ដំណើរទស្សនកិច្ចជាប្រវត្តិសាស្រ្តរបស់នាយករដ្ឋមន្រ្តីអ៊ីស្រាអែលនៅទ្វីបអាហ្រ្វិក
ចុះផ្សាយនៅថ្ងៃ៖
ស្តាប់ - ០៦:៣៥
នៅថ្ងៃចន្ទ ទី៤ កក្កដានេះ លោកនាយករដ្ឋមន្រ្តីអ៊ីស្រាអែលបិនយ៉ាមីន នេតាន់យ៉ាហ៊ូបានផ្តើមដំណើរទស្សនកិច្ចរយៈពេល ៤ថ្ងៃនៅក្នុងទ្វីបអាហ្រ្វិក។ មានប្រទេសអាហ្រ្វិកចំនួន ៤ ដែលលោកនេតាន់យ៉ាហ៊ូត្រូវបំពេញទស្សនកិច្ច គឺអ៊ូហ្កង់ដា កេនញ៉ា អេត្យូពី និងប្រទេសរវ៉ាន់ដា។ គោលដៅនៃទស្សនកិច្ច គឺដើម្បីពង្រឹងទំនាក់ទំនងរវាងអ៊ីស្រាអែល និងអាហ្រ្វិក ព្រមទាំងទៅចូលរួមបុណ្យខួបគម្រប់ ៤០ឆ្នាំនៃមរណៈភាពរបស់បងប្រុសលោកដែលបានស្លាប់នៅក្នុងប្រតិបត្តិការកងកម្ម៉ង់ដូអ៊ីស្រាអែលនៅអាកាសយានដ្ឋាន Entebbe ក្នុងទឹកដីអ៊ូហ្កង់ដាកាលពីថ្ងៃទី៤ កក្កដា ឆ្នាំ ១៩៧៦។
ថ្លែងនៅពេលចាកចេញពីប្រទេសនាព្រឹកថ្ងៃចន្ទ ទី៤ កក្កដានេះ លោកនាយករដ្ឋមន្រ្តីអ៊ីស្រាអែលនេតាន់យ៉ាហ៊ូបានបញ្ជាក់ថា ទស្សនកិច្ចរបស់លោកនៅអាហ្រ្វិកជាទស្សនកិច្ចប្រវត្តិសាស្រ្ត។ ចំណុចជាប្រវត្តិសាស្រ្តដែលគួរឲ្យកត់សម្គាល់ខ្លាំងជាងគេនៅត្រង់ថា ទស្សនកិច្ចរបស់ប្រមុខរដ្ឋ ឬប្រមុខរដ្ឋាភិបាលអ៊ីស្រាអែលនៅក្នុងទ្វីបអាហ្រ្វិក ជាទស្សនកិច្ចដែលគេកម្រឃើញមាន។ ការហ៊ាននិយាយយ៉ាងដូចនេះមិនមែនមានន័យថា អ៊ីស្រាអែលគ្មានប្រយោជន៍អ្វីដែលអាហ្រ្វិកត្រូវរាប់រក ឬមួយក៏ថា អាហ្រ្វិកគ្មានប្រយោជន៍អ្វីដែលអ៊ីស្រាអែលត្រូវយកចិត្តទុកឲ្យបានខ្លាំងនោះទេ។ តែមកពីអាហ្រ្វិកមិនពេញចិត្តនឹងទង្វើមួយចំនួនរបស់អ៊ីស្រាអែលនៅក្នុងតំបន់ដើមបូព៌ា។
នៅក្នុងទសវត្សឆ្នាំ ៦០ មានប្រទេសអាហ្រ្វិកភាគច្រើនបានដកខ្លួនឆ្ងាយពីអ៊ីស្រាអែលដោយសារតែអ៊ីស្រាអែលបានធ្វើសង្រ្គាមប្រឆាំងអ្នកជិតខាងខ្លួនក្នុងចន្លោះឆ្នាំ ១៩៦៧ និង ១៩៧៣ ពិសេសប្រឆាំងប្រជាជនប៉ាឡេស្ទីន រួមទាំងទង្វើរបស់ទីក្រុងតេឡាវីដែលបានចេញមុខគាំទ្ររបបប្រកាន់ព័ណ៌សម្បុរនៅក្នុងប្រទេសអាហ្រ្វិកខាងត្បូង។ ម្យ៉ាងទៀត ប្រទេសអាហ្រ្វិកភាគច្រើនក៏មិនពេញចិត្តនឹងជំហរអតីតកាលរបស់អ៊ីស្រាអែលនៅក្នុងប្រទេសអាហ្រ្វិកនីមួយៗ។
រូបលោកនាយករដ្ឋមន្រ្តីអ៊ីស្រាអែលបិនយ៉ាមីន នេតាន់យ៉ាហ៊ូខ្លួនឯងបានទទួលស្គាល់ពេញមាត់ថា ការដែលអ៊ីស្រាអែលត្រូវបានទ្វីបអាហ្រ្វិកដាក់ក្នុងបញ្ជីខ្មៅ ក៏ដោយសារតែទង្វើខុសឆ្គងមួយចំនួនរបស់អ៊ីស្រាអែលនៅក្នុងទសវត្សឆ្នាំ ៦០ និង ៧០។ ក៏ប៉ុន្តែ ពេលវេលាកាន់តែរំកិលទៅមុខ រួមទាំងការប្រែប្រួលស្ថានការណ៍នៅក្នុងតំបន់ និងពិភពលោក អ៊ីស្រាអែលហាក់ដូចជាយល់ថា គឺនៅក្នុងទ្វីបអាហ្រ្វិកដែលខ្លួនអាចរកបានសម្ព័នមិត្តថ្មី។
ហេតុផលនៃការរំកិលរកគ្នាជាថ្មីរវាងអ៊ីស្រាអែល និងអាហ្រ្វិក
មានហេតុផលជាច្រើនដែលបានជំរុញអ៊ីស្រាអែល និងអាហ្រ្វិកឲ្យខិតរកគ្នាជាថ្មីពេលនេះ ហើយភាគីទាំងពីរនឹងទទួលបានប្រយោជន៍ដូចគ្នា គ្រាន់តែថា ប្រយោជន៍ និងតម្រូវការមិនដូចគ្នាសុទ្ធសាធប៉ុណ្ណោះ។ វិស័យសេដ្ឋកិច្ច និងពាណិជ្ជកម្ម គឺជាវិស័យមួយដែលអ៊ីស្រាអែល និងអាហ្រ្វិកត្រូវពង្រឹងបន្ថែមដោយខានមិនបាន។ ជាមួយនឹងកំណើនសេដ្ឋកិច្ចខ្ពស់ និងសក្តានុពលសេដ្ឋកិច្ចដែលអាហ្រ្វិកកំពុងមានសព្វថ្ងៃ អ៊ីស្រាអែលពិតជាមិនអាចមើលរំលងបានទេ ព្រោះការដោះដូរពាណិជ្ជកម្មរវាងអ៊ីស្រាអែល និងអាហ្រ្វិកបច្ចុប្បន្ននៅមានកម្រិតតិចតួចខ្លាំងណាស់ ពោលមានប្រមាណតែ ២% ប៉ុណ្ណោះ។
ក្រៅពីសម្លឹងឃើញសក្តានុពលសេដ្ឋកិច្ច និងពាណិជ្ជកម្មរបស់អាហ្រ្វិក អ៊ីសា្រអែលក៏ត្រូវការអាហ្រ្វិកឲ្យជួយគាំទ្រខ្លួននៅលើឆាកអន្តរជាតិដែរ ពិសេសនៅតាមបណ្តាស្ថាប័នអន្តរជាតិមួយចំនួន។ តម្រូវការនេះបានធ្វើឡើង ចំពេលដែលអ៊ីស្រាអែលកំពុងបន្តទទួលរងការរិះគន់ ទិតៀនទាក់ទងនឹងទង្វើពង្រីកអាណានិគមលើដែនដីប៉ាឡេស្ទីន និងសកម្មភាពនុយក្លេអែរ។ ដើម្បីបំពេញចិត្តអាហ្រ្វិក អ៊ីស្រាអែលត្រៀមកញ្ចប់ថវិកាចំនួន ១៣លានដុល្លារដើម្បីពង្រឹងកិច្ចសហប្រតិបត្តិការ និងសេដ្ឋកិច្ច ព្រមទាំងបង្កើតទីភ្នាក់ងារដើម្បីអភិវឌ្ឍន៍អន្តរជាតិនៅក្នុងប្រទេសអាហ្រ្វិកចំនួន ៤ គឺអ៊ូហ្កង់ដា កេនញ៉ា អេត្យូពី និងប្រទេសរវ៉ាន់ដា។
តម្រូវការរបស់អាហ្រ្វិកពីអ៊ីស្រាអែលវិញមានច្រើន តាំងពីចំណេះដឹងក្នុងវិស័យកសិកម្ម សុខាភិបាលរហូតដល់សន្តិសុខជាតិ។ នៅក្នុងវិស័យសន្តិសុខ និងការពារជាតិ អាហ្វ្រិកត្រូវការមេរៀនរបស់អ៊ីស្រាអែលដើម្បីប្រឈមទប់នឹងកំណើនគំរាមកំហែងរបស់ពួកជីហាតក្នុងស្រុក និងអន្តរជាតិ។
ទស្សនកិច្ចនៅអ៊ូហ្កង់ដា ជាទស្សនកិច្ចផ្លូវការ និងឯកជន
នៅក្នុងចំណោមប្រទេសអាហ្រ្វិកទាំង ៤ ដែលលោកនេតាន់យ៉ាហ៊ូត្រូវបំពេញទស្សនកិច្ច អ៊ូហ្កង់ដាជាប្រទេសដែលលោកបានទៅទស្សនកិច្ចមុនគេ។ ជម្រើសប្រទេសអ៊ូហ្កង់ដាមុនគេ ព្រោះជាទស្សនកិច្ចផ្លូវរដ្ឋផង និងជាទស្សនកិច្ចផ្លូវឯកជនផង។ ជាទស្សនកិច្ចផ្លូវឯកជន ព្រោះលោកទៅចូលរួមនៅក្នុងពិធីរម្លឹកខួបគម្រប់ ៤០ឆ្នាំនៃមរណៈភាពរបស់បងប្រុសលោក គឺលោកវរសេនីយទោយ៉ូណាត់តង់ នេតាន់យ៉ាហ៊ូ។ លោកយ៉ូណាត់តង់ដែលបានស្លាប់នៅក្នុងប្រតិបត្តិការកងកម្ម៉ង់ដូអ៊ីស្រាអែលទៅលើអាកាសយានដ្ឋាន Entebbe ក្នុងទឹកដីអ៊ូហ្កង់ដាកាលពីថ្ងៃទី៤ កក្កដា ឆ្នាំ ១៩៧៦។
កាលពី ៤០ឆ្នាំមុន ពោលក្នុងថ្ងៃទី២៧ មិថុនា ១៩៧៦ មានជនជាតិប៉ាឡេស្ទីន ២នាក់ និងសកម្មជនឆ្វេងនិយមជនជាតិអាល្លឺម៉ង់ ២នាក់បានពង្វៀងយន្តហោះបារាំងមួយគ្រឿងដែលធ្វើដំណើរពីទីក្រុងតេឡាវី ប្រទេសអ៊ីស្រាអែលទៅទីក្រុងប៉ារីសជាមួយនឹងអ្នកដំណើរ ២៥០នាក់ ក្នុងនោះមានជនជាតិអ៊ីស្រាអែលចំនួន ១០៥នាក់។ យន្តហោះនោះត្រូវបានក្រុមចាប់ជំរិតបញ្ជាឲ្យចុះចតនៅអាកាសយានដ្ឋាន Entebbe ក្នុងទឹកដីអ៊ូហ្កង់ដា ហើយនៅពេលចុះចតភ្លាម ក៏មានក្រុមចាប់ជំរិត ៣នាក់ទៀតបានទៅចូលរួមជាមួយ។
កាលណោះ ក្រុមចាប់ជំរិតបានគំរាមបំផ្ទុះយន្តហោះ បើអ៊ីស្រាអែលមិនព្រមដោះលែងអ្នកទោសប៉ាឡេស្ទីនចំនួន ៥៣នាក់ដែលកំពុងជាប់ឃុំនៅក្នុងប្រទេសជាច្រើន ក្នុងនោះមាន ២៩នាក់នៅអ៊ីស្រាអែល។ តែអ៊ីស្រាអែលមិនព្រម ហើយក៏បានចាត់វិធានការធម៌ក្តៅ ដោយបានបញ្ជូនកងកម្ម៉ង់ដូដែលដឹកនាំដោយលោកយ៉ូណាត់តង់ទៅរំដោះជនជាតិខ្លួន។ នៅថ្ងៃទី៤ កក្កដា ១៩៧៦ ដែលជាថ្ងៃឱសានវាទដាក់ដោយពួកចាប់ជំរិត កងកម្ម៉ង់ដូអ៊ីស្រាអែលក៏សម្រេចបើកប្រតិបត្តិការរំដោះចំណាប់ខ្មាំងនៅអាកាសយានដ្ឋាន Entebbe។
ប្រតិបត្តិការបានបណ្តាលឲ្យស្លាប់មនុស្ស ៣នាក់ និងសម្លាប់ពួកចាប់ជំរិតទាំង ៧នាក់។ តែនៅក្នុងចំណោមមនុស្សស្លាប់ទាំង ៣នាក់ ក៏មានលោកយ៉ូណាត់តង់ដែលជាបងប្រុសរបស់លោកនេតាន់យ៉ាហ៊ូ នាយករដ្ឋមន្រ្តីអ៊ីសា្រអែលសព្វថ្ងៃដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ