អាមេរិក និងអារ៉ាប៊ីសាអូឌីតកំពុងឈឺក្បាលនឹងស្ថានការណ៍នយោបាយស្រពិចស្រពិលនៅយេម៉ែន
ចុះផ្សាយនៅថ្ងៃ៖
ស្តាប់ - ០៤:៤៦
ប្រទេសយេម៉ែនកំពុងផុងខ្លួនចូលក្នុងវិបត្តិនយោបាយកាន់តែជ្រៅទៅៗ។ តំាងពីថ្ងៃទី២២ មករាមកម្ល៉េះដែលប្រទេសអារ៉ាប់មួយនេះគ្មានប្រធានាធិបតី គ្មាននាយករដ្ឋមន្រ្តី និងនៅពេលនេះ គ្មានទំាងសភាទៀត។ អ្នកដែលកំពុងសោយរាជ្យសព្វថ្ងៃនេះ គឺក្រុមប្រដាប់អាវុធហ៊ូទី្សរបស់មេកើយអាប់ដែល ម៉ាលិក អាល់ហ៊ូទី។ គឺជាព្រឹត្តិការណ៍មួយដែលកំពុងធ្វើឲ្យសហគមន៍អន្តរជាតិព្រួយបារម្ភជាពន់ពេក ពិសេសគឺអាមេរិក និងអារ៉ាប៊ីសាអូឌីតតែម្តង។ អ្នកដែលកំពុងខ្វាយខ្វល់ជាងគេ គឺអាមេរិក ព្រោះពិតមែនតែក្រុមហ៊ូទីស្សបានចេញមុខប្រឆំាងនឹងពួកអាល់កៃដាក្នុងស្រុកក៏ដោយ ក៏ពួកនេះបានចេញមុខប្រឆំាងនឹងសហរដ្ឋអាមេរិកពេញមុខដែរ។ តើនយោបាយការទូតអាមេរិកនៅយេម៉ែនមិនមែនកំពុងទទួលបរាជ័យផ្ទួនគ្នាក្នុងពេលតែមួយទេ ឬយ៉ាងណា?
វាពិតជារឿងមួយដែលសម្ព័ន្ធមិត្តអាមេរិក និងអារ៉ាប៊ីសាអូឌីតមិនអាចមើលរំលងបានទេចំពោះព្រឹតិ្តកាណ៍ដែលកំពុងកើតមាននៅក្នុងប្រទេសយេម៉ែនពេលនេះ។ មិនអាចមើលរំលងបាន ព្រោះការឡើងកាន់អំណាចរបស់ក្រុមប្រដាប់អាវុធហ៊ូទីស្សនៅយេម៉ែនជាសក្ខីកម្មមួយដែលបញ្ជាក់ច្បាស់ពីបរាជ័យរបស់នយោបាយការទូតអាមេរិកនៅក្នុងប្រទេសយេម៉ែន និងជោគជ័យរបស់ប្រទេសអ៊ីរ៉ង់ចំពោះក្រុមហ៊ូទី្ស។ ជាការពិត ស្ថានការណ៍នៅក្នុងទីក្រុងសាណាសព្វថ្ងៃកំពុងបន្តស្រពិចស្រពិល តែអ្វីដែលច្បាស់ក្រឡែតមិនអាចប្រកែកបាននៅពេលនេះ គឺការដែលក្រុមប្រដាប់អាវុធហ៊ូទី្សកំពុងក្តោបក្តាប់អំណាច ដោយបានបង្ខំឲ្យប្រធានាធិបតីហាឌី និងនាយករដ្ឋមន្រ្តីចុះចេញពីតំណែង ព្រមទំាងរំលាយសភាចោលទៀត។ គួរជម្រាបជូនថា ក្នុងរយៈពេល ២ឆ្នំាចុងក្រោយនេះ រដ្ឋាភិបាលទីក្រុងសាណាបានគំាទ្រជាចំហចំពោះប្រតិបត្តិការវាយប្រហាររបស់យន្តហោះ Drones អាមេរិកប្រឆំាងនឹងចលនា Aqpa ដែលជាសាខារបស់ពួកអាល់កៃដានៅយេម៉ែន។
តែចង់មិនចង់នៅពេលនេះ តួអង្គនយោបាយសំខាន់នៅយេម៉ែនមិនមែនលោកប្រធានាធិបតីធ្លាក់ពីអំណាចហាឌីទៀតឡើយ តែគឺពួកហ៊ូទី្សដែលជាក្រុមឈីអ៊ីតចេញមុខប្រឆំាងនឹងអាមេរិក និងដែលមានទំនោររកប្រទេសអ៊ីរ៉ង់។ មានអាយុ ៣៣ឆ្នំា លោកអាប់ដែល ម៉ាលិក អាល់ហ៊ូទីស្ស មេកើយរបស់ចលនាហ៊ូទី្សបានចេញមុខប្រកាសក្តែងកាលពីថ្ងៃទី២០ មករាកន្លងទៅ ដោយសន្យាបំបាត់អំពើពុករលួយ និងការបះបោរ។ គួររម្លឹកជូនថា កំណើនឥទ្ធិពលរបស់ចលនាហ៊ូទី្សនៅក្នុងឆាកនយោបាយយេម៉ែនក៏ដោយសារតែមានប្រទេសអ៊ីរ៉ង់ជួយគំាទ្រទំាងអាវុធ លុយកាក់ និងគំនិតយោបល់តំាងពីមុនឆ្នំា ២០១១ ទៅទៀត។ តែអ្វីដែលគួរឲ្យកត់សម្គាល់នោះគឺថា ក្រោមភ្នែក ច្រមុះរបស់ទីក្រុងតេហេរ៉ង់ ពួកហ៊ូទី្សនេះមិនមែនជាកូនអុក ឬមួយជាដៃគូរបស់ខ្លួនដូចពួកហេស្បូឡានៅក្នុងប្រទេសលីបង់ទេ ពោលគ្រាន់ជាកម្លំាងឯករាជ្យផ្ទៃក្នុងមួយនៅយេម៉ែនប៉ុណ្ណោះ។
ទោះជាយ៉ាងនេះក្តី ជោគជ័យរបស់ចលនាហ៊ូទី្សនៅយេម៉ែនពេលនេះក៏បានធ្វើឲ្យអ៊ីរ៉ង់ញញឹមបិទមាត់មិនជិតដែរ ព្រោះសម្រាប់ទីក្រុងតេហេរ៉ង់ វាជាការវាយមួយពំនូងយ៉ាងដំណំទៅលើសម្ព័ន្ធមិត្តអាមេរិក អារ៉ាប៊ីសាអូឌីត។ ជាការពិត អាមេរិក និងអារ៉ាប៊ីសាអូឌីតបានចំណាយលុយយ៉ាងច្រើនសម្បើមដើម្បីកំចាត់ចលនា Aqpa នៅយេម៉ែនឲ្យដល់ឫសគល់។ គ្រាន់តែអារ៉ាប៊ីសាអូឌីតតែម្នាក់ឯងបានចំណាយលុយស់ជាង ៤ ០០០លានដុល្លារដើម្បីជួយគំាទ្រលោកប្រធានាធិបតីយេម៉ែនធ្លាក់ពីអំណាចហាឌីនៅក្នុងយុទ្ធនាការប្រយុទ្ធប្រឆំាងនឹងចលនា Aqpa ដែលជាសត្រូវគ្រោះថ្នាក់ខ្លំាងស្ថិតក្បែរខ្លួន។ តែគេត្រូវហ៊ាននិយាយថា បន្ទាប់ពីបានឡើងឥទ្ធិពលខ្លំាងតំាងពីឆ្នំា ២០០៩ និងព្រឹត្តការណ៍វាយប្រហារថ្មីៗលើទីស្នាក់ការទស្សនាវដ្តីត្លុកកំប្លែងបារំាង Charlie Hebdo ក្នុងទីក្រុងប៉ារីសមក Aqpa បានក្លាយជាសាខាអាល់កែដាដ៏គ្រោះថ្នាក់បំផុតក្នុងលោក។
យេម៉ែនជាប្រទេសអារ៉ាប់ក្រីក្រ និងស្គាល់អស្ថិរភាពនយោបាយពុះកញ្ជ្រោលខ្លំាងនៅក្នុងតំបន់ តែយេម៉ែនជាប្រទេសច្រកថាមពលពិភពលោក និងភូមិសាស្រ្តនយោបាយមិនអាចខ្វះបានទេ។ ក្រៅពីបានផ្តល់លុយកាក់ឲ្យលោកប្រធានាធិបតីធា្លក់ពីអំណាចហាឌីសម្រាប់ប្រយុទ្ធទប់ទល់នឹងពួកអាល់កៃដាក្នុងតំបន់ រដ្ឋាភិបាលប្រទេសអារ៉ាប៊ីសាអូឌីតក៏ធ្លាប់បានប្រើនយោបាយមួយដើម្បីជម្រុញឲ្យពួកកុលសម្ព័ន្ធស៊ុយនីតដូចខ្លួនចេញមុខត តំាងនឹងពួកឈីអ៊ីតហ៊ូទីស្ស។ កាលពីឆ្នំា ១៩៩៤ អារ៉ាប៊ីសាអូឌីតធ្លាប់បានផ្តល់អាវុធទៅឲ្យក្រុមឧទ្ទាមនៅប៉ែកខាងត្បូង។ តែចាប់ពីអំណេះតទៅ ទីក្រុងរីយ៉ាដហាក់ដូចជាគ្មានជម្រើសអ្វីក្រៅពីបត់បែនទៅតាមស្ថានការណ៍ប្រែប្រួលនៅក្នុងប្រទេសយេម៉ែនសព្វថ្ងៃនេះទេ។
សម្រាប់រដ្ឋបាលអាមេរិករបស់លោកអូបាម៉ា លោកប្រធានាធិបតីយេម៉ែនធ្លាក់ពីអំណាចហាឌី គឺជាសិស្សគំរូក្នុងតំបន់។ តែបរាជ័យរបស់សិស្សគំរូរូបនោះបានធ្វើឲ្យគេនឹកឃើញឡើងវិញនូវព្រឹត្តិការណ៍ជូរចត់មួយចំនួនដែលអាមេរិកបានប្រឈមនៅក្នុងពិភពអ៊ីស្លាម។ កាលពីថ្ងៃទី២០ មករាកន្លងទៅ លោកអូបាម៉ាបានគូសបញ្ជាក់ថា អាមេរិកត្រូវការយុទ្ធសាស្រ្តដ៏ប្រសើរមួយដើម្បីប្រយុទ្ធប្រឆំាងនឹងភេរវនិយមដោយព្យាយាមធ្វើយ៉ាងណា មិនឲ្យអាមេរិកផុងខ្លួនសារជាថ្មីទៅក្នុងស្ថានការណ៍ដូចនៅអ៊ីរ៉ាក់ទេ។ លោកអូបាម៉ាពិតជាយល់មិនខុសទេថា ការបញ្ជូនទាហានអាមេរិកឲ្យចូលទៅអន្តរាគមន៍នៅក្នុងប្រទេសមួយដែលកំពុងគ្របដណ្តប់ដោយសង្រ្គាមស៊ីវិល គឺជាកំហុសឆ្គងមួយធ្ងន់ណាស់។ តែអ្វីដែលលោកអូបាម៉ានឹកស្មានមិនដល់នោះគឺថា ទោះបីជាមានការជួយគំាទ្រពីអាមេរិកប៉ុនហ្នឹងហើយ យេម៉ែននៅតែចៀសមិនរួចពីការធ្លាក់ក្នុងកណ្តាប់ដៃចលនាប្រដាប់អាវុធហ៊ូទី្សដដែល។
តើព្រឹត្តិការណ៍នៅយេម៉ែនពេលនេះ មិនមែនជាមេរៀនមួយដែលអាមេរិកត្រូវគិតគូរឡើងវិញពីនយោបាយការទូតរបស់ខ្លួនទេ ឬយ៉ាងណា?៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ