លោកចន ឃេរីទៅអារ៉ាប៊ី សាអូឌីត ដើម្បីធានាសម្ព័ន្ធមិត្តអារ៉ាប់ ដែលបារម្ភពីការខិតជិតគ្នា រវាងអាមេរិក និងអ៊ីរ៉ង់
លោកប្រមុខការបរទេសអាមេរិក ចន ឃេរីបានធ្វើដំណើរ ទៅប្រទេសអារ៉ាប៊ី សាអូឌីត នៅថ្ងៃព្រហស្បតិ៍ ទី ៥មីនា។ ក្នុងកិច្ចប្រជុំជាមួយរដ្ឋមន្រ្តីការបរទេសរបស់បណ្តាប្រទេសអារ៉ាប់ នៅសមុទ្រ ពែរ្ស៍ លោកចន ឃេរី ត្រូវគេរំពឹងថា នឹងបកស្រាយប្រាប់សម្ព័ន្ធមិត្តអារ៉ាប់ ពីជំហររបស់អាមេរិក ចំពោះប្រទេសអ៊ីរ៉ង់។ អ៊ីរ៉ង់ ដែលដឹកនាំមុខដោយក្រុមកាន់និកាយសាសនាស្ហ៊ីអ៊ីត ជាគូប្រជែងយ៉ាងសំខាន់របស់ប្រទេសអារ៉ាប់ ជាពិសេស អារ៉ាប៊ី សាអូឌីត ដែលសំបូរដោយក្រុមអ្នកកាន់សាសនាស៊ុននីត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
គ្រាន់តែចប់កិច្ចប្រជុំបីថ្ងៃ ស្តីពីកម្មវិធីនុយក្លេអ៊ែរ ជាមួយប្រមុខការបរទេសអ៊ីរ៉ង់ រដ្ឋមន្រ្តីការបរទេសអាមេរិក លោកចន ឃេរី បានចេញដំណើរភ្លាម ទៅប្រទេសអារ៉ាប៊ី សាអូឌីត។ នៅថ្ងៃព្រហស្បតិ៍នេះ លោកចន ឃេរី ត្រូវជួបប្រជុំជាមួយរដ្ឋមន្រ្តីការបរទេសរបស់ប្រទេសអារ៉ាប់ទាំង៦ នៃឈូងសមុទ្រពែរ្ស៍ នៅមូលដ្ឋានទ័ពអាកាស ក្នុងទីក្រុងរីយ៉ាត។
នៅអារ៉ាប៊ី សាអូឌីត កិច្ចប្រជុំស្តីពីការប្រយុទ្ធប្រឆាំងនឹងក្រុមជីហាតនៃអង្គការរដ្ឋអ៊ីស្លាម នៅស៊ីរី និងនៅ អ៊ីរ៉ាក់ ឬវិបត្តិនយោបាយនៅ យេម៉ែន ជាប្រធានបទដែលលោកចនឃេរី ត្រូវលើកនិយាយជាមួយប្រទេសសម្ព័ន្ធមិត្តអារ៉ាប់។ ប៉ុន្តែ ជាមួយគ្នានោះ គេមើលឃើញថា ការណ៍ដែលលោកចន ឃេរីប្រញាប់ធ្វើដំណើរទៅអារ៉ាប៊ី សាអូឌីត នៅក្រោយចប់កិច្ចប្រជុំជាមួយរដ្ឋមន្រ្តីការបរទេសអ៊ីរ៉ង់ ក៏ព្រោះតែលោកចន ឃេរីចង់និយាយធានា ផ្តល់ទំនុកចិត្តដល់ប្រទេសអារ៉ាប់ សម្ព័ន្ធមិត្ត។
ថ្មីៗនេះ សម្ព័ន្ធមិត្តជាច្រើនរបស់អាមេរិក នៅក្នុងតំបន់ដើមបូព៌ា មិនថា អ៊ីស្រាអែល ឬប្រទេសអារ៉ាប់ ដែលជាគូប្រជែងរបស់អ៊ីរ៉ង់ នៅក្នុងតំបន់ ចាប់បារម្ភ ក្រែងអាមេរិកប្តូរជំហរ ចំពោះប្រទេសអ៊ីរ៉ង់ បន្ទាប់ពីប្រទេសទាំងពីរបង្កើនការចរចាដើម្បីរកកិច្ចព្រមព្រៀង មួយស្តីពីកម្មវិធីនុយក្លេអ៊ែរអ៊ីរ៉ង់ ឲ្យបានមុនដាច់ខែមីនានេះ។ សម្ព័ន្ធមិត្តរបស់អាមេរិកខ្លាចថា កិច្ចព្រមព្រៀងណាមួយ ស្តីពីកម្មវិធីនុយក្លេអ៊ែររបស់អ៊ីរ៉ង់ នឹងធ្វើឲ្យអាមេរិកត្រូវរ៉ូវគ្នាឡើងវិញ ជាមួយអ៊ីរ៉ង់។
មុននឹងចាកចេញពី ប្រទេសស្វ៊ីស នៅថ្ងៃពុធ លោកចន ឃេរីបាននិយាយថា លោកយល់ពីជំហររបស់ប្រទេសនានាទៅលើប្រទេសអ៊ីរ៉ង់។ អាមេរិកក៏មានជំហរមួយច្បាស់លាស់ ចំពោះអ៊ីរ៉ង់ ប៉ុន្តែ ដំបូងគេត្រូវដោះស្រាយធ្វើយ៉ាងណាកុំឲ្យប្រទេសអ៊ីរ៉ង់អាចមានអាវុធនុយក្លេអ៊ែរជាមុនសិន។ តាមគម្រោង បើសិនអ៊ីរ៉ង់ និងក្រុមប្រទេសមហាអំណាចអាចរកឃើញកិច្ចព្រមព្រៀងស្តីពីកម្មវិធីនុយក្លេអ៊ែរ នោះអ៊ីរ៉ង់នឹងអាចទទួលបានការដកទណ្ឌកម្មសេដ្ឋកិច្ចពីអាមេរិក អឺរ៉ុប និងអង្គការសហប្រជាជាតិ។ ជាថ្នូរមកវិញ អ៊ីរ៉ង់ត្រូវយល់ព្រមឈប់ចម្រើនធាតុអ៊ុយរ៉ានីញ៉ូម ក្នុងកម្រិតខ្ពស់ ដែលអាចឲ្យគេយកទៅផលិតជាអាវុធនុយក្លេអ៊ែរបាន។
Mari Harf អ្នកនាំពាក្យរបស់ក្រសួងការបរទេសអាមេរិក បាននិយាយធានាដែរថា អាមេរិកធ្វើការចរចាជាមួយអ៊ីរ៉ង់ ដើម្បីរកឲ្យឃើញកិច្ចព្រមព្រៀង ស្តីពីកម្មវិធីនុយក្លេអ៊ែរ អ៊ីរ៉ង់ ប៉ុន្តែ មិនមែន ក្នុងគោលដៅចង់ផ្សះផ្សាទំនាក់ទំនងជាមួយអ៊ីរ៉ង់នោះទេ។ អាមេរិក និងអ៊ីរ៉ង់បានផ្តាច់ទំនាក់ទំនងការទូតនឹងគ្នា តាំងពីឆ្នាំ ១៩៨០ បន្ទាប់ពីអ៊ីរ៉ង់ជួបបដិវត្តន៍អ៊ីស្លាម និងក្រោយការចាប់មន្រ្តីទូតអាមេរិកធ្វើជាចំណាប់ខ្មាំង នៅឆ្នាំ ១៩៧៩។ អាមេរិកនៅតែចាត់ទុកអ៊ីរ៉ង់ក្នុងបញ្ជីប្រទេសភេរវនិយម ដែលបានគាំទ្ររបបផ្តាច់ការរបស់ប្រធានាធិបតីស៊ីរី។ ប៉ុន្តែ កន្លងមក អាមេរិក ធ្លាប់បានលើកឡើង ពីលទ្ធភាពសើរើឡើងវិញ នូវការដាក់ទណ្ឌកម្មសេដ្ឋកិច្ច ក្នុងករណីអ៊ីរ៉ង់យល់ព្រមបញ្ឈប់កម្មវិធីនុយក្លេអ៊ែរយោធា ដើម្បី ផលិតអាវុធបរិមាណូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ