លោកស្រីឡាក់ សុភាពត្រូវបានបណ្តេញចេញពីបក្សសង្គ្រោះជាតិ
ទីបំផុតទៅ គណៈកម្មាធិការវិន័យរបស់គណបក្សសង្គ្រោះជាតិបានសម្រេចបណ្តេញលោកស្រី ឡាក់ សុភាព ចេញពីគណបក្សហើយ។ គណៈកម្មាធិការវិន័យបានចោទលោកស្រីឡាក់ សុភាព ដែលជាសមាជិកគណៈកម្មាធិការនាយកគណបក្សថាបាននិយាយព័ត៌មានមិនពិតធ្វើឲ្យប៉ះពាល់ដល់កិត្តិយសគណបក្ស។
ចុះផ្សាយនៅថ្ងៃ៖
ស្តាប់ - ០១:៥០
សេចក្តីសម្រេចបណ្តេញលោកស្រីឡាក់ សុភាពចេញពីគបក្សសង្គ្រោះជាតិបានធ្វើឡើងនៅព្រឹកថ្ងៃអង្គារទី៣០ធ្នូនេះតាមរយៈលិខិតជាលាយលក្ខណ៍អក្សរចុះហត្ថលេខាដោយលោក អ៊ូ ច័ន្ទឫទ្ធិ ប្រធានគណៈកម្មាធិការវិន័យគណបក្សសង្គ្រោះជាតិ។ លោក អ៊ូ ច័ន្ទឫទ្ធិ បានប្រាប់វិទ្យុបារាំងអន្តរជាតិបន្ថែមថា លោកស្រីឡាក់ សុភាពបានធ្វើឲ្យប៉ះពាល់ធ្ងន់ធ្ងរដល់កិត្តិយសគណបក្ស។
លោកស្រីឡាក់ សុភាព ដែលជាសមាជិកគណៈកម្មាធិការនាយកគណបក្សសង្គ្រោះជាតិនិងជាជំនួយការរបស់លោក កឹម សុខា ផងនោះបានប្រឡូកក្នុងនយោបាយជាមួយគណបក្សប្រឆាំងអស់រយៈពេល២០ឆ្នាំមកហើយ។ ប៉ុន្តែ ស្ត្រីរូបនេះបាននិយាយប្រាប់អ្នកកាសែតកាលពី២៧ធ្នូខណៈដែលលោកស្រីទៅចូលរួមកិច្ចប្រជុំជាមួយក្រុមបណ្តាញគណបក្សនយោបាយថ្មីដែលដឹកនាំដោយលោក កែម ឡី នោះ អំពីបញ្ហាពុករលួយរបស់មេបក្សនិងការបែកបាក់ផ្ទៃក្នុងគណបក្សសង្គ្រោះជាតិ។
ប៉ុន្តែ មេដឹកនាំគណបក្សសង្គ្រោះជាតិបានបដិសេធទាំងស្រុងនូវព័ត៌មាននេះ។ កាលពីថ្ងៃចន្ទទី២៩ធ្នូ គណៈកម្មាធិការវិន័យគណបក្សក៏បានកោះហៅលោកស្រី ឡាក់ សុភាព ទៅសាកសួរនិងបានទុកពេលមួយថ្ងៃដើម្បីឲ្យលោកស្រីបកស្រាយជាមួយសារព័ត៌មានចំពោះអ្វីដែលខ្លួនបាននិយាយ ប៉ុន្តែ លោកស្រីមិនបានធ្វើតាមទេ។ ភ្លាមៗក្រោយការបណ្តេញចេញពីបក្ស លោកស្រីឡាក់ សុភាព បានបើកធ្វើសន្និសីទកាសែតមួយនៅមុខមន្ទីររដ្ឋសភាដោយហៅការសម្រេចនេះថា«អយុត្តិធម៌»ហើយលោកស្រីនឹងមិនដើរចេញពីគណបក្សសង្គ្រោះជាតិទេ។
នេះជាលើកដំបូងហើយដែលគណៈកម្មាធិការវិន័យគណបក្សសង្គ្រោះជាតិចាត់វិធានការចំពោះមន្ត្រីជាន់ខ្ពស់របស់ខ្លួនដែលបានរិះគន់បរិហារមេដឹកនាំគណបក្ស។ លោកស្រីឡាក់ សុភាព ដែលគេសង្ស័យថា ទំនងជាទៅចូលរួមជាមួយគណបក្សថ្មីរបស់លោក កែម ឡី នោះអះអាងថា លោកស្រីមិនត្រូវបានអ្នកណាទិញទឹកចិត្តឲ្យនិយាយអំពីបញ្ហាពុករលួយនិងការបែកបាក់ផ្ទៃក្នុងគណបក្សសង្គ្រោះជាតិនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ