ស្ថានភាពដ៏ដុនដាបនៅមជ្ឈមណ្ឌលនុយក្លេអ៊ែរនៅFukushima
នៅថ្ងៃពុធទី១៦មីនានេះ ស្ថានភាពនៅមជ្ឈមណ្ឌលនុយក្លេអ៊ែរនៅFukushimaនៅតែមានលក្ខណៈដុនដាប។ អាជ្ញាធរជប៉ុនកំពុងធ្វើការប្រយុទ្ធទប់ទល់ដើម្បីកុំឲ្យវិបត្តិ នុយក្លេអ៊ែរនៅFukushimaក្លាយទៅជាមហន្តរាយនុយក្លេអ៊ែរមួយដ៏ធំធេង ដែលប្រទេសជាច្រើនក្នុងលោកកំពុងជួយភ័យបារម្ភ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
ប្រាំថ្ងៃក្រោយពីមានការរញ្ជួយផែនដីដ៏សែនខ្លាំងក្លានិងមានមហារលកយក្សបោកបក់ទៅលើតំបន់ប៉ែកឦសាននៃប្រទេសជប៉ុនដែលបានធ្វើឲ្យមជ្ឈមណ្ឌលនុយក្លេអ៊ែរនៅFukushimaទទួលរងគ្រោះយ៉ាងសែនធ្ងន់ធ្ងរ។ មជ្ឈមណ្ឌលនុយក្លេអ៊ែរនេះឋិតនៅចម្ងាយប្រមាណ២៥០គ,មពីទីក្រុងតូក្យូ។
ក្រោយពីមានការឆាបឆេះនៅប្រតិករនុយក្លេអ៊ែរទី៣និងទី៤រួចមក នៅថ្ងៃពុធទី១៦មីនានេះនៅរវាងម៉ោង១ម៉ោងសកល គេកត់សម្គាល់ឃើញមានវិទ្យុសកម្មកើនឡើងយ៉ាងខ្លាំងនៅច្រកចូលនៃមជ្ឈមណ្ឌលនុយក្លេអ៊ែរFukushima។ នេះជាសេចក្តីថ្លែងប្រកាសរបស់អ្នកនាំពាក្យនៃរដ្ឋាភិបាលជប៉ុនលោកYukio Edano។
សូមបញ្ជាក់ថា កម្រិតនៃសារធាតុវិទ្យុសកម្មដែលឋិតនៅជិតច្រកចូលនៃមជ្ឈមណ្ឌលនុយក្លេអ៊ែរFukushimaនេះ មានស្គាល់ការប្រែប្រួលពីមួយម៉ោងទៅមួយម៉ោង ហើយបន្តឋិតនៅក្នុងកម្រិតមួយដ៏ខ្ពស់ដែលអាចធ្វើឲ្យប៉ះពាល់ដល់សុខភាពរបស់មនុស្ស។
ដោយហេតុតែ កម្រិតនៃវិទ្យុសកម្មដែលឋិតនៅពីលើមជ្ឈមណ្ឌលនុយក្លេអ៊ែរជប៉ុនFukushimaនេះមានកម្រិតខ្លាំងពេក ដែលជាមូលហេតុខាឃាំងកុំឲ្យឧទ្ធម្ភាគចក្រអាចមានលទ្ធភាពចូលជិតម៉ាស៊ីនប្រតិកម្មនុយក្លេអ៊ែរទី៤ដើម្បីចាក់ស្រោចទឹកក្នុងបំណងធ្វើឲ្យឥន្ធនៈនុយក្លេអ៊ែរធ្លាក់ត្រជាក់វិញ និងដើម្បីបញ្ចៀសកុំឲ្យ ឥន្ធនៈនុយក្លេអ៊ែរនេះក្តៅរលាយ។
ក៏ដូចគ្នាអ៊ីចឹងដែរនៅមជ្ឈមណ្ឌលនុយក្លេអ៊ែរជប៉ុនFukushima-Daiichiដែលវិទ្យុសកម្មក៏នៅមានកម្រិតខ្លាំងពេកដែលជាមូលហេតុខាឃាំងកុំឲ្យឧទ្ធម្ភាគចក្រនៃកងកម្លាំងយោធាជប៉ុនអាចចូលជិតម៉ាស៊ីនប្រតិកម្មនុយក្លេអ៊ែរទី៣ដើម្បីចាក់ស្រោចទឹកក្នុងបំណងបញ្ចៀសកុំឲ្យឥន្ធនៈនុយក្លេអ៊ែរក្តៅរលាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ