ក្រសួងសុខាភិបាលបារម្ភពីការឆ្លងជំងឺគ្រុនឈាម ក្រោយពេលទឹកជំនន់ស្រក
គិតត្រឹមថ្ងៃទី២២តុលា ឆ្នាំ២០១៣នេះ ជំងឺគ្រុនឈាម បានសម្លាប់មនុស្ស ៤៩នាក់ ។ ទោះបីជាចំនួននេះថយចុះជាងឆ្នាំ ២០១២ ប៉ុន្តែ ក្រសួងសុខាភិបាលបានសម្តែងការព្រួយបារម្ភពីជំងឺនេះដោយសារទឹកជំនន់ដែលទើបតែស្រកអាចបណ្តាលឲ្យជំងឺនេះនឹងរីករាយដាលខ្លាំងក្នុងអំឡុងពេលនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៩
ក្រសួងសុខាភិបាលកម្ពុជាបានឲ្យដឹងថា គិតត្រឹមរយៈពេល១០ខែ ក្នុងឆ្នាំ ២០១៣ នេះ មានករណីជំងឺគ្រុនឈាមជាង១៥ ០០០ ករណី និងបានបណ្តាលឲ្យមនុស្សស្លាប់ ចំនួន ៤៩នាក់។ យ៉ាងណាក៏ដោយចំនួននេះ គឺបានថយចុះច្រើន បើធៀបនឹងរយៈពេលដូចគ្នាកាលពីឆ្នាំ ២០១២ ដែលមានជំងឺនេះដល់ទៅជាង ៣៩ ០០០ ករណី និងបានសម្លាប់មនុស្ស ១៦៧នាក់។ នេះបើតាមលោក ង៉ាន់ ច័ន្ទថា នាយកកម្មវិធីប្រយុទ្ធជំងឺគ្រុនឈាមនៃក្រសួងសុខាភិបាល ដែលបានប្រាប់វិទ្យុបារាំងអន្តរជាតិ នៅថ្ងៃអង្គារនេះ។
លោកង៉ាន់ ច័ន្ទថា បានឲ្យដឹងថា អ្នកស្លាប់ភាគច្រើនជាកុមារ ដែលមានអាយុក្រោម ១៥ឆ្នាំ ប៉ុន្តែ នេះមិនមែនមានន័យថា មនុស្សធំមិនប្រឈមមុខនោះទេ គ្រាន់តែក្រសួងមិនទាន់បានលម្អិតខ្លាំងទៅលើករណីមនុស្សពេញវ័យ។ លោក ង៉ាន់ ច័ន្ទថា បានបន្តថា ទោះបីជាជំងឺគ្រុនឈាម មិនធ្ងន់ធ្ងរខ្លាំង ដូចក្នុងឆ្នាំ ២០១២ ប៉ុន្តែ ក្រសួងនៅតែព្រួយបារម្ភជានិច្ច។ ព្រួយបារម្ភ ព្រោះថាទឹកជំនន់ទើបតែស្រក ហើយនៅតំបន់ដែលលិចទឹកខ្លាំង អាចបង្កឲ្យមានជំរកមូសខ្លា កាន់តែរីករាលដាលខ្លាំង។
ជាមួយគ្នានោះ លោកនាយកកម្មវិធីប្រយុទ្ធនឹងជំងឺគ្រុនឈាមដដែល បាននិយាយថា អ្វីដែលរឹតតែគួរបារម្ភនោះ គឺបណ្តាប្រទេសជាមិត្តកម្ពុជាជាច្រើន មានដូចជា ថៃ ឡាវ វៀតណាម សិង្ហបុរី ម៉ាឡេស៊ី ជាដើម កំពុងតែផ្ទុះឡើងខ្លាំង នៅជំងឺគ្រុនឈាមនេះ។
សូមបញ្ជាក់ថា ខេត្តដែលប្រឈមមុខ ដោយជំងឺគ្រុនឈាមខ្លាំងក្នុងប្រទេសកម្ពុជា មានដូចជា ខេត្តសៀមរាប កំពង់ចាម កណ្តាល កំពង់ធំ ភ្នំពេញ ព្រៃវែង បន្ទាយមានជ័យ និងកំពង់ស្ពឺ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ