ក្រោយការលើកទ័ណ្ឌកម្ម អ៊ីរ៉ង់បានក្លាយជាទីផ្សារដែលអន្តរជាតិកំពុងដណ្តើមគ្នា
ចុះផ្សាយនៅថ្ងៃ៖
ស្តាប់ - ០៤:៣៩
តាំងពីកិច្ចព្រមព្រៀងស្តីពីនុយក្លេអ៊ែរអ៊ីរ៉ង់បានចូលជាធរមាននៅថ្ងៃសៅរ៍ ទី១៦ មករាមក សហគមន៍អន្តរជាតិ និងប្រទេសលោកខាងលិចក៏បានផ្តើមលើកទ័ណ្ឌកម្មសេដ្ឋកិច្ចជាបណ្តើរៗចេញពីអ៊ីរ៉ង់ដែរ។ ទន្ទឹមនឹងការលើកទ័ណ្ឌកម្មសេដ្ឋកិច្ច សហគមន៍អន្តរជាតិក៏នឹងចាប់ផ្តើមពិនិត្យមើលឡើងវិញដែរនៅក្នុងទំនាក់ទំនងការទូតជាមួយអ៊ីរ៉ង់។ ឃើញថាចាប់ពីពេលនេះតទៅ អ៊ីរ៉ង់បានក្លាយពីប្រទេសដែលគេមិនសូវនិយាយរកទៅជាប្រទេសដែលគ្រប់គ្នាកំពុងតាមចៃចង់ ពិសេសនៅក្នុងវិស័យសេដ្ឋកិច្ច។
នៅមិនទាន់ក្លាយពីរាត្រីទឹកខ្មេះទៅជារាត្រីទឹកឃ្មុំនៅឡើយទេ តែជារាត្រីនៃការផ្តើមចែចង់គ្នាឡើងវិញ បន្ទាប់ពីបានបែរខ្នងដាក់គ្នាអស់ជាច្រើនឆ្នាំរវាងអ៊ីរ៉ង់ និងសហគមន៍អន្តរជាតិ និយាយជារួម និងជាមួយបណ្តាប្រទេសលោកខាងលិចមួយចំនួន និយាយដោយឡែក។ គួរជម្រាបជូនថាតាមពិតទៅ កិច្ចព្រមព្រៀងស្តីពីសំណុំរឿងនុយក្លេអ៊ែរអ៊ីរ៉ង់ត្រូវបានចុះហត្ថលេខាតាំងពីថ្ងៃទី១៤ កក្កដា ឆ្នាំ ២០១៥មកម្ល៉េះ តែគឺទើបដាក់ឲ្យចូលជាធរមាននាថ្ងៃទី១៦ មករាថ្មីៗកន្លងទៅទេ។ តាំងពីក្រោយថ្ងៃចូលជាធរមានមក សហគមន៍អន្តរជាតិទូទៅ និងប្រទេសបស្ចិមលោកភាគច្រើនបានបញ្ចេញប្រតិកម្មអបអរសាទរ។ តែសម្រាប់ប្រទេសសត្រូវស៊ូពូជនឹងអ៊ីរ៉ង់ខ្លះ មានអ៊ីស្រាអែលនាំមុខ មិនបានត្រេកត្រអាលនឹងដំណឹងថ្មីនេះសោះឡើយ។
ជោគជ័យការទូតរបស់សហគមន៍អន្តរជាតិក្នុងសំណុំរឿងនុយក្លេអ៊ែរអ៊ីរ៉ង់ ពិតជារឿងមួយមិនអាចប្រកែកបានទេ តែអ្វីដែលក្រុមអ្នកវិនិយោគបរទេសកំពុងហៀរទឹកមាត់ និងសម្លឹងមើលដោយមិនប៉ប្រិចភ្នែកនោះ គឺសក្តានុពលសេដ្ឋកិច្ចរបស់អ៊ីរ៉ង់។ ចូរកុំភ្លេចថា អ៊ីរ៉ង់ជាប្រទេសដែលមានចំនួនប្រជាជនច្រើនជាងគេនៅក្នុងតំបន់ ពោលមានដល់ទៅ ៨០លាននាក់។ ទន្ទឹមគ្នានេះ ប្រជាជនអ៊ីរ៉ង់ក៏ត្រូវបានគេចាត់ទុកជាពលរដ្ឋដែលទទួលបានការអប់រំល្អណាស់។ តែគួរឲ្យស្តាយ ទ័ណ្ឌកម្មសេដ្ឋកិច្ចអន្តរជាតិអស់ជាច្រើនឆ្នាំកន្លងទៅបានធ្វើឲ្យសាធារណរដ្ឋអ៊ីស្លាមមួយនេះមានស្ថានភាពសេដ្ឋកិច្ចយ៉ាងត្រដាបត្រដួស។
អ៊ីរ៉ង់មិនខ្វះធនធានធម្មជាតិទេ ព្រោះជាប្រទេសជ្រងុកប្រេងឆៅទី៤ និងជង្រុកឧស្ម័នទី២ ក្នុងលោក ប្រជាជនអ៊ីរ៉ង់មានសមត្ថភាព និងទទួលបានការអប់រំល្អ ហើយរដ្ឋាភិបាលសព្វថ្ងៃក៏មានឆន្ទៈដើម្បីស្តារសេដ្ឋកិច្ចរបស់ប្រទេសឡើងវិញដែរ តែអ្វីដែលខ្វះនៅពេលនេះ គឺលទ្ធភាព និយាយឲ្យស្រួលយល់ គឺលុយកាក់ និងបច្ចេកវិទ្យាសម័យថ្មីដែលអ៊ីរ៉ង់មានការយឺតយ៉ាវខ្លាំងណាស់ បើធៀបនឹងប្រទេសមួយចំនួននៅក្នុងតំបន់។ នៅត្រង់ចំណុចនេះ លោកប្រធានាធិបតីអ៊ីរ៉ង់ហាសាន រ៉ូហានីពិតជាយល់មិនច្រឡំទេថា តម្រូវការនៅចំពោះមុខ និងជាបន្ទាន់របស់អ៊ីរ៉ង់ពេលនេះ គឺក្រុមអ្នកវិនិយោគបរទេស។
លោករ៉ូហានីបានថ្លែងថា នៅក្នុងរយៈពេល ៥ឆ្នាំខាងមុខ អ៊ីរ៉ង់ត្រូវការទុនវិនិយោគបរទេសពី ៣០ ០០០លានទៅ ៥០ ០០០លានដុល្លារ។ ជាមួយនឹងទុនវិនិយោគបរទេសកម្រិតនេះ អ៊ីរ៉ង់អាចនឹងទទួលបានកំណើនសេដ្ឋកិច្ចក្នុងរង្វង់ ៨% ទល់នឹង ០% ដែលអ៊ីរ៉ង់កំពុងមានសព្វថ្ងៃ។ ក្រៅពីវិនិយោគបរទេស លោកប្រធានាធិបតីអ៊ីរ៉ង់ក៏បានប្រាប់ឲ្យដឹងនូវអនាគតអាទិភាពរបស់អ៊ីរ៉ង់ផ្សេងទៀត រួមមាន ការអភិវឌ្ឍន៍នៅលើវិស័យនាំចេញក្រៅពីផលិតផលប្រេងឆៅ និងការប្រើប្រាស់ថវិកាឲ្យចំទិសដៅ។
គួរជម្រាបជូនថា សេដ្ឋកិច្ចរបស់អ៊ីរ៉ង់ជាសេដ្ឋកិច្ចចម្រុះដែលមិនបានពឹងផ្អែកតែលើចំណូលបានមកពីការលក់ប្រេងឆៅមួយមុខទេ តែក៏បានមកពីការអភិវឌ្ឍន៍នៅលើវិស័យចម្រុះមួយចំនួនទៀតដែរ ពិសេសវិស័យកសិកម្ម និងវិស័យឧស្សាហកម្មរថយន្ត។ ដូច្នេះឃើញថា ការធ្លាក់ថ្លៃតម្លៃប្រេងឆៅនៅលើទីផ្សារអន្តរជាតិសព្វថ្ងៃនឹងមិនសូវជះឥទ្ធិពលអាក្រក់ដល់អ៊ីរ៉ង់ប៉ុន្មានទេ។ ផ្ទុយទៅវិញ វាអាចនឹងធ្វើឲ្យអ៊ីរ៉ង់ស្តារភាពយឺតយ៉ាវរបស់ខ្លួនបានឆាប់រហ័សធៀបនឹងប្រទេសផ្សេងក្នុងតំបន់ដែលពឹងតែលើចំណូលបានពីការបូមប្រេងលក់ ដូចយ៉ាងអារ៉ាប៊ីសាអូឌីត។
តម្រូវការរបស់អ៊ីរ៉ង់គឺធំធេងណាស់ដើម្បីស្តារវិស័យសេដ្ឋកិច្ច និងហេដ្ឋារចនាសម្ព័ន្ធរបស់ខ្លួនឡើងវិញ មានទាំងសម្ភារៈ និងចំណេះដឹង។ ក៏ប៉ុន្តែនៅចំពោះមុខ វិស័យប្រេងត្រូវបានគេមើលឃើញថា ជាវិស័យដែលត្រូវអភិវឌ្ឍន៍បន្ថែមជាបន្ទាន់ តាមរយៈការដំឡើងផលិតកម្មប្រេងដោយបង្កើនការបូមបន្ថែម។ អ៊ីរ៉ង់ជាប្រទេសដែលមានសក្តានុពលសេដ្ឋកិច្ចដែលគេមិនអាចមើលរំលងបានទេ តែគេក៏ត្រូវហ៊ាននិយាយថា អ្នកដែលចង់ដណ្តើមយកសក្តានុពលសេដ្ឋកិច្ចរបស់អ៊ីរ៉ង់ក៏មានច្រើនដែរ។ អាមេរិក បារាំង រុស្ស៊ី ចិន អ៊ីតាលី អាល្លឺម៉ង់ និងមានប្រទេសជាច្រើនទៀត រួមទាំងជាអតីតសត្រូវរបស់អ៊ីរ៉ង់ផងបាន និងកំពុងបន្តបញ្ចេញមន្តស្នេហ៍តាមចែចង់អ៊ីរ៉ង់។
ដូច្នេះអ៊ីរ៉ង់ពិតជាមានជម្រើសច្រើនដែលខ្លួនអាចជ្រើសរើសបានដោយផ្អែកទៅតាមតម្រូវការជាក់ស្តែងរបស់ខ្លួន។ តែទោះជាយ៉ាងនេះក្តី និងអ្វីដែលប្រទេសចង់រកស៊ីជាមួយអ៊ីរ៉ង់មិនត្រូវភ្លេចនោះគឺថា ឡានក្រោយអាចនឹងចង្អៀតជាងឡានមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ