អ៊ីស្រាអែលបញ្ចុះបញ្ចូលសម្ព័ន្ធមិត្តឲ្យឈប់ផ្តល់មូលនិធិដល់តុលាការព្រហ្មទណ្ឌអន្តរជាតិ
អ៊ីស្រាអ៊ែលបានផ្តើមយុទ្ធនាការការទូត បញ្ចុះ បញ្ជូលសម្ព័ន្ធមិត្តរបស់ខ្លួន ដែលជាសមាជិករបស់តុលាការព្រហ្មទណ្ឌអន្តរជាតិ ឲ្យឈប់ផ្តល់ហិរញ្ញប្បទានដល់តុលាការព្រហ្មទណ្ឌអន្តរជាតិ បន្ទាប់ពីស្ថាប័នមួយនេះបានប្រកាសបើកការសិក្សាបឋមស្តីពីបទឧក្រិដ្ឋកម្មប្រឆាំងមនុស្សជាតិនៅលើទឹកដីប៉ាឡេស្ទីន ។ នេះបើតាមការប្រកាសរបស់រដ្ឋមន្រ្តីការបរទេសអ៊ីស្រាអែល នៅមុនជំនួបជាមួយសមភាគីកាណាដា នៅថ្ងៃអាទិត្យ ទី ១៨ មករា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
អ៊ីស្រាអែលកំពុងរិះរកគ្រប់មធ្យោបាយដើម្បីរារាំងតុលាការព្រហ្មទណ្ឌអន្តរជាតិ CPI កុំឲ្យផ្តើមនិតិវិធីណាមួយ ដែលអាចនឹងប៉ះពាល់ដល់ប្រយោជន៍របស់ខ្លួន។ កាលពីថ្ងៃអាទិត្យ ពីរថ្ងៃក្រោយការិយាល័យរដ្ឋអាជ្ញារបស់ CPI ផ្តើមសិក្សាបឋមស្តីពីបទឧក្រិដ្ឋដែលអាចកើតមាននៅលើទឹកដីប៉ាឡេស្ទីន នៅក្នុងប្រតិបត្តិការវាយប្រហាររបស់អ៊ីស្រាអែល លើតំបន់ហ្កាហ្សា កាលពីរដូវក្តៅ ឆ្នាំមុន រដ្ឋមន្រ្តីការបរទេសអ៊ីស្រាអែល លោកAvigdor Lieberman បានប្រកាសថា អ៊ីស្រាអែលនឹងបញ្ចុះបញ្ចូលសម្ព័ន្ធមិត្តរបស់ខ្លួន ដូចជាកាណាដា អូស្ត្រាលី អាល្លឺម៉ង់ឲ្យឈប់ផ្តល់លុយដល់តុលាការព្រហ្មទណ្ឌអន្តរជាតិតទៅទៀត។ សម្រាប់ប្រមុខ ការបរទេសអ៊ីស្រាអែល តុលាការ CPIមិនតំណាងប្រជាជនទេ ប៉ុន្តែ វាជាឧបករណ៍នយោបាយ។
ថ្លែងយ៉ាងខ្លី ទៅកាន់អ្នកកាសែត រដ្ឋមន្រ្តីការបរទេសកាណាដា លោកJohn Biard ដែលកំពុងផ្តើមទស្សនកិច្ចនៅប្រទេសអ៊ីស្រាអែលបាននិយាយថា កាណាដាមានការខកចិត្តនឹងការសម្រេចរបស់តុលាការព្រហ្មទណ្ឌអន្តរជាតិ។ នៅមុនជំនួបជាមួយរដ្ឋមន្រ្តីការបរទេសអ៊ីស្រាអែល លោកJohn Biard បានបញ្ជាក់បន្ថែមថា នៅក្នុងជំនួបដែលនឹងនិយាយពីពាណិជ្ជកម្ម រហូតដល់សន្តិសុខ ការសម្រេចថ្មីៗ របស់ CPIក៏នឹងត្រូវសមភាគីលើកនិយាយផងដែរ។
នៅមុនដំណើរទៅដល់អ៊ីស្រាអែល លោកប្រមុខការបរទេស កាណាដា បានឆៀងទៅចូលជួប សមភាគីប៉ាឡេស្ទីន នៅទីក្រុងរ៉ាម៉ាឡា ដោយបានអំពាវនាវឲ្យអាជ្ញាធរប៉ាឡេស្ទីនពិចារណារឡើងវិញពីផលវិបាក នៅក្រោយពេលប៉ាឡេស្ទីនបានដាក់ពាក្យសុំចូលជាសមាជិករបស់តុលាការព្រហ្មទណ្ឌអន្តរជាតិ។ ប៉ាឡេស្ទីននឹងក្លាយជាសមាជិកពេញសិទ្ធិនៅខែមេសាខាងមុខ។ គឺនៅក្រោយជំនួបជាមួយមន្រ្តីជាន់ខ្ពស់របស់ប៉ាឡេស្ទីន ដែលប្រមុខការបរទេសកាណាដារងការគប់ពងមាន់ ពីក្រុមប្រជាជនប៉ាឡេស្ទីន ដែលបានស្រែកថា ប៉ាឡេស្ទីនមិនស្វាគមកាណាដា។
សូមបញ្ជាក់ថា នៅក្រោយការវាយប្រហាររបស់អ៊ីស្រាអែលទៅលើតំបន់ហ្កាហ្សា រដ្ឋមន្រ្តីការបរទេសកាណាដាផ្ទាល់បានចេញមុខគាំទ្រអ៊ីស្រាអែល និងថា ប្រតិបត្តិការរបស់អ៊ីស្រាអែលធ្វើឡើងដើម្បីគ្រាន់ការពារខ្លួនប៉ុណ្ណោះ។ កាណាដា ជាប្រទេសដើរតួនាទីសំខាន់ក្នុងការចូលរួមបង្កើត និងផ្តល់ហិរញ្ញវត្ថុសំខាន់ដល់តុលាការព្រហ្មទណ្ឌអន្តរជាតិ។ ក្រៅតែពីកាណាដា អ៊ីស្រាអែលគ្រោងផងដែរ នឹងបញ្ចុះបញ្ចូលជប៉ុន ដែលជាសមាជិក ផ្តល់ហិរញ្ញវត្ថុដ៏សំខាន់របស់CPI។ នាយករដ្ឋមន្រ្តីជប៉ុន លោកស្ហ៊ីនហ្សូ អាបេ ក៏នឹងត្រូវផ្តើមទស្សនកិច្ចរយៈពេល បីថ្ងៃ នៅអ៊ីស្រាអែល ចាប់ពីថ្ងៃចន្ទ នេះតទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ