តុលាការព្រហ្មទ័ណ្ឌអន្តរជាតិបានផ្តើមសិក្សាបឋមស្តីពីបទឧក្រិដ្ឋកម្មសង្រ្គាមជាយថាហេតុនៅដែនដីប៉ាឡេស្ទីន
នៅថ្ងៃសុក្រ ទី១៦ មករា រដ្ឋអាជ្ញានៃតុលាការព្រហ្មទ័ណ្ឌអន្តរជាតិក្នុងទីក្រុងឡាអេបានប្រកាសឲ្យដឹងពីការផ្តើមធ្វើការសិក្សាបឋមស្តីពីស្ថានការណ៍នៅក្នុងដែនដីប៉ាឡេស្ទីន។ កម្មវត្ថុនៃការសិក្សាបឋមនេះ គឺដើម្បីចង់ដឹងថា តើមាន ឬមិនមានបទឧក្រិដ្ឋកម្មសង្រ្គាមជាយថាហេតុនៅក្នុងដែនដីប៉ាឡេស្ទីន។ ប្រជាជនប៉ាឡេស្ទីនបានសម្តែងការសប្បាយចិត្ត តែអ៊ីស្រាអែលបានបរិហារ និងបានចាត់ទុកគំនិតផ្តួចផ្តើមរបស់តុលាការព្រហ្មទ័ណ្ឌអន្តរជាតិនេះថា ជាការបង្ករឿងអាស្រូវដែលខ្លួនមិនអាចទទួលយកបានទេ។ ចំណែកអាមេរិកដែលជាសម្ព័ន្ធមិត្តរបស់អ៊ីស្រាអែលក៏បានបញ្ចេញប្រតិកម្មបរិហារដែរ។
ចុះផ្សាយនៅថ្ងៃ៖
ស្តាប់ - ០១:៥៥
ពិតមែនតែជាការផ្តើមសិក្សាបឋមមែន តែវាជារឿងមួយសំខាន់ខ្លំាងណាស់សម្រាប់ប្រជាជនប៉ាឡេស្ទីនទូទៅ សំខាន់នៅត្រង់ថា ពិភពលោកហាក់ដូចជាបានយកចិត្តទុកដាក់ខ្លំាងជាងមុនចំពោះបុព្វហេតុរបស់ខ្លួន ឬមួយក៏ថា ការស្វែងរកការពិតបានចាប់ផ្តើមហើយ។ អ្វីដែលតុលាការព្រហ្មទ័ណ្ឌអន្តរជាតិនឹងត្រូវធ្វើការសិក្សាចង់ដឹងជាដំបូងនោះគឺថា តើនឹងអាចមានទិន្នន័យសមហេតុ សមផលណាមួយដែលអាចនឹងផ្តើមបើកការស៊ើបអង្កេតស្តីពីបទឧក្រិដ្ឋកម្មសង្រ្គាមនៅក្នុងដែនដីប៉ាឡេស្ទីនតំាងពីខែមិថុនា ឆ្នំា ២០១៤។ គឺជាខែ ឆ្នំា ដែលរដ្ឋអំណាចប៉ាឡេស្ទីនខ្លួនឯងបានចាត់ទុកការដែលកងទ័ពអ៊ីស្រាអែលបានផ្តើមបើកយុទ្ធនាការចាប់ខ្លួន និងវាយបង្រ្កាបលើប្រជាជនប៉ាឡេស្ទីននៅតំបន់ Cisjordanie។ ជាយុទ្ធនាការដែលទ័ពអ៊ីស្រាអែលបានធ្វើឡើង មួយថ្ងៃក្រោយពីការបាត់ខ្លួនយុវជនអ៊ីស្រាអែលចំនួន ៣នាក់
គឺផ្តើមចេញពីយុទ្ធនាការរបស់ទ័ពអ៊ីស្រាអែលនោះឯងដែលជាចំណុចចាប់ផ្តើមនៃសង្រ្គាមប្រឆំាងប៉ាឡេស្ទីននៅតំបន់ហ្គាហ្សានារដូវក្តៅកន្លងទៅ និងដែលបានបណ្តាលឲ្យមានមនុស្សស្លាប់ជាង ២ ២០០នាក់ ភាគច្រើនជាប្រជាជនប៉ាឡេស្ទីនស្លូតត្រង់។ គួររម្លឹកជូនថា គឺទើបតែនៅថ្ងៃទី២ ខែមករាដើមឆ្នំានេះទេដែលប៉ាឡេស្ទីនបានចូលជាសមាជិករបស់តុលាការព្រហ្មទ័ណ្ឌអន្តរជាតិ។ កម្មវត្ថុរបស់ប៉ាឡេស្ទីន គឺដាក់ពាក្យបណ្តឹងទៅស្ថាប័នតុលាការអន្តរជាតិមួយនេះឲ្យបើកការស៊ើបអង្កេតពីបទឧក្រិដ្ឋកម្មសង្រ្គាមនៅក្នុងដែនដីប៉ាឡេស្ទីន និងអូស ក ជនដៃដល់ទៅកាត់ទោស។ ប្រតិកម្មភ្លាមៗ អ៊ីស្រាអែល និងអាមេរិកបានបរិហារលើការសម្រេចចិត្តរបស់រដ្ឋអាជ្ញានៃតុលាការព្រហ្មទ័ណ្ឌអន្តរជាតិ។
លោកនាយករដ្ឋមន្រ្តីអ៊ីស្រាអែលបិនយ៉ាមីន នេតាន់យ៉ាហ៊ូបានបញ្ជាក់ថា លោកនឹងច្រានចោលរាល់សេចក្តីសម្រេចចិត្តរបស់តុលាការព្រហ្មទ័ណ្ឌអន្តរជាតិ និងថា ដោយប៉ាឡេស្ទីនមិនមែនជារដ្ឋមួយនោះ ដូច្នេះតុលាការមួយនេះគ្មានយុត្តាធិការណាមួយក្នុងការចាត់វិធានការលើបណ្តឹងរបស់ប៉ាឡេស្ទីនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ