លោកចន ឃ៊ែរី៖អាមេរិកត្រូវតែនិយាយជាមួយលោកអាសាដដើម្បីបញ្ចប់ជម្លោះនៅស៊ីរី
ចុះផ្សាយនៅថ្ងៃ៖
ស្តាប់ - ០៥:៣៤
គិតត្រឹមថ្ងៃអាទិត្យ ទី១៥ មីនា ឆ្នំា ២០១៥ ប្រទេសស៊ីរីបានឆ្លងកាត់សង្រ្គាមស៊ីវិលអស់រយៈពេល ៤ឆ្នំាគត់។ សង្រ្គាមស៊ីវិលរយៈពេល ៤ឆ្នំាដែលបានបណ្តាលឲ្យមានមនុស្សស្លាប់ជាង ២១៥ ០០០នាក់ និងមានជនភៀសខ្លួនរាប់សិបលាននាក់ផ្សេងទៀត។ ៤ឆ្នំាក្រោយមក គេនៅតែមិនទាន់អាចរកដំណោះស្រាយឃើញនៅឡើយ នោះបើទោះបីជាសហគមន៍អន្តរជាតិបានខិតខំប្រឹងប្រែងយ៉ាងណាក៏ដោយ។ រហូតមកដល់ពេលនេះ សហគមន៍អន្តរជាតិ រួមទំាងអាមេរិកបានចាត់ទុកលោកប្រធានាធិបតីស៊ីរីអាសាដជាតួអង្គនយោបាយម្នាក់ដែលមិនត្រូវរាប់បញ្ចូលនៅក្នុងដំណោះស្រាយទេ ពោលត្រូវតែកំចាត់ចេញពីឆាកនយោបាយស៊ីរី។ តែគួរឲ្យភ្ញាក់ផ្អើល លោកប្រមុខរដ្ឋការទូតអាមេរិកចន ឃ៊ែរីបែរជាបានប្រកាសក្តែងៗថា គេត្រូវតែចរចាជាមួយលោកអាសាដដើម្បីអាចបិទបញ្ចប់ជម្លោះនៅស៊ីរី។ ហេតុអ្វីបានជាអាមេរិកប្តូរយុទ្ធសាស្រ្ត ១៨០អង្សាររបៀបនេះ?
គឺនៅក្នុងបទសម្ភាសន៍ជាមួយទូរទស្សន៍អាមេរិកំាង CBS ក្នុងថ្ងៃអាទិត្យ ទី១៥ មីនាដែលលោកប្រមុខការទូតអាមេរិកចន ឃ៊ែរីបានថ្លែងទាក់ទងនឹងស្ថានការណ៍នៅក្នុងប្រទេសស៊ីរីយ៉ាងដូច្នេះថា « អាមេរិក រួមជាមួយគ្រប់ភាគីពាក់ព័ន្ធបានធ្វើការយ៉ាងសកម្មដើម្បីស្វែងរកដំណោះស្រាយតាមផ្លូវទូតឲ្យវិបត្តិស៊ីរី។ នេះក៏ដោយសារតែគ្រប់គ្នាបានយល់ឃើញថា ដំណោះស្រាយឲ្យវិបត្តិស៊ីរីមិនអាចធ្វើឡើងតាមផ្លូវយោធាបានទេ ពោលមានតែតាមផ្លូវនយោបាយមួយគត់។ ក៏ប៉ុន្តែ ដើម្បីអាចនំារបបរបស់លោកប្រធានាធិបតីស៊ីរីអាសាដឲ្យចូលតុចរចាបាន គេត្រូវតែនិយាយពន្យល់លោកអាសាដឲ្យច្បាស់ថា សហគមន៍អន្តរជាតិចង់បានដំណោះស្រាយមួយតាមផ្លូវនយោបាយ។ ដូច្នេះខ្ញុំយល់ឃើញថា ជាមួយនឹងប្រទេសសម្ព័ន្ធមិត្តផ្សេងទៀត យើងអាចបន្តដាក់គំនាបលើលោកអាសាដ។ នៅចុងបញ្ចប់ គេត្រូវតែនិយាយជាមួយអាសាដដោយចៀសមិនរួច »។
តាមរយៈសម្តីរបស់លោកចន ឃ៊ែរីពេលនេះនំាឲ្យមានសំណួរចោទឡើងថា តើអាមេរិកពិតជាចង់ប្តូរយុទ្ធសាស្រ្ត ១៨០អង្សារទាក់ទងនឹងស្ថានការណ៍នៅស៊ីរីពេលនេះមែនឬ និងថា តើគេអាចរកដំណោះស្រាយឲ្យវិបត្តិស៊ីរីដោយទាត់ចោលលោកអាសាដបានដែរ ឬទេ?
មុននឹងឆ្លើយសំណួរនេះ គេគួរតែងាកទៅមើលប្រតិកម្មរបស់ក្រសួងការបរទេសអាមេរិកខ្លួនឯងជាមុនសិន។ ក្រោយការថ្លែងរបស់លោកចន ឃ៊ែរបន្តិច ក្រសួងការបរទេសអាមេរិកបែរជាបានប្រញិបប្រញាប់ចេញផ្សាយសេចក្តីថ្លែងការណ៍មួយដោយបញ្ជាក់ច្បាស់ៗថា អាមេរិកមិនប្តូរជំហររបស់ខ្លួនទាក់ទងនឹងរឿងស៊ីរីទេ មានន័យថា ប្រសិនបើមានការចរចាណាមួយត្រូវធ្វើឡើងជាមួយរបបក្រុងដាម៉ាស់សព្វថ្ងៃមែន នោះគឺជាការជួបចរចាជាមួយក្រុមអ្នកតំណាងរដ្ឋាភិបាល ពោលមិនមែនជួបចរចាផ្ទាល់ជាមួយលោកអាសាដទេ។ សេចក្តីជូនដំណឹងដដែលបានបន្ថែមថា គ្មានកន្លែងសម្រាប់មនុស្សផ្តាច់ការដូចអាសាដនៅស៊ីរីទេ។ ប្រតិកម្មដូចគ្នានេះក៏មានដែរពីក្រសួងការបរទេសអង់គ្លេសតបទៅនឹងការថ្លែងរបស់លោកចន ឃ៊ែរី។
គួររម្លឹកជូនឡើងវិញបន្តិចថា តំាងពីស៊ីរីបានធ្លាក់ក្នុងវិបត្តិនយោបាយកាលពីឆ្នំា ២០១១ មក សហគមន៍អន្តរជាតិ រួមទំាងអាមេរិកបានព្យាយាមស្វែងរកដំណោះស្រាយតាមផ្លូវនយោបាយដោយបានរៀបចំសន្និសីទចំនួន ២លើកក្នុងទីក្រុងហ្សឺណែវ ប្រទេសស្វ៊ីស។ តែសន្និសីទទំាងពីរលើកដែលបានចូលរួមដោយក្រុមប្រឆំាង និងក្រុមតំណាងរដ្ឋាភិបាលមិនបានហុចចេញនូវលទ្ធផលអ្វីទំាងអស់។ តាមពិតទៅ និងអ្វីដែលជាឧបសគ្គនៅក្នុងកិច្ចចរចាទំាងពីរលើកកន្លងមក គឺតួអង្គលោកអាសាដតែម្នាក់គត់ដែលសហគមន៍អន្តរជាតិ និងក្រុមប្រឆំាងមិនចង់ឲ្យមានវត្តមាននៅក្នុងដំណោះស្រាយអនាគតស៊ីរី។ តែបញ្ហានៅត្រង់ថា ក្រុមតំណាងរដ្ឋាភិបាលមិនសុខចិត្តដោយពួកគេយល់ថា លោកអាសាដជាតួអង្គមួយមិនអាចខ្វះបានទេសម្រាប់អនាគតនយោបាយនៅស៊ីរី។
គឺផ្តើមចេញពីការខ្វែងគំនិតគ្នាលើតួអង្គលោកអាសាដនេះឯងដែលបានធ្វើឲ្យវិបត្តិស៊ីរីអូសបន្លាយគ្មានច្រកចេញមកដល់សព្វថ្ងៃ។ ដោយឡែក និងក្នុងពេលដែលដំណោះស្រាយផ្លូវទូតកំពុងជាប់គំាង ចំនួនមនុស្សស្លាប់ និងចំនួនជនភៀសខ្លួនបាន និងកំពុងបន្តកើនឡើងជារៀងរាល់ថ្ងៃ។ គ្រាន់តែក្នុងរយៈពេល ៤ឆ្នំា សង្រ្គាមស៊ីវិលបានផ្តាច់ជីវិតមនុស្សជាង ២១៥ ០០០នាក់ និងបានបង្ខំឲ្យប្រជាជនពាក់កណ្តាលរត់ចោលផ្ទះសម្បែងរបស់ខ្លួន។ ទន្ទឹមគ្នានេះ វិបត្តិអូសបន្លាយនៅស៊ីរីក៏បានប្រសូត្រចេញនូវសត្រូវពិភពលោកដ៏កាចសាហាវថ្មីមួយទៀត គឺពួកជីហាតអង្គការរដ្ឋអ៊ីស្លាម។ បច្ចុប្បន្ន សត្រូវថ្មីរបស់ពិភពលោកមួយនេះកំពុងកាន់កាប់ដែនដីមួយភាគរបស់ស៊ីរី និងមួយភាគរបស់ប្រទេសអ៊ីរ៉ាក់។ គឺវត្តមានអង្គការរដ្ឋអ៊ីស្លាមនេះឯងដែលសហគមន៍អន្តរជាតិចាត់ទុកជារឿងអាទិភាពជាងវិបត្តិស៊ីរី និងដែលពួកគេគ្មានជម្រើសអ្វីក្រៅពីដោះស្រាយជាបន្ទាន់ទេ។
តែគេក៏មិនត្រូវភ្លេចនិយាយទេថា ទ័ពរដ្ឋាភិបាលរបស់លោកអាសាដដែលកំពុងប្រឈមទប់នឹងក្រុមប្រឆំាងក៏កំពុងប្រឈមមុខនឹងពួកជីហាតអង្គការរដ្ឋអ៊ីស្លាមក្នុងស្រុកដែរ។ ឃើញថាវិលទៅ វិលមក សហគមន៍អន្តរជាតិដែលកំពុងព្យាយាមកំចាត់លោកអាសាដចេញពីឆាកនយោបាយស៊ីរីបែរជាកំពុងមានសត្រូវរួមគ្នាជាមួយលោកអាសាដទៅវិញ។ ពិតណាស់ថា មនុស្សកាន់អំណាចផ្តាច់ការដូចលោកអាសាដមិនគួររាប់បញ្ចូលជាតួអង្គនៅក្នុងដំណោះស្រាយឲ្យវិបត្តិស៊ីរីនាពេលអនាគតទេ។ តែសំណួរដែលបានចោទឡើងពេលនេះគឺថា តើរវាងបុគ្គលអាសាដ និងអង្គការរដ្ឋអ៊ីស្លាម មួយណាគ្រោះថ្នាក់ខ្លំាងជាងមួយណា និងថា តើរវាងបុគ្គលអាសាដ និងអង្គការរដ្ឋអ៊ីស្លាម គេគួរទុកមួយណា និងកំចាត់មួយណា?។ ចម្លើយភ្លាមៗដោយមិនអាល់អែកនៅក្នុងកាលៈទេសៈសព្វថ្ងៃ គឺទុកបុគ្គលអាសាដ។
បំណងរបស់លោកប្រមុខការទូតអាមេរិកចន ឃ៊ែរីដែលចង់ឲ្យមានការចរចាផ្ទាល់ជាមួយលោកអាសាដមិនមែនជាការយល់ច្រឡំទេ ព្រោះថា បទពិសោធន៍នៃការចរចាគ្មានវត្តមានលោកអាសាដនាពេលកន្លងមកមិនបានហុចលទ្ធផលអ្វីទំាងអស់។ មួយវិញទៀត ក្រុមប្រឆំាងក៏កំពុងបែកបាក់ដោយគ្មានរចនាសម្ព័ន្ធច្បាស់លាស់ដែលគួរឲ្យទុកចិត្តបាន។ ចូរកុំភ្លេចថា ក្រោមភ្នែកច្រមុះរបស់ប្រជាជនស៊ីរីមួយចំនួន ក៏ដូចជាប្រទេសលោកខាងលិចខ្លះ លោកអាសាដនៅបន្តជាប្រធានាធិបតីស្របច្បាប់របស់ស៊ីរី។ ម្យ៉ាងទៀត និងចំពេលដែលអង្គការរដ្ឋអ៊ីស្លាមកំពុងគំរាមកំហែងពិភពលោក គេគួរតែសហការណ៍ជាមួយលោកអាសាដដើម្បីកំចាត់ពួកជីហាតជាជាងកំចាត់លោកអាសាដដោយទុកបណ្តោយឲ្យពួកជីហាតឡើងសោយរាជ្យដើរបង្កភេរវកម្មនៅទូទំាងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ