ប្រធានាធិបតីភូមាគាំទ្រកំណែទម្រង់រដ្ឋធម្មនុញ្ញដ៏ចម្រូងចម្រាស
នៅប្រទេសភូមា ថ្ងៃព្រហស្បតិ៍នេះ ប្រធានាធិបតី ថេន សេន បានបង្ហាញការគាំទ្ររបស់លោក ចំពោះវិសោធនកម្មរដ្ឋធម្មនុញ្ញឆ្នាំ២០០៨ ដែលធ្វើឡើង កាលពីភូមាស្ថិតក្នុងរបបសឹកចាស់។ ការគាំទ្រអោយមានកំណែទម្រង់រដ្ឋធម្មនុញ្ញនេះ សបង្ហាញពីបំណងប្រធានាធិបតីថេន សេន ក្នុងការដឹកនាំភូមា ទៅកាន់លទ្ធិប្រជាធិបតេយ្យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
នៅថ្ងៃព្រហស្បតិ៍នេះ ប្រធានាធិបតីភូមា ថេន សេន បានផ្តល់ការគាំទ្រដល់កំណែទម្រង់រដ្ឋធម្មនុញ្ញនៅភូមា ដែលរបបសឹកចាស់ភូមាបានតាក់តែងឡើង កាលពីឆ្នាំ២០០៨។ លោកថេន សេន លើកឡើងថា៖ ខ្ញុំគិតថា រដ្ឋធម្មនុញ្ញដែលល្អបរិសុទ្ធ ត្រូវតែទទួលបានការកែទម្រង់ ជារឿយៗ ដើម្បីឆ្លើយតបទៅនឹងតំរូវការជាតិ តំរូវការសេដ្ឋកិច្ច និងសង្គមរបស់យើង។
រដ្ឋធម្មនុញ្ញឆ្នាំ២០០៨ ត្រូវបានតាក់តែងឡើង និងបានអនុម័តដោយការបោះឆ្នោតប្រជាមតិ កាលពីពេលភូមាស្ថិតក្នុងរបបសឹកចាស់នៅឡើយ។ កាលណោះ របបសឹកចាស់ភូមា បានប្រកាន់ខ្ជាប់អោយមានការបោះឆ្នោតប្រជាមតិអនុម័តរដ្ឋធម្មនុញ្ញនេះ បើទោះជា ភូមាបានរងគ្រោះដោយព្យុះសង្ឃរា ណារហ្គី ធ្វើអោយប្រជាជន១សែន៣ម៉ឺន៨ពាន់នាក់ស្លាប់និងបាត់ខ្លួន ក៏ដោយ។ រដ្ឋធម្មនុញ្ញភូមាឆ្នាំ២០០៨ បានផ្តល់អំណាចលើសលុបដល់ទាហានភូមា ដោយផ្តល់សិទ្ធិក្នុងការកាន់កៅអីសភា២៥ភាគរយដល់ពួកគេ។ ម្យ៉ាងទៀត រដ្ឋធម្មនុញ្ញនេះ បានចែងហាមឃាត់ជនជាតិភូមា ដែលមានស្វាមី រឺក៏ភរិយាជាជនបរទេស រឺក៏មានកូនៗកាន់ទិដ្ឋាការឆ្លងដែនបរទេស មិនអោយធ្វើជាប្រធានាធិបតីនៅភូមាឡើយ។ អាស្រ័យហេតុនេះ ប្រធានគណបក្សប្រឆាំង គឺលោកស្រីអ៊ុងសាន ស៊ូជី ដែលមានស្វាមីជាជនជាតិអង់គ្លេសនោះ មិនអាចចូលរួមក្នុងឆាកនយោបាយភូមាបានឡើយ។
ប៉ុន្តែ ចាប់តាំងពីរបបសឹកចាស់ភូមាត្រូវបានរំលាយចោល ក្នុងខែមិនាឆ្នាំ២០១១មក ប្រធានាធិបតីថេន សេន បានធ្វើកំណែទម្រង់គួរអោយកត់សំគាល់ និងបានអនុញ្ញាតអោយលោកស្រី អ៊ុងសាន ស៊ូជី បានចូលប្រលូកក្នុងឆាកនយោបាយឡើងវិញ។ លោកថេន សេន បានដោះលែងអ្នកទោសនយោបាយរាប់រយនាក់ ថែមទាំងបានចុះទៅចរចាសន្តិភាពជាមួយក្រុមឧទ្ទាមជាច្រើនមកពីសហគមន៍ជនជាតិភាគតិចទៀតផង។
ជាងមួយខែមកនេះ គណៈកម្មការសភាមួយ មានសមាជិកមកពីគណបក្សនយោបាយជាច្រើនផ្សេងគ្នា បានជួបពិភាក្សាគ្នា ធ្វើកំណែទម្រង់រដ្ឋធម្មនុញ្ញ។ ប្រធានាធិបតីថេន សេន ប្រាប់ថា លោកមិនចង់អោយពលរដ្ឋភូមាម្នាក់ៗ រងការរឹតត្បិត មិនអាចឡើងកាន់អំណាចនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ