យុទ្ធនាការយោធាយេម៉ែនកំចាត់បានមេដឹកនាំអាល់កៃដាដើមកំណើតឆេឆេនីម្នាក់
យោងតាមក្រសួងការពារជាតិប្រទេសយេម៉ែន នៅថ្ងៃសៅរ៍នេះ មេដឹកនាំអាល់កៃដាដើមកំណើតឆេឆេនីម្នាក់ ត្រូវបានសម្លាប់ក្នុងយុទ្ធនាការរបស់យោធាយេម៉ែនប្រឆាំងក្រុមភេរវជននៅខេត្តអាប៊ីយ៉ាន ភាគខាងត្បូងប្រទេស។ មុននេះ ក្រសួងការពារជាតិយេម៉ែនក៏បានប្រកាសពីការស្លាប់របស់មេដឹកនាំភេរវជនបរទេសមួយរូបផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
យុទ្ធនាការយោធាកំចាត់ក្រុមភេរវជន នៅប្រទេសយេម៉ែន សប្តាហ៍នេះ បាននាំទៅដល់ការកំចាត់មេដឹកនាំក្រុមអាល់កៃដា ដើមកំណើតឆេឆេនីម្នាក់ នៅថ្ងៃសៅរ៍នេះ ក្នុងតំបន់ម៉ាអាចាឡា ក្នុងខេត្តអាប៊ីយ៉ាន ភាគខាងត្បូងប្រទេស។ មេដឹកនាំអាល់កៃដារូបនេះ ឈ្មោះថា អាប៊ូ អ៊ីស្លាម ជាមេក្រុមភេរវជនបរទេសទី២ នៅឧបទ្វីបអារ៉ាប់ ដែលយោធាបានកំចាត់។ ក្រសួងការពារជាតិយេម៉ែនបានប្រកាសពីការស្លាប់របស់មេដឹកនាំភេរវជនបរទេសម្នាក់ទៀត មានដើមកំណើតមកពីអ៊ូបេគីស្ថាន កាលពីថ្ងៃអង្គារ កន្លងទៅ ពេលដែលអាជ្ញាធរបានចាប់ផ្តើមយុទ្ធនាការប្រឆាំងក្រុមភេរវជន នៅខេត្តអាប៊ីយ៉ាន និងខេត្តឆាប់វ៉ា នៅជាប់នោះ។
យោងតាមសាក្សីជាច្រើន នៅថ្ងៃសៅរ៍នេះ អមដោយយន្តហោះជាច្រើនគ្រឿង កងទ័ពបានពង្រីកយុទ្ធនាការខ្លួន នៅខេត្តអាប៊ីយ៉ាន ធ្វើអោយប្រជាជនរាប់រយនាក់ រត់គេចខ្លួន។ នៅក្រុងមូកាឡា ភាគខាងត្បូង ជនអត្តឃាតអាល់កៃដាម្នាក់ បានបំផ្ទុះរថយន្តមួយគ្រឿង នៅពីមុខច្រកចូលនៃអង់តែនផ្នែកចារកិច្ចយេម៉ែន ធ្វើអោយយោធា២នាក់រងរបួស។ អំពើហិង្សាប្រដាប់អាវុធនៅតែបន្តមាននៅក្រុងអាដេន។ កាលពីថ្ងៃសុក្រ ជនប្រដាប់អាវុធជាច្រើននាក់បានបាញ់សម្លាប់មន្ត្រីយោធាម្នាក់ នៅក្រុងនេះ។ ដោយឡែក យុទ្ធនាការយោធាមិនបានគ្រោងធ្វើនៅក្រុងអាដេន និងក្រុងមូកាឡាទេ។
កាលពីថ្ងៃសុក្រ មេដឹកនាំអាល់កៃដានៅឧបទ្វីបអារ៉ាប់ កាសេម អាល់រីមី បានគម្រាមសងសឹកអាជ្ញាធរយេម៉ែន ក្រោយពេលយន្តហោះដ្រូនអាមេរិកបានធ្វើយុទ្ធនាការប្រឆាំងក្រុមខ្លួន ដោយបានសម្លាប់សមាជិកអាល់កៃដាច្រើនរូប កាលពីថ្ងៃ២០មេសា។ អាមេរិកបានចាត់ទុកក្រុមអាល់កៃដានៅអារ៉ាប់ថាជាក្រុមបង្កគ្រោះថ្នាក់ខ្ពស់បំផុត។ ក្រុមអាល់កៃដានៅឧបទ្វីបអារ៉ាប់នេះ បានឆ្លៀតប្រយោជន៍ពង្រឹងវត្តមានខ្លួននៅភាគខាងត្បូងនិងភាគខាងកើតយេម៉ែន នៅពេលដែលប្រជាជនបះបោរប្រឆាំងអតីតប្រធានាធិបតី អាលី អាប់ដាឡា សាឡេក កាលពីឆ្នាំ២០១១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ