លោកសាកូហ្ស៊ី អះអាងភាពស្អាតស្អំរបស់ខ្លួន ចំពោះមុខការចោទប្រកាន់ពីបទពុករលួយ
អតីតប្រធានាធិបតីបារាំង លោក នីកូឡា សាកូហ្ស៊ី បានទាមទាររកយុត្តិធម៌ចំពោះការចោទប្រកាន់របស់តុលាការថាលោកបានប្រព្រឹត្តអំពើពុករលួយ។ បន្ទាប់ពីត្រូវបានដោះលែងពីការឃាត់ខ្លួនអស់រយៈពេល១៥ម៉ោង លោកនីកូឡា សាកូហ្ស៊ី បានថ្លែងកាលពីល្ងាចថ្ងៃពុធ នៅតាមកញ្ចក់ទូរទស្សន៍បារាំងមួយ ថា “លោកជាមនុស្សសុចរិត លោកមិនបានធ្វើអ្វីខុសនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
លោកនីកូឡា សាកូហ្ស៊ី អតីតប្រធានាធិបតីបារាំង បានផ្តល់បទសម្ភាសតាមទូរទស្សន៍បន្ទាប់ពីលោកត្រូវបានតុលាការដោះលែងពីការឃាត់ខ្លួននៅថ្ងៃពុធទី២កក្កដា។ ក្នុងបទសម្ភាសនោះ លោកបានច្រានចោលការចោទប្រកាន់របស់តុលាការទាំងស្រុងហើយ លោកថាវាគឺជាការរៀបចំ ប្រតិដ្ឋដោយយកស្ថាប័នតុលាការជាឧបករណ៍នយោបាយ។ លោកបន្តថា គេមានចេត្តនាបង្ខូចកិត្តិយសរបស់លោកដោយចាប់ឃាត់ខ្លួនលោកអស់រយៈពេល១៥ម៉ោង។
ការចោទប្រកាន់មកលើរូបខ្ញុំ គឺជាការយកតុលាការធ្វើជាឧបករណ៍នយោបាយ។
សំឡេងរបស់នីកូឡា សាកូហ្ស៊ី ប្រែសម្រួលដោយ ម៉ម ពិសី
លោកបានរិះគន់ដោយចំៗ ទៅលើលោកស្រី រដ្ឋមន្ត្រីក្រសួងយុត្តិធម៌ ថាបានកុហកថាលោកស្រីមិនបានដឹងឮរឿងដែលលោកត្រូវបានប៉ូលីសលួចស្តាប់រាល់ការសន្ទនារតាមទូរស័ព្ទ។ លោកបន្តទៀតថា លោកហូឡង់ និងក្រុមសហការីរបស់គាត់បានកេងចំណេញនយោបាយ រើកកាយនិង ប្រើប្រាស់ឯកសាររបស់លោកដោយឥតមានការអៀនខ្មាស។ ទាំងនេះ គឺជារៀបចំមួលបង្កាច់ ក្នុងគោលបំណងតែមួយគត់ គឺកំចាយលោកចេញពីឆាកនយោបាយ។ លោកក៏បានថ្លែងដែរថា លោកមិនបានទទួលការស៊ើបអង្កេតដោយសុក្រឹតយុត្តិធម៌ទេ ព្រោះថាចៅក្រមស៊ើបអង្កេតគឺជាសមាជិកសហជីពចៅក្រមដែលមាននិន្នាការប្រឆាំងនឹងគាត់។
លោកសាកូហ្ស៊ី ត្រូវបានតុលាការចោទប្រកាន់ពីបទពុករលួយ។ ការចោទប្រកាន់លើលោកនីកូឡា សាកូហ្ស៊ី នៅពេលនេះ កើតចេញពីការស៊ើបអង្កេតលើសំណុំរឿងផ្សេងមួយទៀត គឺការសង្ស័យពីរឿងលោកសាកូហ្ស៊ីទទួលលុយពីកាដាហ្វ៊ី អតីតមេដឹកនាំលីប៊ី ដើម្បីយកមកប្រើ នៅក្នុងយុទ្ធនាការឃោសនាបោះឆ្នោត កាលពីឆ្នាំ២០០៧។ នៅក្នុងការស៊ើបអង្កេតនេះ ចៅក្រមស៊ើបអង្កេតបានសម្រេចឲ្យប៉ូលិសលួចស្តាប់ការសន្ទនា តាមទូរស័ព្ទរបស់អ្នកដែលពាក់ព័ន្ធក្នុងសំណុំរឿងនេះទាំងអស់ ក្នុងនោះ ក៏មានទាំងលោកសាកូហ្ស៊ីផងដែរ។
នៅក្នុងការលួចស្តាប់ទូរស័ព្ទនេះ គេឮលោកសាកូហ្ស៊ីជជែកជាមួយមេធាវីរបស់លោក អំពីការទាក់ទងទៅរដ្ឋអាជ្ញាម្នាក់ នៅតុលាការកំពូលបារាំង ដើម្បីចង់បានព័ត៌មានសម្ងាត់ទាក់ទងនឹងសំណុំរឿង ដែលតុលាការកំពុងចាត់ការ ទាក់ទងនឹងលោកសាកូហ្ស៊ី។ ជាថ្នូរមកវិញ លោកសាកូហ្ស៊ីសន្យាថានឹងជួយអន្តរាគមន៍ ដើម្បីឲ្យរដ្ឋអាជ្ញានេះទទួលបានតំណែងដែលគាត់ចង់បាន។
ក្នុងពេលនេះ លោកសាកូហ្ស៊ី អាចនឹងប្រឈមមុខនឹងការផ្តន្ទាទោសឲ្យជាប់ពន្ធនាគារ១០ឆ្នាំ ហើយនិងការផាកពិន័យមិនអោយចូលរួមធ្វើនយោបាយតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ