញ្ជើញភាគីដដែលដូចនៅក្នុងវគ្គទី១ នាខែកុម្ភៈកន្លងទៅ ពោលមិនមានអ្នកតំណាងពួកគួដស៊ីរីទេ។ ទាក់ទងនឹងគម្រោងរៀបចំបោះឆ្នោតសភានៅខែមេសារបស់លោកប្រធានាធិបតីស៊ីរីអាសាដត្រូវបានលោកមីស្ទូរ៉ាអះអាងថា នឹងគ្មានតម្លៃអ្វីទាំងអស់ និងថា មានតែការបោះឆ្នោតសម្រេចដោយក្រុមប្រឹក្សាសន្តិសុខ និងរៀបចំដោយអង្គការសហប្រជាជាតិតែមួយគត់ដែលមានតម្លៃពិតប្រាកដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ