លោកចូ បៃដិន គំរាមឈប់ផ្គត់ផ្គត់អាវុធ ប្រសិនបើអ៊ីស្រាអែលបើកប្រតិបត្តិការចូលទីក្រុងរ៉ាហ្វា
ជាលើកទីមួយ លោកប្រធានាធិបតីសហរដ្ឋអាមេរិក ចូ បៃដិន បាននិយាយដាក់លក្ខខណ្ឌច្បាស់ៗទៅលើអ៊ីស្រាអែល ថាប្រសិនបើកងទ័ពអ៊ីស្រាអែល នៅតែមានះ បើកប្រតិបត្តិការសំរុកចូលទៅទីក្រុងរ៉ាហ្វាភាគខាងត្បូងហ្កាហ្សា នោះសហរដ្ឋអាមេរិក នឹងឈប់ផ្គត់ផ្គង់អាវុធ។ ជាប្រតិបត្តិការយោធាដែលបង្កឲ្យមានការព្រួយបារម្ភជាខ្លាំង ព្រោះតំបន់រ៉ាហ្វា កកកុញដោយប្រជាជនប៉ាឡេស្ទីន១លាន៤សែននាក់។ យ៉ាងណាក៏ដោយ នៅព្រឹកថ្ងៃព្រហស្បតិ៍ទី៩ឧសភានេះ កងទ័ពអ៊ីស្រាអែល បានចាប់ផ្តើមបាញ់ប្លោងគ្រាប់ទៅកាន់ក្រុងរ៉ាហ្វា ដោយអះអាងថាដើម្បីកំទេចក្រុមភេរវកម្មហាម៉ាសរាប់ពាន់នាក់ ដែលលាក់ខ្លួននៅទីនោះ។
ចុះផ្សាយនៅថ្ងៃ៖
ស្តាប់ - ០៣:០១
នៅក្នុងបទសម្ភាសន៍មួយលើបណ្តាញទូរទស្សន៍CNN ផ្សាយកាលពីល្ងាចថ្ងៃទី៨ឧសភា លោកចូ បៃដិន បានលើកឡើងថា “ប្រសិនបើទាហានអ៊ីស្រាអែល សំរុកចូលទៅរ៉ាហ្វា ខ្ញុំនឹងមិនឈប់បញ្ជូនអាវុធទៅឲ្យអ៊ីស្រាអែលតទៅទៀត។ ជាអាវុធដែលតាមធម្មតា គេយកទៅប្រើដើម្បីបើកប្រតិបត្តិការនៅតាមទីក្រុង”។ លោកចូ បៃដិន បានលើកបន្ថែមថា អាវុធដែលអាមេរិកនឹងឈប់បញ្ជូនទៅឲ្យអ៊ីស្រាអែល គឺមានជាអាទិ៍ គ្រាប់បែកធន់ធំ។
ភ្លាមៗក្រោយការប្រកាសគំរាមដាក់លក្ខខណ្ឌចំៗ ពីសំណាក់លោកចូ បៃដិននេះ អគ្គរដ្ឋទូតអ៊ីស្រាអែលប្រចាំនៅអង្គការសហប្រជាជាតិ បានថ្លែងតាមវិទ្យុជាតិអ៊ីស្រាអែលថា “ការប្រកាសរបស់លោកចូ បៃដិននេះ ជាការប្រកាសដែលពិបាកនឹងស្តាប់ ហើយគួរឲ្យខកចិត្តខ្លាំងណាស់ ព្រោះថាតាំងតែពីដំបូង លោកប្រធានាធិបតីបៃដិន គឺជាអ្នកគាំទ្រយើងជានិច្ច”។ មន្ត្រីទូតអ៊ីស្រាអែលរូបនេះ បន្តថា ការដាក់សំពាធមកលើអ៊ីស្រាអែលពីសំណាក់សម្ព័ន្ធមិត្ត គឺវានឹងអនុញ្ញាតឲ្យសត្រូវរបស់អ៊ីស្រាអែលយកទៅបកស្រាយ ហើយនិងផ្តល់ក្តីសង្ឃឹមឲ្យពួកគេ។
លោកអគ្គរដ្ឋទូតអ៊ីស្រាអែលប្រចាំនៅអង្គការសហប្រជាជាតិ បានចោទសួរថា បើអ៊ីស្រាអែលត្រូវគេហាមឃាត់មិនឲ្យចូលទៅរ៉ាហ្វា ជាទីដែលពួកភេរវកម្មហាម៉ាសរាប់ពាន់នាក់សំងំលាក់ខ្លួន ហើយជាទីដែលចំណាប់ខ្មាំងកំពុងតែស្ថិតនៅ តើកម្មវត្ថុកំទេចក្រុមហាម៉ាសទាំងស្រុង នឹងអាចសម្រេចបានដែរឬទេ? លោកបានអះអាងថា ទោះជាយ៉ាងណាក៏ដោយ ទីបំផុតអ៊ីស្រាអែលនឹងសម្រេចចិត្តធ្វើអ្វីមួយដែលអ៊ីស្រាអែលគិតថាចាំបាច់ ដើម្បីការពារសន្តិសុខ របស់ប្រជាជនអ៊ីស្រាអែល។
សូមបញ្ជាក់ថា អស់រយៈពេលច្រើនថ្ងៃមកហើយ ដែលលោកនេតាន់យ៉ាហ៊ូ បានប្រកាសថានឹងបើកប្រតិបត្តិការកងទ័ពថ្មើរជើង សំរុកចូលទៅក្នុងទីក្រុងរ៉ាហ្វា ភាគខាងត្បូងហ្កាហ្សា ដើម្បីសម្រេចកម្មវត្ថុ កំទេចក្រុមហាម៉ាសឲ្យវិនាសទាំងស្រុង និងរំដោះចំណាប់ខ្មាំងមកវិញ។ តែយ៉ាងណា មានការព្រួយបារម្ភជាខ្លាំង ថាប្រតិបត្តិការនេះនឹងក្លាយជាការបង្ហូរឈាមស្លាប់ប្រជាជនស៊ីវីល ព្រោះថាទីក្រុងនេះកកកុញទៅដោយជនភៀសខ្លួនប៉ាឡេស្ទីនប្រមាណ១លាន៤សែននាក់។
ដើម្បីបង្ហាញការជំទាស់ទៅនឹងផែនការរបស់លោកនេតាន់យ៉ាហ៊ូនេះ រដ្ឋបាលលោកចូ បៃដិន បានសម្រេចផ្អាកការបញ្ជូនគ្រាប់បែកខ្នាតធំទំងន់៩០០គីឡូក្រាមចំនួន១៨០០គ្រាប់ និងគ្រាប់បែកទំងន់២២០គីឡូក្រាមចំនួន១៧០០គ្រាប់ កាលពីសប្តាហ៍កន្លងទៅ។ នេះបើផ្អែកតាមការលើកឡើងរបស់មន្ត្រីជាន់ខ្ពស់ម្នាក់នៃរដ្ឋាភិបាលអាមេរិក។
តែយ៉ាងណាក៏ដោយ ការដាក់សំពាធពីសំណាក់វ៉ាស៊ីនតោននេះ ហាក់មិនបានធ្វើឲ្យលោកនេតាន់យ៉ាហ៊ូរាថយឡើយ។ យោងតាមអ្នកយកព័ត៌មានAFP កងទ័ពអ៊ីស្រាអែលបានបាញ់ប្លោងគ្រាប់ជាច្រើន ចូលទៅរ៉ាហ្វា ក្នុងវេលាយប់ថ្ងៃពុធឈានចូលថ្ងៃព្រហស្បតិ៍ទី៩ឧសភា ខណៈរថក្រោះជាច្រើនគ្រឿងកំពុងសំរុកចូលទៅ។ កងទ័ពអ៊ីស្រាអែលអះអាងថា ជាប្រតិបត្តិការវាយកំទេចទីតាំង របស់ក្រុមភេរវកម្មហាម៉ាសនៅក្នុងទីក្រុងរ៉ាហ្វា។ កងទ័ពអ៊ីស្រាអែលអះអាងទៀតថា ច្រកកេរ៉េមស្ហាឡុមដែលត្រូវអាជ្ញាធរអ៊ីស្រាអែលបើកឲ្យរថយន្តដឹកស្បៀងចូល ត្រូវបានក្រុមហាម៉ាសបាញ់ប្លោងគ្រាប់រ៉ូកែតសំដៅមកលើ កាលពីថ្ងៃពុធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ