គ្មានឥទ្ធិពលនុយក្លេអ៊ែរជប៉ុនមកដល់កម្ពុជានោះទេ
ក្រោយពីការផ្ទុះម៉ាស៊ីនប្រតិកម្មនៅក្នុងមជ្ឈមណ្ឌលនុយក្លេអ៊ែរ ជប៉ុន ក្នុងតំបន់ដែលទទួលរងគ្រោះរញ្ជួយដី និងរលកយក្សស៊ូណាមីនោះមក នៅកម្ពុជាមានសារអេឡិចត្រូនិកត្រូវបានគេផ្ញើតៗគ្នាថា អោយប្រយ័ត្ន ព្រោះសារជាតិវិទ្យុសកម្មដែលផ្ទុះចេញពីម៉ាស៊ីនប្រតិកម្មទាំងនោះ នឹងអាចជះឥទ្ធិពលធ្វើអោយខូចស្បែក តាមរយៈការប៉ះទឹកភ្លៀង ប្រសិនបើមានភ្លៀង។ ក្រសួងធនធានទឹកបានធ្វើសេចក្តីប្រកាសព័ត៌មាននៅថ្ងៃនេះ ច្រានចោលព័ត៌មានចចាមអារ៉ាមនេះ ដោយពន្យល់ថា របបខ្យល់ដែលកម្ពុជាទទួលសព្វថ្ងៃនេះ មិនមានពាក់ព័ន្ធនឹងរបបខ្យល់ពីក្នុងប្រទេសជប៉ុននោះឡើយ។
ចុះផ្សាយនៅថ្ងៃ៖
សេចក្តីរាយការណ៍របស់លាង ដឺលុច ពីភ្នំពេញ
ក្រោយពីការផ្ទុះម៉ាស៊ីនប្រតិកម្ម នៅក្នុងមជ្ឈមណ្ឌលនុយក្លេអ៊ែរជប៉ុន ក្នុងតំបន់ដែលទទួលរងគ្រោះរញ្ជួយដី និងរលកយក្សស៊ូណាមីនោះ ក្រសួងធនធានទឹក និងឧតុនិយមកម្ពុជាបានធ្វើសេចក្តីជូនដំណឹងមួយដែលបញ្ជាក់ថា កម្ពុជាកំពុងទទួលឥទ្ធិពលនៃរបបខ្យល់ត្រូពិក។ នេះគឺជាសារមួយដែលចង់ពន្យល់ថា ឥទ្ធិពលនៃការផ្ទុះម៉ាស៊ីនប្រតិកម្មនុយក្លេអ៊ែរនៅក្នុងប្រទេសជប៉ុននោះ នឹងមិនរសាត់មកដល់ប្រទេសកម្ពុជានោះឡើយ។ សេចក្តីជូនដំណឹងនេះគឺជាការឆ្លើយបដិសេធទៅនឹងពាក្យចចាមអារ៉ាមដែលប្រជាជនកម្ពុជាមួយចំនួនកំពុងផ្សព្វផ្សាយតៗគ្នាតាមរយៈសារអេឡិចត្រូនិក ឬអ៊ីមែល។
សារដែលត្រូវបានគេផ្សាយតគ្នានោះសរសេរថា នៅក្នុងប្រទេសជប៉ុនមានផ្ទុះរោងចក្រថាមពលនុយក្លេអ៊ែរ។ ប្រសិនបើមានភ្លៀង សូមកុំចេញទៅក្រៅ ប៉ះទឹកភ្លៀង ពីព្រោះទឹកភ្លៀងនោះមានជាតិអាស៊ីត ដែលអាចធ្វើអោយរលាកស្បែក និងជ្រុះសក់។
នេះជាពាក្យចចាមអារ៉ាមគ្មានមូលដ្ឋាន។ លោកចាន់ យុត្ថា នាយកខុទ្ទកាល័យក្រសួងធនធានទឹក និងឧតុនិយមបានពន្យល់ថា សេចក្តីជូនដំណឹងរបស់ក្រសួងធនធានទឹកចង់ប្រាប់សាធារណជនកម្ពុជាថា របបខ្យល់ដែលកម្ពុជាទទួលនៅពេលនេះ មិនមានអ្វីពាក់ព័ន្ធនឹងរបបខ្យល់ពីប្រទេសជប៉ុននោះទេ។ ដូច្នេះគ្មានឥទ្ធិពលនៃសារជាតិនុយក្លេអ៊ែរមកដល់កម្ពុជានោះឡើយ។
លោក កាម៉ាដា យ៉ាស៊ុហ៊ិកុ លេខាទីមួយនៃស្ថានទូតជប៉ុនប្រចាំកម្ពុជាបានសម្តែងការព្រួយបារម្ភ ចំពោះការផ្សព្វផ្សាយព័ត៌មានមិនពិត និងមិនត្រឹមត្រូវដូចពាក្យចចាមអារ៉ាមខាងលើ ហើយថា ការផ្សព្វផ្សាយបែបនេះនឹងអាចធ្វើអោយមានការភាន់ច្រឡំ និងចលាចលក្នុងចំណោមប្រជាជនកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ