នាយករដ្ឋមន្រ្តីជប៉ុនទៅទស្សនកិច្ចក្នុងប្រទេសអ៊ីស្រាអែល និងដែនដីប៉ាឡេស្ទីន
លោកនាយករដ្ឋមន្រ្តីជប៉ុនស្ហ៊ីនហ្សូ អាបេកំពុងបន្តទស្សនកិច្ចមួយជុំតំបន់មជ្ឈិមបូព៌ា។ បន្ទាប់ពីប្រទេសអេហ្ស៊ីប និងហ្ស៊កដានី លោកអាបេបានទៅប្រទេសអ៊ីស្រាអែលកាលពីថ្ងៃអាទិត្យ ទី១៨ មករាដើម្បីបំពេញទស្សនកិច្ចរយៈពេល ៣ថ្ងៃនៅអ៊ីស្រាអែល និងដែនដីប៉ាឡេស្ទីន។ សំណុំរឿងសំខាន់ដែលលោកអាបេលើកទៅជជែកជាមួយថ្នាក់ដឹកនំាអ៊ីស្រាអែល និងប៉ាឡេស្ទីន គឺជួយផ្តល់សន្ទុះឡើងវិញនូវកិច្ចចរចាសន្តិភាពរបស់អ៊ីស្រាអែល និងប៉ាឡេស្ទីនក្នុងគោលដៅស្វែងរកដំណោះស្រាយមួយដើម្បីបង្កើតរដ្ឋពីររស់ក្បែរខាងគ្នា។ ទន្ទឹមគ្នានេះ រឿងសេដ្ឋកិច្ច ក៏ជាប្រធានបទមិនអាចខ្វះបានទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
កម្មវត្ថុសំខាន់នៃទស្សនកិច្ចនៅក្នុងតំបន់របស់លោកប្រមុខរដ្ឋាភិបាលជប៉ុនស្ហ៊ីនហ្សូ អាបេ គឺដើម្បីជួយពង្រឹងស្ថិរភាព ក៏ដូចជាបង្កើនទំនាក់ទំនងសេដ្ឋកិច្ចនៅក្នុងតំបន់មជ្ឈិមបូព៌ា។ នៅក្នុងជំនួបជាមួយលោកនាយករដ្ឋមន្រ្តីជប៉ុនអាបេក្នុងទីក្រុងហ៊្សេរុយសាឡិម លោកនាយករដ្ឋមន្រ្តីអ៊ីស្រាអែលបិនយ៉ាមីន នេតាន់យ៉ាហ៊ូបានថ្លែងថា មានវិស័យសេដ្ឋកិច្ច បច្ចេកវិទ្យា និងវិស័យផ្សេងទៀតជាច្រើនដែលជប៉ុន និងអ៊ីស្រាអែលអាចសហការណ៍ជាមួយគ្នាបាន។ នៅក្នុងវេទិកាសេដ្ឋកិច្ចដែលបានរៀបចំនៅមុនជំនួបជាមួយលោកអាបេ លោកនេតាន់យ៉ាហ៊ូបានបញ្ជាក់ជាថ្មីថា អ៊ីស្រាអែលត្រូវតែស្វែងរកទីផ្សារបន្ថែមទៀត ដោយរាប់បញ្ចូលជប៉ុន និងប្រទេសអាស៊ីផ្សេងទៀតដែលកំពុងមានសេដ្ឋកិច្ចលូតលាស់។
គួរជម្រាបជូនថា ការដោះដូរសេដ្ឋកិច្ចរវាងជប៉ុន និងអ៊ីស្រាអែលនៅមានកម្រិតតិចតួចខ្លំាងណាស់។ ជាក់ស្តែងក្នុងឆ្នំា ២០១៣ ផលិតផលជប៉ុនដែលអ៊ីស្រាអែលបាននំាចូលមានប្រមាណតែ ០,១% ប៉ុណ្ណោះ។ តែខុទ្ទកាល័យរបស់នាយករដ្ឋមន្រ្តីអ៊ីស្រាអែលបានបញ្ជាក់ថា ចាប់ពីពេលនេះតទៅ អ៊ីស្រាអែលនឹងផ្តើមកាត់បន្ថយការរកស៊ីជាមួយបណ្តាប្រទេសអឺរ៉ុបខាងលិចដែលកំពុងស្គាល់ភាពបះបោររបស់ប្រជាជនអ៊ីស្លាម និងចលនាប្រឆំាងនឹងជនជាតិ Juif។ នេះជាលើកទី១ ក្នុងរយៈពេល ៩ឆ្នំាកន្លងទៅដែលមានប្រមុខរដ្ឋាភិបាលជប៉ុនម្នាក់បានទៅទស្សនកិច្ចនៅអ៊ីស្រាអែល។ ទស្សនកិច្ចរបស់ប្រមុខរដ្ឋាភិបាលជប៉ុនពេលនេះបានធ្វើឡើង ក្រោយពីលោកនេតាន់យ៉ាហ៊ូបានទៅទស្សនកិច្ចនៅជប៉ុនកាលពីខែឧសភា ឆ្នំា ២០១៤។
បន្ទាប់ពីអ៊ីស្រាអែល លោកអាបេនឹងបន្តដំណើរទៅកាន់តំបន់ Cisjordanie ក្នុងទឹកដីប៉ាឡេស្ទីនដើម្បីជួបជាមួយលោកប្រមុខរដ្ឋអំណាចប៉ាឡេស្ទីនម៉ាមូត អាបាស់។ ប្រធានបទសំខាន់ដែលលោកអាបេលើកទៅនិយាយជាមួយថ្នាក់ដឹកនំាអ៊ីស្រាអែល និងប៉ាឡេស្ទីន គឺសុំឲ្យភាគីជម្លោះទំាងពីរផ្តើមកិច្ចចរចាសន្តិភាពជាថ្មីដែលបានទទួលបរាជ័យកាលពី ៩ខែមុន។ ទន្ទឹមគ្នានេះ លោកអាបេសំណូមពរអ៊ីស្រាអែលឲ្យចៀសវាងសកម្មភាពទំាងឡាយណាដែលឈានដល់ការបង្កសង្រ្គាមជាមួយប្រជាជនប៉ាឡេស្ទីន។ អ្វីជាការកត់សម្គាល់ វត្តមានលោកអាបេនៅអ៊ីស្រាអែល និងប៉ាឡេស្ទីនពេលនេះបានធ្វើឡើង ២ថ្ងៃបន្ទាប់ពីតុលាការព្រហ្មទ័ណ្ឌអន្តរជាតិបានសម្រេចបើកការសិក្សាបឋមស្តីពីបទឧក្រិដ្ឋកម្មសង្រ្គាមជាយថាហេតុប្រព្រឹត្តិដោយអ៊ីស្រាអែលលើដែនដីប៉ាឡេស្ទីនតំាងពីខែមិថុនា ឆ្នំា ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ