លោកស្រី អ៊ុង សានស៊ូជី អំពាវនាវឱ្យយោធាចូលរួមធ្វើកំណែទម្រង់រដ្ឋធម្មនុញ្ញ
ប្រមុខបក្សប្រឆាំងភូមា លោកស្រី អ៊ុងសានស៊ូជី បានអំពាវនាវនៅថ្ងៃសៅរ៍ទី ៤ មករា ថ្ងៃបុណ្យឯករាជ្យជាតិភូមា ឱ្យយោធាចូលប្រលូកធ្វើកំណែទម្រង់រដ្ឋធម្មនុញ្ញ។ រដ្ឋធម្មនុញ្ញចាស់គំរិល តាំងពីសម័យភូមាដឹកនាំដោយរបបសឹក និងដែលមានលក្ខណៈចម្រូងចម្រាសបំផុត។ ប៉ុន្តែបើគ្មានការជ្រោមជ្រែង និងចូលរួមពីយោធាទេ នោះកំណែទម្រង់ពិតជាមិនអាចចេញរួចឡើយ។
ចុះផ្សាយនៅថ្ងៃ៖
ស្តាប់ - ០១:៥០
“យើងត្រូវតែទទួលស្គាល់ថាច្បាប់រដ្ឋធម្មនុញ្ញភូមាមិនត្រឹមត្រូវទេ បើប្រៀបទៅនឹងបទដ្ឋានប្រជាធិបតេយ្យ” នេះជាប្រសាសន៍របស់លោកស្រីអ៊ុងសានស៊ូជី នាឱកាសបុណ្យឯកជាតិលើកទី៦៦ ដោយថែមទាំងសំណូមពរឱ្យ តាតម៉ាដាវ ឈ្មោះកងយុទ្ធពលភូមា សម្រេចចិត្តភ្លាម ចូលរួមយ៉ាងសស្រាក់សស្រាំធ្វើកំណែទម្រង់រដ្ឋធម្មនុញ្ញជាតិ។
បើគ្មានការចូលរួមពីយោធា កំណែទម្រង់រដ្ឋធម្មនុញ្ញពិតជាមិនអាចចេញរួចឡើយ ព្រោះនៅក្នុងអត្ថបទច្បាប់យោធាភូមាមានអំណាចធំធេងណាស់ និងមានអាសនៈនៅក្នុងសភាដល់ទៅ២៥%។ ដើម្បីអាចសម្រេចធ្វើកំណែទម្រង់បាន ទាល់តែសភាប្រមូលសំឡេងគាំទ្របានលើសពី៧៥% ពោលគឺត្រូវការមានតំណាងយោធាយ៉ាងហោចណាស់ម្នាក់ចូលជួយ។
តាំងពីបានទទួលសេរីភាពផុតពីការឃុំឃាំងក្នុងគេហដ្ឋានមក លោកស្រីអ៊ុងសានស៊ូជី បានយកការធ្វើកំណែទម្រង់រដ្ឋធម្មនុញ្ញជាអាទិភាព ព្រោះច្បាប់នេះត្រូវបានតាក់តែងឡើង តាំងពីសម័យភូមាដឹកនាំដោយរបបសឹក និងអនុម័តដោយប្រជាមតិនៅឆ្នាំ ២០០៨។ រដ្ឋធម្មនុញ្ញចាស់នេះ បានហាមឃាត់មិនឱ្យជនណា ដែលរៀបការ ឬមានកូនកាន់សញ្ជាតិបរទេស ឡើងកាន់អំណាច ជាប្រធានាធិបតីបានឡើយ។ ដូច្នេះមានន័យថា លោកស្រីអ៊ុងសានស៊ូជី ដែលមានមហិច្ឆតាចង់ដឹកនាំប្រទេស មិនអាចឈរឈ្មោះ បានទេ នៅឆ្នាំ២០១៥ បើគ្មានកំណែទម្រង់ ព្រោះលោកស្រីមានស្វាមីជាជនជាតិអង់គ្លេស (ស្លាប់) និងកូនពីរនាក់មានលិខិតឆ្លងដែនអង់គ្លេស។
លោក ថេន សេន ប្រធានាធិបតីស៊ីវិលភូមាដំបូង ដែលបានធ្វើកំណែទម្រង់យ៉ាងសន្ធឹកសន្ធាប់ គួរជាទីភ្ញាក់ផ្អើល បានគាំទ្រឱ្យមានកំណែទម្រង់រដ្ឋធម្មនុញ្ញនេះ កាលពីសប្តាហ៍មុន។ ហើយគណៈកម្មការសភាភូមាក៏បានចាប់ផ្តើមធ្វើការលើប្រធានបទនេះ តាំងពីពីរបីខែមុន។ របាយការណ៍ការងារនឹងត្រូវបង្ហាញនៅដំណាច់ខែមករានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ